ឃុន សេងថៃ សង្ឃឹមជាសះស្បើយទាន់ ស្របពេលលីគកំពូលកម្ពុជាផ្អាកបណ្ដោះអាសន្ន

2021-08-05 03:22:57
បាល់ទាត់

2021-08-05 03:22:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែបម្រើឆ្នើមរបស់ក្លឹបបាល់ទាត់អគ្គិសនីកម្ពុជា ឃុន សេងថៃ សង្ឃឹមថាខ្លួននឹងជាសះស្បើយពីជំងឺប្រេះជង្គង់ទាន់ពេលវេលា ស្របពេលការប្រកួតលីគកំពូលកម្ពុជា ត្រូវបានផ្អាកជាបណ្ដោះអាសន្នដោយសារវិបត្តិជំងឺកូវីដ១៩។

ការប្រកាសផ្អាកដំណើរជាបណ្ដោះអាសន្ននេះ ធ្វើឡើងក្រោយប៉ុន្មានថ្ងៃប៉ុណ្ណោះ បន្ទាប់ពីកីឡាករមកពីក្រុងប៉ោយប៉ែត ទទួលបានការវះកាត់ជង្គង់ដោយជោគជ័យកាលពីប្រាំថ្ងៃមុន។

ឃុន សេងថៃ បានប្រាប់ថា ៖«ហ្នឹងហើយបងឃើញព័ត៌មានគេផ្អាក ខ្ញុំសប្បាយចិត្តចង់ស្លាប់ហើយ បើគេផ្អាកមួយខែអីជុំទី២អាចចូលលេងចូលអីបានវិញបង»។

ប្រកួតដណ្ដើមពានរង្វាន់សម្ដេច ហ៊ុន សែន លើកទី១៥ និងលីគកំពូលកម្ពុជាឆ្នាំ២០២១ ត្រូវបានសហព័ន្ធកីឡាបាល់ទាត់កម្ពុជា ប្រកាសផ្អាកបណ្ដោះអាសន្ន ដើម្បីចូលរួមបង្ការ និងទប់ស្កាត់ការរីករាលដាលក្នុងសហគមន៍ នៃជំងឺកូវីដ១៩ ប្រភេទ Delta ចាប់ពីថ្ងៃទី២ សីហា ឆ្នាំ២០២១ រហូតដល់ ថ្ងៃទី១២ សីហា ឆ្នាំ២០២១ ជាបណ្ដោះអាសន្ន។

គួរបញ្ជាក់ថា ក្រោយពីវះកាត់រួចរាល់ហើយកាលពីពេលថ្មីៗនេះ ឃុន សេងថៃ ត្រូវការសម្រាកព្យាបាលរយៈពេលមួយឬពីរខែទើបជាសះស្បើយ៕

អត្ថបទ៖ អ៊ុំ សុភក្តិ