- 2020-04-07 02:32:32
- បាល់ទាត់
ចូលឆ្នាំខ្មែរ កែវ សុខផេង មិនទៅណាទេ តែនៅផ្ទះធ្វើរឿងនេះជាមួយគូដណ្ដឹង
- 2020-04-07 02:32:32
- ចំនួនមតិ 0 | ចំនួនចែករំលែក 0
ចូលឆ្នាំខ្មែរ កែវ សុខផេង មិនទៅណាទេ តែនៅផ្ទះធ្វើរឿងនេះជាមួយគូដណ្ដឹង
ចន្លោះមិនឃើញ
ពិធីបុណ្យចូលឆ្នាំថ្មីប្រពៃណីជាតិខ្មែរ នឹងចូលមកដល់ក្នុងពេលឆាប់ៗខាងមុខ ហើយក្នុងជំនួបជាមួយ Sabay កាលពីពេលថ្មីៗនេះ ខ្សែប្រយុទ្ធមុតស្រួចរបស់ក្លឹបបាល់ទាត់វិសាខា និងជម្រើសជាតិកម្ពុជា កែវ សុខផេង បានឱ្យដឹងថា រូបគេគ្មានគម្រោងធ្វើដំណើរកម្សាន្តទៅរមណីយដ្ឋានណាទេ ពោលគឺនៅផ្ទះញ៉ាំអីជួបជុំជាមួយគ្រួសារ និងគូដណ្ដឹង។
អតីតកីឡាករក្លឹបភ្នំពេញក្រោនបញ្ជាក់ថា ៖«គម្រោងរបស់ខ្ញុំសម្រាប់ចូលឆ្នាំថ្មីនេះ ខ្ញុំអត់មានទៅណាទេបង និយាយទៅគឺនៅផ្ទះញ៉ាំអីជាមួយគ្រួសារខ្ញុំ និងគ្រួសារគូដណ្ដឹងខ្ញុំ»។
ការណ៍ដែលនៅផ្ទះបែបនេះក៏ដោយសារ សុខផេង និងក្រុមគ្រួសារ ចង់ទប់ស្កាត់ និងកាត់បន្ថយការឆ្លងរីករាលដាលនៃវីរុសកូវីដ១៩ ដែលកំពុងកើតមាននៅកម្ពុជា និងលើពិភពលោក ខណៈរដ្ឋាភិបាលកម្ពុជាបាននឹងកំពុងដុតដៃដុតជើងទប់ស្កាត់ និងការពារខ្លាំងលើបញ្ហានេះ។ ម្យ៉ាងទៀតក្រោយចូលឆ្នាំខ្មែរ លីគកំពូលកម្ពុជាអាចនឹងមានការប្រកួតឡើងវិញ ដូច្នេះរូបគេត្រូវការហ្វឹកហាត់ក្នុងនាមជាកីឡាករអាជីព។
ប្អូនប្រុសបង្កើតរបស់អតីតខ្សែប្រយុទ្ធជម្រើសជាតិកម្ពុជា កែង សុខងន បានឱ្យដឹងទៀតថា ៖«ចូលឆ្នាំហើយកៀកចូលការប្រកួតផង យើងតែងតែត្រៀមហាត់ជានិច្ច ព្រោះអីយើងជាកីឡាករអាជីព»។
ក្នុងឱកាសចូលឆ្នាំខ្មែរខាងមុខនេះដែរ អតីតខ្សែប្រយុទ្ធរបស់បឹងកេត កែវ សុខផេង ក៏បានជូនពរឱ្យប្រជាជនខ្មែរ និងអ្នកគាំទ្រទាំងអស់របស់ខ្លួន ជួបតែសេចក្ដីសុខ និងចេះថែរក្សាការពារខ្លួនឱ្យបានល្អ ជៀសវាងការឆ្លងជំងឺកូវីដ១៩។
ក្រសួងសុខាភិបាលកម្ពុជា បានប្រកាសនៅថ្ងៃទី៧ ខែមេសា ឆ្នាំ២០២០នេះ អំពីការរកឃើញអ្នកផ្ទុកជំងឺកូវីដ១៩ ចំនួន ១នាក់បន្ថែមទៀត ដែលកើតឡើងលើស្រ្តីទេសចរជនជាតិវៀតណាមម្នាក់អាយុ ២៧ឆ្នាំ មកពីប្រទេសវៀតណាម ដោយត្រូវបានដាក់ឱ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។
បើគិតទូទាំងប្រទេស កម្ពុជាមានអ្នកជំងឺកូវីដ១៩ ចំនួន ១១៥នាក់ ក្នុងនោះអ្នកជាសះស្បើយ ៥៨នាក់៕
