ក្នុងព្រឹត្តិការប្រកួត​កីឡាបាល់ទះ Special Volleyball Challenge 2021 ដែល​បញ្ចប់​ទៅ​ថ្មីៗ​នេះ​ សឿន ហេង បានបង្ហាញសមត្ថភាពវាយសេវាលឿនហើយធ្ងន់ល្អ ហើយ​ថែមទាំង​ឈ្នះពានកីឡាករវាយសេវាល្អជាងគេទៀតផង។

បើតាមការសាកសួរ សឿន ហេង ទើបវាយ​សេវា​លោតគប់​ខ្លាំងនៅឆ្នាំនេះប៉ុណ្ណោះ ខណៈគេចេះវាយ​សេវា​ប្រភេទេ​នេះតាំងពីអំឡុងឆ្នាំ ២០១៦-២០១៧ ប៉ុន្តែគុណភាពសម​ល្មមអាច​ទទួល​យក​បាន​។

កីឡាករវិសាខារូបនេះបានប្រាប់ Sabay ថា ៖«...ខ្ញុំលោតខ្លាំងទើបឆ្នាំហ្នឹងដែរហ្នឹងបង ព្រោះពីមុនៗមកខ្ញុំចេះវ៉ៃសឺវីសគប់ហ្នឹង ប៉ុន្តែមិនខ្លាំងទេ ប៉ុន្តែវាម៉ាល្មមៗ»។

កីឡាករ​មាន​ដើម​កំណើត​មក​ពី​ខេត្ត​ព្រៃវែងបន្ថែមថា រូបគេមានសេវាល្អដោយ​សារទទួលបានការបណ្ដុះបណ្ដាលយ៉ាង​ល្អ​ពីសមាគមន៍បាល់ទះវិសាខា។

សេវាលោតគប់នេះ ទាមទារឱ្យ​កីឡាករច្បាស់ប្រអប់ដៃ ចេះលោតយោងខ្លួន ចេះបោះបាល់ និងចេះប្រើចង្កេះជាដើម។ និយាយរួមត្រូវចេះសឹងតែទាំងអស់តែម្ដង។ បើចង់វាយសេវានេះបានល្អ កីឡាករត្រូវមានទំនុកចិត្ត១០០% ទើបសេវាចេញលឿនហើយធ្ងន់ល្អ និង​មិន​ងាយ​ខូច​។ នេះ​បើ​តាម​សម្ដី​របស់​កីឡាករ​កម្ពស់ ១,៨៣ម៉ែត្រ កើត​នៅ​ឆ្នាំ​១៩៩៩៕