ពៅ ភារិទ្ធិ សប្បាយចិត្តពេលពាក់ផ្លាកប្រធានក្រុមបញ្ជាលើទីលាន

2020-07-01 07:33:38
បាល់ទាត់

2020-07-01 07:33:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែបម្រើរបស់ក្លឹបបាល់ទាត់អង្គរថាយហ្គឺរ បានបង្ហាញអារម្មណ៍សប្បាយចិត្ត ក្រោយរូបគេបានក្លាយជាប្រធានក្រុមក្នុងឆ្នាំនេះ ខណៈពីមុនតំណែងនេះ ហែម ស៊ីម៉ៃ (បច្ចុប្បន្នគ្រូយុវជនវិសាខា) និង Okereke Timothy (បច្ចុប្បន្នកីឡាករភ្នំពេញក្រោន) ជាអ្នករ៉ាប់រង។

រូបភាព CNCC

ពៅ ភារិទ្ធិ ពន្យល់ថា ៖«មានអារម្មណ៍ថាសប្បាយចិត្តខ្លាំងណាស់ ដែលគ្រូនិងមិត្តរួមក្រុម បោះឆ្នោតឱ្យខ្ញុំបានធ្វើជាប្រធានក្រុមបែបនេះ ហើយជាប្រធានក្រុមយើងត្រូវដើរជួួរមុខ ស្រែកបញ្ជារក្រុម ហើយជាពិសេសគោរពតួនាទីរបស់យើង»។

ថ្វីបើជាប់តំណែងប្រធានក្រុមមែន ប៉ុន្តែភារិទ្ធិទម្លាយថាវាមិនសំខាន់ឡើយ និងជារឿងធម្មតាសម្រាប់ខ្លួន ហើយអ្វីដែលគេចង់បាននោះគឺក្រុមទទួលបានជ័យជម្នះ ចេះស្រឡាញ់ និងគោរពគ្នាទៅវិញទៅមក។

បើតាមសម្ដីរបស់ ភារិទ្ធិ មូលហេតុដែលគ្រូ និងមិត្តរួមក្រុមជ្រើសរើសឱ្យធ្វើប្រធានក្រុម ប្រហែលជាគេមានបទពិសោធន៍ច្រើន គោរពតួនាទី ចេះជួយក្រុម លើកទឹកចិត្តក្រុម ពន្យល់ប្រាប់ពេលកូនក្រុមមានអារម្មណ៍មិនល្អ និងមិនឆេវឆាវ។ ក្រុមអង្គរថាយហ្គឺរបច្ចុប្បន្ន តំណែងប្រធានក្រុមមានពីរនាក់គឺ ពៅ ភារិទ្ធិ និងខ្សែការពារ ឈុំ ភីហ្សា។

គួរបញ្ជាក់ថា ពៅ ភារិទ្ធិ ដំបូងឡើយលេងនៅក្លឹប ឆ្មាខ្មៅខេត្តស្វាយរៀង។ ឆ្នាំ ២០១១ គេចេញទៅក្លឹបគីរីវង់សុខសែនជ័យ ប៉ុន្តែលេងបានតែពាក់កណ្ដាលជុំទីមួយប៉ុណ្ណោះ។ ចុងឆ្នាំ ២០១១ គេផ្លាស់ក្រសួងការពារជាតិនៅជុំទីពីរ។

នោះក៏ជាពេលដែលគេជាប់ជម្រើសជាតិ U21និង U23 ក្នុងឆ្នាំ២០១១ និង ២០១២ ហើយឆ្នាំ២០១៣ គេជាប់ U22។ ទម្រង់លេងកើនឡើង គេក៏ជាប់ជម្រើសជាតិឈុតធំ ក្នុងឆ្នាំ២០១៦។ ឆ្នាំ២០១៧ ក្លឹបអង្គរថាយហ្គឺរ បានខ្ចីជើងគេពីក្រសួងការពារជាតិក្នុងរយៈពេលមួយឆ្នាំ ហើយឆ្នាំ២០១៨ ភារិទ្ធិ ចេញទៅវិសាខា។ លេងបានមួយជុំ ភារិទ្ធិ ក៏ផ្លាស់មកក្លឹប អង្គរថាយហ្គឺររហូតដល់សព្វថ្ងៃ៕

អត្ថបទ៖ អ៊ុំ សុភក្តិ