នគរបាលជាតិមិនទាន់ស្គាល់ពាក្យ «ឈ្នះ» និងបន្តកាន់កាប់តំណែងបាតតារាង

2021-09-06 07:50:42
បាល់ទាត់

2021-09-06 07:50:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្មើសូន្យទល់នឹងសូន្យជាមួយខេត្តព្រៃវែង កាលពីថ្ងៃទី៥ ខែកញ្ញា ឆ្នាំ២០២១ម្សិលមិញ ក្លឹបបាល់ទាត់នគរបាលជាតិមិនទាន់ស្គាល់ពាក្យថា «ឈ្នះ» នៅឡើយទេ ខណៈ៨ប្រកួតកន្លងមក ពួកគេស្មើ២ និងចាញ់៦ប្រកួត។ ដូច្នេះពួកគេមាន៣ពិន្ទុ បន្តកាន់កាប់តំណែងបាតតារាង។

គ្រូបង្គោលក្រុមនគរបាលជាតិ អ៊ុង កងយ៉ានិត

ចំពោះបរាជ័យហៅលែងឭនេះដែរ ក្រុមនគរបាលជាតិ ត្រូវបានគេព្រួយបារម្ភអាចនឹងត្រូវបានកាត់ចេញពីក្របខ័ណ្ឌលីគកំពូលកម្ពុជារដូវកាលក្រោយ បើជុំទី១និងទី២នៅតែបន្តចាញ់បែបនេះទៀត។

ពាក់ព័ន្ធនឹងកង្វល់នេះគ្រូបង្គោល អ៊ុង កងយ៉ានិត បានប្រាប់មកកាន់ Sabay ថាពេលនេះក្រុមកំពុងស្ថិតក្នុងស្ថានភាពលំបាក ប៉ុន្តែលោកក៏ដូចជាកូនក្រុមមិនបោះបង់ទេ និងប្រឹងប្រែងធ្វើយ៉ាងណាអោយជៀសផុតពីតំបន់កាត់ចោល។

លោកបានបញ្ជាក់បែបនេះ ៖«មកដល់ពេលនេះ ក្រុមស្ថិតក្នុងស្ថានភាពលំបាកខ្លាំងដែលមិនទាន់ឈ្នះការប្រកួតមួយណាទេ ហើយស្ថិតក្នុងតំបន់កាត់ចោលទៀត ដោយសារកីឡាករសំខាន់ៗរបួស។ ប៉ុន្តែពួកយើងមិនបោះបង់នោះទេ យើងនឹងពង្រឹងផ្នែកស្មារតី និងឆន្ទៈក៏ដូចជាកលល្បិចក្រុមអោយបានរឹងមាំ និងមុតស្រួច ដើម្បីយកជ័យជម្នះនូវការប្រកួតបន្ទាប់ទៀត។ បាទ! យើងនឹងប្រឹងប្រែងអោយអស់លទ្ធភាព ដើម្បីទទួលបានជ័យជម្នះ អោយរួចផុតពីតំបន់កាត់ចោល»។

ដោយមានការផ្អាកការប្រកួតម្ដងហើយម្ដងទៀត គណៈកម្មការប្រកួតបាល់ទាត់ជាតិកម្ពុជា (CNCC) បានចម្រេចផ្លាស់ប្ដូរលក្ខខណ្ឌ និងប្រព័ន្ធប្រកួតជាពីរផ្នែកសម្រាប់ជុំទី២។ ផ្នែកទី១ ក្រុមលេខ១ដល់លេខ៨ ត្រូវប្រកួតគ្នាវិលជុំសន្សំពិន្ទុបន្តទៀត ដើម្បីរកក្រុមជើងឯក គឺក្រុមដែលមានពិន្ទុខ្ពស់ជាងគេពីការប្រកួតទាំង ២ ដំណាក់កាល (ជើងទី១ និងការប្រកួត Top 8) សរុបមាន ១៩ ប្រកួតនោះនឹងក្លាយជាជើងឯកតែម្តង។

រីឯក្រុមមានពិន្ទុតិចដែលឈរពីលេខ ៩ ដល់លេខ ១៣ ត្រូវប្រកួតវិលជុំសន្សំពិន្ទុផងដែរ ហើយក្រុមដែលមានពិន្ទុតិចជាងគេ ក្រោយការប្រកួតបញ្ចប់នឹងត្រូវកាត់ចេញឱ្យទៅលេងនៅលីគ ២។

រូបមន្តនេះត្រូវបានធ្វើម្តងហើយក្នុងឆ្នាំ ២០២០ ប៉ុន្តែកាលនោះ CNCC កំណត់យកត្រឹម Top6 ឱ្យប្រកួតយកពាន និងដាក់ឱ្យក្រុមពីលេខ ៧ ដល់លេខ ១៣ ប្រកួតគ្នា រកក្រុមត្រូវកាត់ចេញ ហើយជាលទ្ធផលក្រុមបឹងកេត ជាម្ចាស់ជើងឯកដោយឈ្នះ ១២ និងស្មើ ៥ មាន ៤១ ពិន្ទុ ខណៈក្រុមយុវជនបាល់ទាត់ជាតិបាទីអាយុក្រោម ១៨ ឆ្នាំ ត្រូវធ្លាក់ ក្រោយនៅបាតតារាងមាន ៧ ពិន្ទុ ដោយឈ្នះ ១ ស្មើ ៤ និងចាញ់ ១៣ ដង។

ទោះបីជាយ៉ាងណាសម្រាប់ជុំទី១ ក្រុមនគរបាលជាតិ នៅសល់៤ប្រកួតក្នុងដៃ ដូច្នេះពួកគេនៅតែមានសង្ឃឹមឈ្នះ និងអាចជៀសផុតពីតំបន់កាត់ចោល បើធ្វើបានល្អនៅជុំទី២។

គួរបញ្ជាក់ថា ក្រុមរបស់លោកកងយ៉ាងនិត ធ្វើបានល្អណាស់ក្នុងការប្រកួតដណ្ដើមពានរង្វាន់បើករដូវកាល Cambodia Airways Pre-season Cup 2021 នៅកីឡដ្ឋានខេមបូឌាំអ៊ែរវេរ។ ពួកគេជាក្រុមជើងឯក និងជើងឯករងបានលើក្រុមអាស៊ីអឺរ៉ុបយូណាយធីត បឹងកេតលេខ៣ និងអគ្គិសនីកម្ពុជាបានលេខ៤៕

អត្ថបទ៖ អ៊ុំ សុភក្តិ