សុន វណ្ណដេត៖ ខ្ញុំសម្រេចបំណងបីនេះ គឺគ្រប់គ្រាន់ហើយ

2020-07-09 06:25:10
បាល់ទាត់

2020-07-09 06:25:10
ចំនួនមតិ 0 | ចំនួនចែករំលែក 0

ចន្លោះមិនឃើញ

កើតចេញពីយុវជនជម្រើសខេត្តកោះកុង រហូតក្លាយជាកីឡាករអាជីពដូចបច្ចុប្បន្ន សុន វណ្ណដេត គ្មានមហិច្ឆតាអ្វីទៀតទេ ក្រោយរូបគេសម្រេចបានបំណងបីរួមមានបានលេង ជម្រើស១១នាក់ដំបូងនៅក្លឹបអាជីព (នគរបាលជាតិ) ជាប់ U16 ជម្រើសជាតិកម្ពុជា និងជម្រើសជាតិឈុតធំ។

សុន វណ្ណដេត (ស) (រូបភាពក្លឹបនគរបាលជាតិ)

វណ្ណដេត បានរំលឹកថា ៖«...ដំបូងឡើយយើងគ្រាន់តែលេងយុវជននៅខេត្ត ហើយយើងក៏ជាប់ជម្រើសខេត្ត លេងកាលហ្នឹងលេង U15...យើងក៏បានបង្ហាញ U15...កាលហ្នឹងលេងយុវជនទូទាំងប្រទេសនៅភ្នំពេញនៅចែងម៉ែង ប្រហែលអំឡុងឆ្នាំ ២០០៩-២០១០ មានអារម្មណ៍ថាចង់ជាប់ក្លឹប...ពេលក្រោយមកមានក្លឹបនគរបាលជាតិទាក់ទងយើង និងណាហ្គា ខ្ញុំក៏សម្រេចចិត្តមកនគរបាលជាតិ ព្រោះមានបងបងនៅកោះកុងជាមួយអ៊ីចឹង យើងស្រណុកទំនាក់ទំនងជាមួយគាត់...»។

មកលេង និងហាត់ជាមួយក្រុមនគរបាលជាតិ សុន វណ្ណដេត ក៏បានធ្វើតេស្តជាប់ជម្រើសជាតិ យុវជនអាយុក្រោម១៦ឆ្នាំ ដូចក្ដីបំណងក្នុងអំឡុងឆ្នាំ២០១១។

អ្នកខេត្តកោះកុងប្រាប់ថា ៖«ហាត់បាន១ឆ្នាំខ្ញុំចង់ជាប់ U16 ហើយក៏បានជាប់។ ហ្នឹងជាគោលបំណងរបស់យើង។ ក្រោយមកខ្ញុំចង់លេង១១នាក់ ហើយក៏បានលេង និងបានជាប់ជម្រើសជាតិចាប់តាំងពីឆ្នាំ២០១៥ រហូតដល់២០១៧ ហើយ២០១៨ ទើបអត់បានជាប់វិញ។ ខ្ញុំសម្រេចបំណងបីនេះ គឺគ្រប់គ្រាន់ហើយ»។

ចំពោះការទៅលេងនៅក្លឹបក្រៅប្រទេសវិញ ខ្សែប្រយុទ្ធវ័យ២២ឆ្នាំដែលជួយឱ្យក្លឹបនគរបាលជាតិ លើកពាន Hun Sen Cup ១រដូវកាល បានបញ្ជាក់យ៉ាងច្បាស់ថា គេមិនធ្លាប់គិតសូម្បីតែបន្តិច ព្រោះសមត្ថភាពរបស់គេនៅមានកម្រិត ហើយណាមួយគុណភាពកីឡាករនៅតំបន់អាស៊ី គឺល្អៗច្រើនមិនងាយប្រជែង ដូច្នេះមានតែលេងនៅលីគប្រទេសកំណើតតែប៉ុណ្ណោះ៕

អត្ថបទ៖ អ៊ុំ សុភក្តិ