ប្រាក់ សុវណ្ណារ៉ា៖ លីគឆ្នាំនេះយើងមិនប្រជែង ដណ្ដើមយក Top 4 ទេ

2020-04-20 05:58:59
បាល់ទាត់

2020-04-20 05:58:59
ចំនួនមតិ 0 | ចំនួនចែករំលែក 0

ចន្លោះមិនឃើញ

លោកគ្រូបង្គោលក្លឹបបាល់ទាត់ អគ្គស្នងការនគរបាលជាតិ ប្រាក់ សុវណ្ណារ៉ា បានបញ្ជាក់ពីទិសដៅឆ្នាំនេះក្លឹបរបស់លោក មិនប្រជែងដណ្ដើមយក Top 4 ឡើយ ដោយផ្អែកលើហេតុផលមួយចំនួន និងគោរពតាមចក្ខុវិស័យរបស់ក្លឹប។

លោកគ្រូ ប្រាក់ សុវណ្ណារ៉ា (ឆ្វេង) ក្នុងសន្និសីទ្ធសារព័ត៌មានមុនប៉ះបឹងកេតកាលពីពេលកន្លងទៅ

ការកំណត់គោលដៅត្រឹមលេខ៧ ក្នុងលីគកំពូលកម្ពុជាក្នុងឆ្នាំនេះ ព្រោះគ្រូបង្វឹកកម្រិត Pro License មើលឃើញថា បណ្ដាក្លឹបធំៗរៀបចំបានល្អប្រសើរ ខណៈកីឡាករខ្មែរ-បរទេសរបស់ក្លឹបនគរបាលជាតិ ទៀតសោតនៅមានកម្រិត ដូច្នេះក្លឹបពិបាកប្រជែងយក Top 4។

អតីតគ្រូបឹងកេតបញ្ជាក់៖ «យើងសម្លឹងមើលឃើញក្លឹបធំៗ ដែលការរៀបចំរបស់គេវាល្អប្រសើរ។ យើងដឹងហើយក្លឹបធំៗទាំងប៉ុន្មានក្លឹបហ្នឹង មិនអ៊ីចឹងអ្ហី! ដូច្នេះមានក្លឹបផ្សេងទៀត ដែលយើងត្រៀមប្រជែងជាមួយដូចជា សូលទីឡូអង្គរ អង្គរថាយហ្គ័រ និងគិរីវង់សុខសែនជ័យ ជាដើម។ ទី២ យើងដឹងហើយថា កីឡាករល្អៗទាំងខ្មែរបរទេស សម្រុកទៅរកក្លឹបល្បី ខាងនគរបាលជាតិមិនទាន់ដល់កម្រិតហ្នឹងទេ»។

ចំណែកគោលការណ៍ បើតាមការឱ្យដឹងរបស់លោកគ្រូ ប្រាក់ សុវណ្ណារ៉ា ក្លឹបបានដាក់ផែនការបីឆ្នាំ ដើម្បីពង្រឹងសមត្ថភាព ប្រជែងដណ្ដើមយក Top 4 វិញ ជាក់ស្ដែងក្លឹបនគរបាលជាតិបានរុះរើកីឡាករ និងរចនាសម្ព័ន្ធការងារទ្រង់ទ្រាយធំកាលពីឆ្នាំទៅមិញ។

«យើងមានផែនការច្បាស់លាស់ សម្រាប់ធ្វើការងារហ្នឹង យើងដាក់ផែនការបីឆ្នាំ ដើម្បីឱ្យក្លឹបឈានទៅដល់ Top 4។ កាលពីឆ្នាំទៅមិនបានន័យថា យើងបរាជ័យទេ គ្រាន់ជាការចាប់ផ្ដើមដំបូងនៃការកែប្រែរចនាសម្ព័ន្ធការងារ។ អ្វីក៏ដោយយើងត្រូវការពេលវេលា យើងមិនចេះធ្វើទៅតាមអារម្មណ៍របស់យើង តាមចិត្តយើងចង់បានទេ»។

តាមសម្ដីរបស់លោក ប្រាក់ សុវណ្ណារ៉ា កីឡាករ ក្លឹប រួមទាំងលោកផ្ទាល់ បានតែនឹងកំពុងខិតខំប្រឹងប្រែងធ្វើតាមគោលការណ៍ ហើយលោកជឿជាក់ឆ្នាំក្រោយនេះ ក្លឹបនគរបាលជាតិ នឹងកាន់តែធ្វើបានល្អ។

អតីតគ្រូជម្រើសដដែលពន្យល់ថា៖ «យើងឃើញហើយតើ ការប្រកួតជាមួយក្លឹបធំៗជួបជាមួយ វិសាខា ណាហ្គា និងបឹងកេត យើងបានបង្ហាញពីកម្រិតដែលយើងលេងហើយ។ គ្រាន់តែថាវាទាក់ទងគុណភាពកីឡាករដែលយើងមានបណ្ដោះអាសន្ននេះ ដែលនឹងមានប្រែប្រួលនៅឆ្នាំក្រោយ។ អាហ្នឹងជាភស្តុតាងមួយដឹងថា ឆ្នាំហ្នឹងកម្រិតយើងនៅប៉ុណ្ណា ហើយឆ្នាំក្រោយយើងត្រូវធ្វើអីធ្វើអីបន្តទៀត។ ហ្នឹងហើយ! គ្រាន់តែវាសំណាងមិនល្អបន្តិច ព្រោះបីប្រកួតដំបូង យើងជួបសុទ្ធតែក្រុមខ្លាំងៗ»៕

អត្ថបទ៖ អ៊ុំ សុភក្តិ