ប្រសើរណាស់! ចាប់ពីឆ្នាំ២០២១ កម្ពុជានឹងបាន២កៅអីនៅ AFC Cup

2020-07-22 02:17:57
បាល់ទាត់

2020-07-22 02:17:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ចាប់ពីឆ្នាំ២០២១តទៅ ក្លឹបបាល់ទាត់ពីរនៅកម្ពុជា នឹងមានសិទ្ធិចូលរួមប្រកួតពានរង្វាន់ AFC Cup ខណៈពីមុននិងបច្ចុប្បន្នមានតែកន្លះកៅអីប៉ុណ្ណោះ ហើយត្រូវឆ្លងកាត់វគ្គ Play-Off មុនដល់វគ្គចែកពូលសន្សំពិន្ទុ។

មួយកៅអីរបស់ក្លឹបនៅកម្ពុជា នឹងចូលទៅវគ្គចែកពូលដោយស្វ័យប្រវត្តិ ពោលគឺបានទៅលើក្លឹបអ្នកជើងឯកលីគកំពូលកម្ពុជា MCL និងមួយកៅអីទៀត សម្រាប់ក្រុមជើងឯកពានរង្វាន់ Hun Sen Cup ថ្នាក់ជាតិ ប៉ុន្តែត្រូវឆ្លងកាត់វគ្គ Play-Off។

ដើម្បីទទួលបានកៅអីទៅកាន់ការប្រកួតកម្រិតទ្វីបនេះ បេក្ខជនទាំងអស់ ត្រូវបំពេញបានលក្ខខណ្ឌអាជ្ញាប័ណ្ណក្លឹបអន្តរជាតិឬ AFC Club Licensing 2020 ជាមុនសិន។ ក្នុងករណីមិនអាចបំពេញបានទេ សិទ្ធិចូលរួម នឹងត្រូវប្រគល់ទៅឲ្យក្រុមស្ថិតនៅចន្លោះលេខ ២ដល់លេខ៦នៃក្របខណ្ឌ MCL។

ដោយឡែកសម្រាប់ក្រុមណាមួយ ដែលឈ្នះទាំង MCL និងពានសម្ដេចតេជោ ហ៊ុន សែន ថ្នាក់ជាតិ នោះកៅអីវគ្គ Play-Off ត្រូវផ្ដល់ទៅក្រុមរងជើងឯកលីគកំពូល។

គួរបញ្ជាក់ថា កម្ពុជាទទួលបានសិទ្ធិចូលរួមការប្រកួតពានរង្វាន់ AFC Cup លើកដំបូងនៅឆ្នាំ២០១៧ ហើយក្លឹបតំណាងកម្ពុជា ដែលកំពុងប្រកួតប្រជែងនៅវគ្គ Play-Off រដូវកាល២០២០នេះ គឺព្រះខ័នរាជស្វាយរៀង ស្ថិតនៅពូល G៕

ប្រភព៖ CNCC

អត្ថបទ៖ អ៊ុំ សុភក្តិ