ក្រុមលោក សុក វាសនា ពឹងលើ៣ ចំណុចនេះ ទើបអាចឈ្នះប៉ូលិស ៣-២

2021-03-29 05:00:11
បាល់ទាត់

2021-03-29 05:00:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមម្ចាស់ផ្ទះអាស៊ីអឺរ៉ុបយូណាយធីត បានយកឈ្នះក្រុមនគរបាលជាតិ ៣-២ ក្នុងសប្ដាហ៍ទី៤នៃក្របខ័ណ្ឌលីគកំពូលកម្ពុជារដូវកាលឆ្នាំ២០២១។ នេះជាជ័យជម្នះដំបូងរបស់ក្រុមលោក សុក វាសនា ខណៈពីរប្រកួតកន្លងមកមិនទាន់ស្គាល់ពាក្យថាឈ្នះឡើយ។

បើតាមសម្ដីលោក សុក វាសនា ជាគ្រូបង្គោលក្រុមម្ចាស់ផ្ទះ ការឈ្នះលើកនេះគឺដោយ សារក្រុមរបស់លោក ពឹងផ្អែកលើកត្តាស្មារតី ការកែប្រែប្រព័ន្ធលេង និងសំណាង។

បងប្រុសបង្កើតរបស់ខ្សែប្រយុទ្ធ សុក ច័ន្ទរស្មី ពន្យល់ថា៖« តាមពិតក្រោយពី Pre-season មក យើងដឹងគុណភាពរបស់គេយ៉ាងម៉េច យើងក៏ខ្វះខាតគេក៏ខ្វះខាតដូចគ្នា មានការខ្វះខាតជាច្រើន។ ហើយណាមួយវិញសម្រាប់ការប្រកួតកន្លងមកយើងកម្រឈ្នះគេណាស់ មានតែស្មើនិងចាញ់ ហើយដូចេ្នះយើងខំពង្រឹងពាក់ព័ន្ធទៅលើសា្មរតីទី១។ ទី២យើងកែប្រព័ន្ធលេងមួយចំនួន យើងការពារច្រើនហើយវាយបក។ ទី៣គឺយើងពឹងលើសំណាងផងដែរ។ ការប្រកួតកន្លងមកយើងមាន ឱកាសច្រើន តែយើងគ្មានសំណាងក្នុងការបញ្ចប់ទីបានល្អ ចឹងហើយធ្វើឲ្យយើងបរាជ័យពីរប្រកួតជាប់គ្នា»។

ចំពោះការប្រកួតជាមួយក្រុមនគរបាលជាតិកាលពីពេលថ្មីៗលោកគ្រូ សុក វាសនា ឃើញថាកូនក្រុមរបស់លោកមានស្មារតីល្អប្រសើរជាងមុន និងស្ដាប់តាមការណែនាំរបស់លោក។ ម្យ៉ាងទៀតទោះក្រុមលោកមានឱកាសតិចក្ដី ប៉ុន្តែមានសំណាងស៊ុតបញ្ចូលទីបានល្អ ដូច្នេះហើយទើបក្រុមទទួលបានជ័យជម្នះ។

បើទោះទទួលបាន៣ពិន្ទុនៅកីឡដ្ឋាន អេ.អ៊ី.យូ. ស្ពតផាក ប៉ុន្តែគ្រូបង្គោលរូបនេះនឹងកែចំណុចខ្វះខាតមួយចំនួនដូចជា ឲ្យកីឡាករបម្រុងបានចូលលេងនៅចុងម៉ោង ដើម្បីស្រង់យកបទពិសោធ និងឲ្យក្រុមទាំងមូលពង្រឹងស្មារតីរឹងពឹងនៅ១៥នាទីចុងក្រោយ ដើម្បីកុំឲ្យរបូតគ្រាប់ និងលេងបាល់ខ្លីឲ្យច្រើននៅតំបន់ការពារ ដើម្បីរំដោះបាល់ចេញ។

អតីតគ្រូបង្វឹកថ្នាលយុវជនក្លឹបព្រះខ័នរាជស្វាយ រៀង អាយុក្រោម១៩ឆ្នាំខាងលើយល់ថា រដូវកាលនេះក្លឹបអាស៊ីអឺរ៉ុបយូណាយធីត ធ្វើបានល្អជាងឆ្នាំមុនៗ ហើយលោកក៏បានប្ដេជ្ញាខំប្រឹងប្រែងដឹកនាំក្រុមឲ្យទទួលបានចំណាត់ថ្នាក់ល្អ។

គួរបញ្ជាក់ថា ពីររដូវកាលកន្លងមកនេះ ក្លឹបបាល់ ទាត់តំណាងសាកលវិទ្យាល័យអាស៊ីអឺរ៉ុប មិនដែលឈ្នះលើក្រុមរបស់លោក អ៊ុង កងយ៉ានិត នៅឡើយទេ ពោលគឺចាញ់ ៣ និងស្មើ ១៕

រូបភាព៖ ក្លឹបអាស៊ីអឺរ៉ុប

អត្ថបទ៖ អ៊ុំ សុភក្តិ