- 2021-08-18 08:57:28
- ព័ត៌មាន
៦៣៦ក្រុម ប្រកួតជម្រុះច្រើនថ្ងៃ ទីបំផុតលីគ MPL KH រកឃើញ៤ក្រុមឡើងវគ្គRegular
- 2021-08-18 08:57:28
- ចំនួនមតិ 0 | ចំនួនចែករំលែក 0
៦៣៦ក្រុម ប្រកួតជម្រុះច្រើនថ្ងៃ ទីបំផុតលីគ MPL KH រកឃើញ៤ក្រុមឡើងវគ្គRegular
ចន្លោះមិនឃើញ
ជើងឯក MPL KH Season 1 ដែលជាព្រឹត្តិការណ៍ប្រកួតកីឡាអេឡិចត្រូនិកលីគអាជីពលំដាប់អន្តរជាតិលើវិញ្ញាសា Mobile Legends: Bang Bang លើកដំបូងបង្អស់នៅក្នុងប្រទេសកម្ពុជាបានស្វែងរកឃើញក្រុមខ្លាំង៤ចេញពីវគ្គជម្រុះឈានឡើងទៅកាន់វគ្គ Regular ហើយ។
MPL KH រដូវកាលទី១ដែលបានរួមចំណែកយ៉ាងសំខាន់ក្នុងការជួយអភិវឌ្ឍ និងជំរុញវិស័យកីឡាអេឡិចត្រូនិកនៅក្នុងប្រទេសឲ្យឈានដល់កម្រិតស្តង់ដារអន្តរជាតិនេះរៀបចំដោយក្រុមហ៊ុន Moonton ដែលជាស្ថាបនិកវិញ្ញាសា Mobile Legends: Bang Bang។ ព្រឹត្តិការណ៍អស្ចារ្យមិនធ្លាប់មាននេះបានបើកដំណើរការចុះឈ្មោះជាផ្លូវការកាលពីថ្ងៃ២៩ ខែកក្កដា ដល់ថ្ងៃទី៦ ខែសីហា។ ដោយវាពិតជាអស្ចារ្យខ្លាំង ដោយសារមានក្រុមចុះឈ្មោះដល់ ៦៣៦ក្រុមឯណោះ។
ក្រុមទាំងអស់ដែលបានចុះឈ្មោះនេះត្រូវបានចម្រាញ់ជ្រើសរើសយកតែ២៥៦ក្រុមប៉ុណ្ណោះដើម្បីប្រកួតក្នុងវគ្គជម្រុះដែលបានដំណើរការរយៈពេល៤ថ្ងៃពោលគឺចាប់ពីថ្ងៃទី៨ ដល់ទី១១ ខែសីហា ដើម្បីស្វែងរកក្រុមខ្លាំងចំនួន១៦។ ក្រុមខ្លាំង១៦ បានបន្តប្រកួតប្រជែងដើម្បីស្វែងរកកៅអីចំនួន៤ដែលមានការផ្សាយផ្ទាល់ចាប់ពីថ្ងៃទី១២ដល់ទី១៥ ខែសីហា។
ទីបំផុតកៅអីក្រុមខ្លាំងទាំង៤ចេញពីវគ្គជម្រុះត្រូវបានរកឃើញហើយគឺក្រុម DG Quantum, FENNEC Esport, Notorious Angels និងក្រុម Walker Esports។ ក្រុម DG Quantum ជាក្រុមមួយត្រូវបានបង្កើតឡើងកាលពីឆ្នាំ២០១៦ និងមានបទពិសោធច្រើនក្នុងការប្រកួត។ សមាជិកក្រុមសំបូរកីឡាករដែលមានបទពិសោធច្រើន និងជោកជាំក្នុងអាជីពកីឡា Esports។
ក្រុម FENNEC Esports ជាក្រុមថ្មីដែលទើបបានបង្កើតឡើង ប៉ុន្តែសមាជិកក្រុមសំបូរបទពិសោធច្រើន ពីព្រោះពួកគេជាអតីតសមាជិកក្រុម Impunity X។ គោលបំណងនៃការបង្កើតក្រុមនេះឡើងគឺដើម្បីចូលរួមប្រកួត MPL KH Season 1 និងក្តីស្រមៃរបស់ពួកគេគឺឈ្នះជើងឯក MPL KH នេះតែម្តង។ ក្រុម Notorious Angels (NA) ជាក្រុមទើបបង្កើតថ្មីដែរ ប៉ុន្តែពួកគេមានសមត្ថភាពល្អមែនទែនក្នុងការប្រកួត MPL KH Season 1 នេះ។
សម្រាប់ក្រុម Walker Esports ត្រូវបានបង្កើតឡើងវិញ បន្ទាប់ពីដឹងថា កម្ពុជាមានព្រឹត្តិការណ៍ប្រកួត MPL KH Season 1 លក្ខណៈអាជីព។ ក្តីស្រឡាញ់ចំពោះកីឡាអេឡិចត្រូនិកជំរុញឲ្យពួកគេចូលរួមប្រកួតព្រឹត្តិការណ៍សំខាន់លើកដំបូងនេះ។
ក្រុមខ្លាំងទាំង៤ខាងលើនេះប្រកួតនៅវគ្គ Regular ជាមួយក្រុមកំពូលខ្លាំង៤ដែលជារៀមច្បង និងមានបទពិសោធច្រើនទាំងការប្រកួតក្នុងស្រុក និងអន្តរជាតិគឺ Impunity KH, SeeYouSoon, NewBlood និង Burn Gaming។ ដូច្នេះនៅវគ្គ Regular នេះមានក្រុមខ្លាំងឈានមុខចំនួន៨ដែលត្រូវប្រកួតប្រជែងគ្នាយ៉ាងខ្លាំងក្លាបំផុត។
នាំមកជូនដោយ MOONTON Games, Smart Axiata និងម្ចាស់ឧបត្ថម្ភ Sting និង NCX Honda ការប្រកួតវិលជុំសន្សំពិន្ទុលក្ខណៈលីគអាជីពនឹងចាប់ដំណើរការពីថ្ងៃទី២៨ ខែសីហា ដល់ថ្ងៃទី១៩ ខែកញ្ញា ឆ្នាំ២០២១។ ក្រុមទទួលបានពិន្ទុលើគេទាំង៦ត្រូវបន្តប្រកួតវគ្គខ្វែងទៀតមុនពេល ប្រកួតវគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រដើម្បីកាត់សេចក្តីរកក្រុមគ្រងជើងឯក MPL KH រដូវកាលទី១នេះដែលនឹងតំណាងឲ្យកម្ពុជាសម្រាប់ចេញទៅប្រកួតលើឆាកអន្តរជាតិ M3 World Championship ចុងឆ្នាំនេះ៕