Leeds រងការរិះគន់យ៉ាងខ្លាំង ក្រោយដាក់រូប Bin Laden នៅកន្លែងអ្នកគាំទ្រ

2020-06-25 11:20:11
ព័ត៌មាន

2020-06-25 11:20:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លឹបលីគលំដាប់ទី២ អង់គ្លេស Leeds United រងការរិះគន់យ៉ាងខ្លាំងពីសំណាក់ក្រុមអ្នកគាំទ្ររបស់ខ្លួន បន្ទាប់ពីដាក់រូបអតីតមេភេរវកម្មជនជាតិអារ៉ាប៊ីសាអ៊ូឌីត Osama Bin Laden នៅកន្លែងអង្គុយអ្នកគាំទ្រកាលពីថ្ងៃសៅរ៍ ពេលប្រកួតរវាងក្លឹប Leeds ប៉ះនឹងក្លឹប Fulham។

ហេតុការណ៍នេះកើតឡើង ក្រោយមានអ្នកគាំទ្រម្នាក់ប្រទះឃើញរូបរបស់ខ្លួន ដាក់ជិត Bin Laden។ រឿងនេះដែរធ្វើឲ្យបុរសអ្នកគាំទ្រនោះខឹងសម្បារយ៉ាងខ្លាំង។

តាមសារព័ត៌មានធំៗមួយចំនួនបានឲ្យដឹងថា អ្នកគាំទ្រអាចដាក់តាំងរូបនៅកន្លែងទស្សនាបាល់ទាត់ ដោយចំណាយទឹកប្រាក់ចំនួនជាង ៣០ដុល្លារ។ បន្ទាប់ពីមានហេតុការណ៍នេះកើតឡើង ខាងក្លឹបបានដករូប Bin Laden ភ្លាមៗ ហើយអ្នកនាំពាក្យ Leeds បានសន្យាថានឹងត្រួតពិនិត្យការបញ្ចូលរូបឲ្យបានដិតដល់ជាងនេះ។

គួរបញ្ជាក់ផងដែរថា Bin Laden បានជាប់ពាក់ព័ន្ធនឹងភេរវកម្ម ៩/១១ នៅសហរដ្ឋអាមេរិក ដែលជាឧបទ្ទវហេតុយន្តហោះបុកអគារភ្លោះពាណិជ្ជកម្មនៅទីក្រុងញូវយ៉ក កាលពីថ្ងៃទី១១ ខែកញ្ញា ឆ្នាំ២០០១។ លោកត្រូវបានកងទ័ពអាមេរិកតាមរករាប់ឆ្នាំ រហូតដល់ឆ្នាំ២០១១ លោកត្រូវបានទាហានអាមេរិករកឃើញ និងប្រហារជីវិតនៅប្រទេសប៉ាគីស្ថាន៕

ប្រភព៖ Marca ប្រែសម្រួល៖ ហ៊ីម រស្មី