- 2020-03-17 05:25:19
- បាល់ទាត់
ហេតុអ្វីលោក ស៊ុំ វណ្ណា មិនដាក់ Esoh Omogba ពេលប៉ះ Angkor Tiger?
- 2020-03-17 05:25:19
- ចំនួនមតិ 0 | ចំនួនចែករំលែក 0
ហេតុអ្វីលោក ស៊ុំ វណ្ណា មិនដាក់ Esoh Omogba ពេលប៉ះ Angkor Tiger?
ចន្លោះមិនឃើញ
អំឡុងពេលភ្នំពេញក្រោន ប្រកួតជាមួយព្រះខ័នរាជស្វាយរៀង នៃពានរង្វាន់លីគកំពូលកម្ពុជា ឆ្នាំ២០២០ក្នុងសប្ដាហ៍ទី៤ ខ្សែបម្រើប្រយុទ្ធ Esoh Omogba ត្រូវបានប្ដូរចូលនៅចុងតង់ទី២។ វត្តមានរបស់ Omogba បានធ្វើឱ្យការប្រកួតមានការផ្លាស់ប្ដូរបន្តិចដែរ ចំណែកអ្នកគាំទ្រមួយចំនួនក៏បានកោតសរសើរ ពីសមត្ថភាពរបស់រូបគេផងដែរ។
ដោយឡែកកាលប៉ះគ្នាជាមួយក្លឹប Angkor Tiger នាថ្ងៃអាទិត្យកន្លងទៅ អតីតគ្រូក្លឹបស៊ីម៉ាក់យូណាយធីត វេស្ទើនភ្នំពេញ និងគ្រូជំនួយក្លឹបបៀលប្រាយយូណាយធីត លោក ស៊ុំ វណ្ណា មិនបានដាក់ឱ្យកីឡាកររូបនេះលេងទេ។ តើមកពីមូលហេតុអ្វី?
ជុំវិញចម្ងល់នេះ គ្រូបង្គោលភ្នំពេញក្រោនកម្រិត AFC A-Licens លោក ស៊ុំ វណ្ណា បានឱ្យដឹងថា មកពីកីឡាករនីហ្សេរីយ៉ារូបនេះមានបញ្ហារបួសភ្លៅ ដូច្នេះលោកមិនទាន់ដាក់ឱ្យលេងឡើយ ក្រែងរបួសកាន់តែធ្ងន់ធ្ងរ។
គ្រូជំនួសតំណែងលោកគ្រូបង្វឹក Leonardo Vitorino អំឡុងឆ្នាំ២០១៩រូបនេះ បានពន្យល់ថា ៖«គាត់មានបញ្ហាភ្លៅ យើងអត់ហ៊ានបង្ខំឱ្យគាត់លេងទេ យើងឱ្យគាត់ជាឡើងវិញ ដើម្បីលេងនៅថ្ងៃទី៥»។
Esoh Omogba បានមកលេងឱ្យបឹងកេត នៅលីគកំពូលកម្ពុជានាអំឡុងឆ្នាំ ២០១៥ ដល់ ២០១៨, លេងឱ្យណាហ្គាវើលដ៍ឆ្នាំ២០១៩ និង២០២០ កីឡាករមានប្រពន្ធជនជាតិថៃ Omogba លេងឱ្យក្លឹបម្ចាស់ជើងឯកលីគកំពូលកម្ពុជា៦សម័យកាល ភ្នំពេញក្រោន។
នៅថ្ងៃទី៥ ខែមេសា ឆ្នាំ២០២០ខាងមុខ ក្លឹបខ្លាំងភ្នំពេញក្រោននឹងបើកទ្វារកីឡដ្ឋាន Smart RSN របស់ខ្លួនទទួលក្រុមភ្ញៀវវិសាខា ដូច្នេះរងចាំមើលថាតើ Esoh Omogba អាចជួយឱ្យក្លឹបថ្មីរបស់គេឈ្នះឬក៏យ៉ាងណា៕