ហេតុផលសំខាន់២នេះធ្វើឲ្យភ្នំពេញក្រោន អាចមានភាគរយច្រើនជាងវិសាខា

2021-07-23 07:44:25
បាល់ទាត់

2021-07-23 07:44:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបាល់ទាត់ភ្នំពេញក្រោន នឹងបើកទ្វារផ្ទះរបស់ខ្លួនស្វាគមន៍ក្រុមខ្លាំង វិសាខា សម្រាប់ការប្រកួតលីគកំពូលកម្ពុជាសប្ដាហ៍ទី១០ស្អែកនេះនៅទឹកដី RSN វេលាម៉ោង៦ល្ងាច។ យ៉ាងណាជំនួបនេះប្រិយមិត្តពិតជាដឹងហើយថា ពិតជាសំខាន់សម្រាប់ក្រុមទាំងពីរ ប៉ុន្តែក្រោមហេតុផលពីរនេះទំនងជាអាចឲ្យភ្នំពេញក្រោនមានប្រៀបជាងវិសាខា។

១-ពិន្ទុបច្ចុប្បន្ន៖ បើមើលទៅលើពិន្ទុភ្នំពេញក្រោនមាន១៦ពិន្ទុចាញ់វិសាខា២ពិន្ទុ ប៉ុន្តែពួកគេនៅសល់២ប្រកួតក្នុងដៃ ដែលពីរប្រកួតនោះសុទ្ធតែប៉ះក្រុមដែលគេអាចមានសង្ឃឹមយកបាន៣ពិន្ទុបើមើលទៅលើកម្រិតសមត្ថភាពបច្ចុប្បន្នគឺទ័ព និងប៉ូលីស ដូច្នេះឱកាសកាន់កាប់កំពូលតារាងសម្រាប់ក្រោនមិនលំបាកឡើយ។ បើមើលទៅលើពិន្ទុនេះភ្នំពេញក្រោនគ្រាន់តែលេងការពារហើយវាយបក នឹងកាន់តែមានភាពងាយស្រួលសម្រាប់ពួកគេ ពីព្រោះប្រិយមិត្តបានដឹងហើយថា កម្រិតនៃការវាយបករបស់ភ្នំពេញក្រោនល្អកម្រិតណា។ ពោលគឺការវាយបកមានភាពលឿន និងច្បាស់។ ការលេងមិនប្រឹងប្រយុទ្ធដៃគូ រង់ចាំឱកាសវាយបកនេះអាចថាជាការចំណេញមួយយ៉ាងច្រើនសម្រាប់ក្រុមភ្នំពេញក្រោនបាត់ទៅហើយ។

២-កត្តាទីលាន៖ ចំណុចនេះក៏សំខាន់ផងដែរ ពីព្រោះទីលានដែលកីឡាករហ្វឹកហាត់រាល់ថ្ងៃអាចនិយាយបានថា ចង់មិនចង់កីឡាករនឹងយល់ដឹងច្បាស់ពីកម្រិតស្មៅ និងខ្យល់អាកាសជុំវិញខ្លួន។ វាអាចបង្កើនភាពងាយស្រួលក្នុងការបោះបាល់ឲ្យគ្នាទៅវិញទៅមក។

ទាក់ទងការប្រកួតខាងលើនេះដែរកីឡាករ កែវ សុខផេង របស់វិសាខាក៏បានបង្ហាញចំណាប់អារម្មណ៍ថា ជាការប្រកួតដ៏សំខាន់ ពីព្រោះក្រុមរបស់គេបានតាំងចិត្តរួចហើយថា នឹងឈ្នះការប្រកួតចំនួន៤ ដែលនៅសល់សម្រាប់ជើងទី១ មិនថាការប៉ះក្រុមណាឡើយ។ ហេតុផលគឺជាដំណើរទៅកាន់ជើងឯក ដែលគេខានឈ្នះ៣ឆ្នាំមកហើយ។

ចំណែកខាងភ្នំពេញក្រោនលោក Oleg គ្រូបង្វឹកបានឲ្យដឹងដែរថា វិសាខាជាក្រុមដែលលេងមានការគ្រប់គ្រងបាល់ល្អ មានកីឡាករល្អច្រើន។ លោកមើលឃើញថា វិសាខា ក៏ជាក្រុមដែលមានការរៀបចំបានល្អ និងបង្ហាញចេញនូវការលេងបានល្អ ព្រមទាំងមានការប្រកួតប្រជែងខ្ពស់។

និយាយពីប្រវត្តិប៉ះគ្នាវិញគិតចាប់ពីឆ្នាំ២០១៨មកសម្រាប់ការប្រកួតផ្លូវការមិនដែលឈ្នះវិសាខាឡើយ ក្នុងចំណោមការប៉ះគ្នាចំនួន៦លើកពោលគឺវិសាខាឈ្នះ៣និងស្មើគ្នាចំនួន៣លើក៕

អត្ថបទ៖ ស្រី សុវណ្ណដារ៉ា