ទឹកចិត្តសង្សារ! គ្រាន់តែឃើញ ចាន់ចាវ ត្រូវ១ជង្គង់សន្លប់ស្ដូក អ៊ែលឡា ទន់ជើងដួលគ្រឹប

2020-09-10 02:06:26
បាល់ទាត់

2020-09-10 02:06:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្តស្នេហាវិស័យកីឡាកបាល់ទាត់ ប្រហែលនៅចាំមិនភ្លេចទេ ចំពោះទិដ្ឋភាពតក់ស្លុតមួយគឺ ជួន ចាន់ចាវ បានដួលសន្លប់ស្ដូកស្ដឹង ក្រោយត្រូវមួយជង្គង់ពេញទំហឹងរបស់មិត្តរួមក្រុម Timothy ក្នុងជំនួបភ្នំពេញក្រោនឈ្នះម្ចាស់ផ្ទះ ព្រះខ័នរាជស្វាយរៀង ២-១ កាលពីសប្ដាហ៍ទី១៤ នៃការប្រកួតដណ្ដើមពានរង្វាន់លីគកំពូលកម្ពុជារដូវកាលឆ្នាំ ២០២០។

ទិដ្ឋភាពនេះបានធ្វើឱ្យកញ្ញា រតនា ហៅ អ៊ែលឡា ត្រូវជាគូសង្សាររបស់ខ្សែបម្រើកណ្ដាលក្លឹបភ្នំពេញក្រោន ដែលកំពុងទស្សនាការ Live ផ្ទាល់នៅភ្នំពេញជាមួយក្រុមគាំទ្រ The Red ភ័យតក់ស្លុតទន់ជើងដួលលើដីភ្លាមៗតែម្ដង។

អ៊ែលឡា បានសង្កត់ធ្ងន់ថា ៖«ពេលហ្នឹងគ្រាន់តែឃេីញប៉ះគ្នាភ្លាម ខ្ញុំស្រែកហេីយទន់ជេីងដួលទៅដីម៉ងបង ពេលនិងមេីលឡាយជុំបងៗ The red បានពួកគាត់ជួយ ព្រោះពេលហ្នឹងខ្ញុំអត់ហ៊ានមេីលឡាយបន្តទេ ព្រោះភ័យផងយំផង ជិតសន្លប់ អ្វីដែលពិបាកបំផុតគឺ នៅពេលដែលគាត់ត្រូវរបួស ខ្ញុំមិនអាចជួយអ្វីបានថែមទាំងនៅឆ្ងាយទៀត។ អារម្មណ៍ពេលហ្នឹង ពិបាកពន្យល់ណាស់បង ស្ដែងៗនិងភ្នែកពេក ពិបាកទទួលយក អារម្មណ៍ឈឺចាប់បែបហ្នឹង។ រាល់ពេលដែលគាត់ត្រូវប្រកួតម្ដងៗ ខ្ញុំខំប្រឹងទប់អារម្មណ៍ណាស់ ខ្លាចប៉ះទង្គិចគ្នា»។

អ្វីធ្វើឱ្យ អ៊ែលឡា កាន់តែព្រួយបារម្ភខ្លាំងនោះគឺ អំឡុងពេលប៉ះទង្គិច ការផ្សាយផ្ទាល់ (Live) ក៏ត្រូវបានកាត់ផ្ដាច់ ធ្វើឱ្យនាងហូរទឹកភ្នែកមិនឈប់ ទោះមានអ្នកប្រាប់ថា ជួន ចាន់ចាវ លែងអីក៏ដោយ។

កញ្ញាបន្ថែមបែបនេះ ៖«រូបភាពនៅជាប់នឹងភ្នែក ធ្វេីចិត្តភ្លាមៗមិនបានទេ ទឹកភ្នែកហូរមករហូត ទោះបីមានអ្នកប្រាប់ថាគាត់លែងអី។ សំណាងដែរពេលប៉ះទង្គិចភ្លាមៗ បានកីឡាកររួមក្រុមឱ្យដៃខាំ កុំអីមិនដឹងថាទៅជាម៉េចទេបង»។

មកទល់នឹងពេលនេះ ខ្សែបម្រើកណ្ដាលរបស់ក្លឹបសឹង្ហក្រហម បានធូរស្បើយច្រើនហើយនៅឡើយឈឺមាត់ ព្រោះបែកធំ ហើយក៏អាចចូលហ្វឹកហាត់វិញដែរ។

គួរបញ្ជាក់ថាកញ្ញា អ៊ែលឡា និងកីឡាករ ជួន ចាន់ចាវ បានរាប់អានស្រលាញ់គ្នា អស់រយៈពេល ១ឆ្នាំ ៦ខែហើយ គិតមកទល់ពេលនេះ៕