មកដឹងមូលហេតុ សេង កុសែន ចូលរួមជាមួយនគរបាលជាតិ

2020-09-22 08:08:58
បាល់ទាត់

2020-09-22 08:08:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងកិច្ចសម្ភាសន៍ជាមួយ Sabay ប៉ុន្មាននាទីមុននេះ សេង កុសែន បានឱ្យដឹងថារូបគេ ចង់លេងបាល់ទាត់នៅក្របខ័ណ្ឌលីគកំពូលកម្ពុជាពីរទៅបីឆ្នាំទៀត ទើបសម្រេចចូលរួមក្លឹបនគរបាលជាតិជាថ្មី ក្រោយក្លឹបសិង្ហក្រហមភ្នំពេញក្រោន បញ្ចប់កិច្ចសន្យាកាលពីដើម ខែកុម្ភៈ ឆ្នាំ២០២០ ដោយសារគេមិនគោរពតាមបទបញ្ជារផ្ទៃក្នុង ប្រាសចាកពីក្រមសីលធម៌ និងគោលការណ៍ការងាររបស់ក្លឹប។

ហេតុផលមួយទៀត ដែលអតីតខ្សែការពារបឹងកេត ជ្រើសយកក្លឹបនគរបាលជាតិ ព្រោះគេយល់ឃើញថា ថ្នាក់ដឹកនាំក្លឹបមានការយកចិត្តទុកដាក់ដល់កីឡាករ និងជាក្លឹបមានការរៀបចំល្អមួយដែរ។

អតីតកីឡាករក្លឹបអាស៊ីអឺរ៉ុប កុសែន បានសង្កត់ធ្ងន់បែបនេះ ៖«ហេតុដែលខ្ញុំសម្រេចចិត្តចូលលេងលីគវិញ ព្រោះតែខ្ញុំចង់លេង MCL ២-៣ឆ្នាំទៀត ហើយចំណុចពិសេសនោះ (ជ្រើសក្លឹប) គឺថ្នាក់ដឹកនាំគាត់យកចិត្តទុកដាក់ ដល់កីឡាករមែនទែន ហេីយក្លឹបនគរបាលជាតិជាក្លឹប ដែលមានការរៀបចំល្អដែរ»។

មុនត្រឡប់មកប្រឡូកក្នុងលីគកំពូលកម្ពុជាវិញ អតីតខ្សែការពារបឹងកេត ក៏ធ្លាប់ត្រូវបានក្លឹបពាក់កណ្ដាលអាជីព ISI ទាក់ទងដែរ ប៉ុន្តែយ៉ាងណាកីឡាករវ័យ២៩ឆ្នាំ បានសម្រេចចិត្តជ្រើសក្លឹបនគរបាលជាតិ ដើម្បីបន្តដង្ហើមអាជីពរបស់ខ្លួន។

កីឡាករមានដើមលកំណើតនៅភ្នំពេញ បានពន្យល់ថា ៖«SI ចង់បានខ្មុំណាស់បង! តែខ្ញុំសម្រេចចិត្តមកលេងលីគម្ដងទៀត...ខ្ញុំជួបមនុស្សជាច្រើនដែលគេនិយាយថា ហេតុអីមិនព្រមចូលលេងអាជីពវិញ ខ្ញុំថាខ្ញុំនឹងចូលលេងវិញ ព្រោះសមត្ថភាពខ្ញុំនៅមាន»។

ការចូលរួមជាថ្មីនេះដែរ កុសែន បានតាំងចិត្តខិតខំធ្វើឱ្យបានល្អ ដើម្បីជួយក្រុមឱ្យទទួលបានចំណាត់ថ្នាក់ល្អនៅជុំទី២ ក៏ដូចជាឆ្នាំក្រោយៗទៀត ហើយគេតែងតែលួចហ្វឹកហាត់ខាងក្រៅបន្ថែម បន្ទាប់ពីហាត់នៅក្លឹប ដើម្បីពង្រឹងសមត្ថភាពឱ្យកាន់តែល្អប្រសើរ។

គួរបញ្ជាក់ថា សេង កុសែន ធ្លាប់លេងឱ្យក្លឹបជាច្រើនរួមមានក្លឹបជើងទឹក គីរីវង់សុខសែនជ័យ បៀលប្រាយយូណាធីត ត្រាយអាស៊ី អាស៊ីអឺរ៉ុប សុីម៉ាក់ វេស្ទើន សូលទីទ្បូអង្គរ បឹងកេត ភ្នំពេញក្រោន និងបច្ចុប្បន្ននគរបាលជាតិ (ខែកញ្ញា ឆ្នាំ២០២០)។ គេលេងបាន២ប្រកួតហើយ ក្នុងរដូវកាលឆ្នាំ២០២០នេះ៕

អត្ថបទ៖ អ៊ុំ សុភក្តិ