វិភាគ៖ សង្គ្រាមវាលស្មៅ Real Madrid ប៉ះ Man City យប់នេះ ញាក់សាច់

2020-02-26 08:31:17
បាល់ទាត់

2020-02-26 08:31:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុម Real Madrid នឹងស្វាគមន៍ក្រុមភ្ញៀវ Manchester City ក្នុងការប្រកួតជើងទី១ ពានរង្វាន់ UEFA Champions League វគ្គ១៦ក្រុមចុងក្រោយ វេលាម៉ោង៣រំលងអាធ្រាត្រ។

ខាងក្រោមនេះ ជារឿងមួយចំនួនដែល Sabay ស្រាវជ្រាវលើកមកវិភាគជួនអ្នកគាំទ្របានដឹងទាំងអស់គ្នា៖

ជម្រើស១១នាក់ក្រុមទាំងពីរ និងកីឡាកររបួស

ក្រុម Real Madrid អាចដាក់៖ Courtois: Carvajal, Varane, Ramos, Mendy; Modrić, Valverde, Casemiro, Kroos; Vinícius Júnior, Benzema។ កីឡាករសំខាន់៣នាក់មិនអាចលេងបានឡើយ គឺ Hazard របួស Asensio របួស និង Rodrygo ជាប់បម្រាម។
សម្រាប់ក្រុម Man City វិញ អាចប្រើកីឡាករ១១នាក់នេះ៖ Ederson; Walker, Fernandinho, Laporte, Zinchenko; De Bruyne, Rodri, Silva; Bernardo, Agüero, Sterling។ ខ្សែប្រយុទ្ធ Sane មិនទាន់ច្បាស់ថាលេងបានឬអត់ទេ។

អ្វីដែលគ្រូបង្វឹកក្រុមទាំងពីរនិយាយ

Zidane បាននិយាយថា៖ “គ្រាន់តែលទ្ធផលមិនល្អប៉ុន្មានប្រកួតចុងក្រោយនេះ មិនមែនមានន័យថាយើងកំពុងលេងមិនល្អទេ។ ប្រកួតនេះ គឺ Real Madrid ប៉ះ Man City មិនមែន Zidane ជាមួយ Pep ឡើយ។ វាជាការប្រកួតបាល់ទាត់ ហើយវានឹងក្លាយជាប្រកួតជក់ចិត្តបំផុតសម្រាប់អ្នកគាំទ្រ។ City ជាក្រុមខ្លាំងមួយ ពួកគេមានកីឡាករល្អច្រើន និងកីឡាករសំខាន់ក៏ជាទាន់ល្មមសម្រាប់ប្រកួត។ យើងនឹងប្រឹងប្រែង ហើយមិនប្ដូរគោលដៅឡើយ គឺត្រូវតែឈ្នះឱ្យបាន”។

Pep គ្រូរបស់ក្រុម Man City តបតវិញថា៖ “យើងត្រូវតែខ្លាំង មានសមត្ថភាពនិងត្រូវការសំណាងផងដែរក្នុងការប្រកួតនេះ។ យើងត្រូវការរៀបចំយុទ្ធសាស្ត្រ កលល្បិចលេង និងសំណាង ដើម្បីឈ្នះក្រុមល្អមួយនេះ។ អ្វីដែល Zidane បានធ្វើជាមួយក្រុម Real Madrid ដែលឈ្នះ UCL ៣ឆ្នាំជាប់គ្នា គឺគ្មាននរណាអាចធ្វើវាបានទៀតទេ”។

អ្នកជំនាញមើលឃើញ

Zidane បានប្រើប្រាស់ក្បួនលេងយ៉ាងច្រើនរបៀបនារដូវកាលនេះ នៅពេល Hazard រងរបួស។ តែលទ្ធផលវិញ នៅមិនទាន់អាចរកឃើញទម្រង់មួយដែលល្អខ្លាំងសម្រាប់ក្រុមនៅឡើយទេ។ Real Madrid នៅតែខ្វះអ្នកស្វែងរកគ្រាប់បាល់ដដែល បើទោះជា Benzema ធ្វើបានល្អហើយក៏ដោយ ក៏ពេលខ្លះរូបគេនៅមានចំណុចកែលម្អដែរ។ អ្វីដែលគេមើលឃើញថាល្អរដូវកាលនេះ គឺ Real Madrid មានតំបន់ការពារល្អមួយ និងបម្រើចែកបាល់បានល្អ តែខ្វះប្រយុទ្ធ។

ក្រុម Man City នៅពេលដែល Bruyne និង Laporte ត្រលប់មកវិញ ពួកគេហាក់ដូចជាមានទម្រង់លេងថ្មី ប្លែកខុសពីកាលពីបើករដូវកាល។ ជាមួយការត្រលប់មកវិញនៅតំបន់ខាងលើ Sterling ប្រាកដណាស់នឹងជួយបានច្រើនមិនខាន បូកផ្សំជាមួយ Jesus ទៀត។ សម្រាប់ប្រកួតនេះ នឹងធ្វើឱ្យកក្រើកមិនខាន ហើយក្រុម Real Madrid ក៏មិនងាយបំបែកពងមាន់របស់ Man City ដែរ ទោះលេងក្នុងដីរបស់ខ្លួនក៏ដោយ។

ប្រវត្តិជួបគ្នា

កាលពីវគ្គពាក់កណ្ដាលផ្ដាច់ព្រ័ត្រឆ្នាំ២០១៦កន្លងទៅ ក្រុមទាំងពីរប៉ះគ្នាមានគ្រាប់បាល់កើតឡើងតែ១គ្រាប់ប៉ុណ្ណោះ។ នៅទឹកដី Man City គឺស្មើគ្នា ហើយនៅអេស្ប៉ាញវិញ Fernando រកបាន១គ្រាប់ឱ្យ Real Madrid ឡើងវគ្គផ្ដាច់ព្រ័ត្រ។ នៅរដូវកាល២០១២ ក្រុមទាំងពីរប៉ះគ្នាទៀតនៅក្នុងពូល ដោយគ្រានោះ Real Madrid ក្នុងដីឈ្នះ ៣-២ និងនៅក្រៅដីវិញ ស្មើគ្នា ១-១។

អ្វីត្រូវដឹង

Real Madrid ស្ថិតនៅលេខ២ក្នុងពូល ៣រដូវកាលមកហើយ ក្នុង៤រដូវកាលចុងក្រោយនេះ
រដូវកាលមុន Real Madrid បានលេខ១ក្នុងពូល ប៉ុន្តែធ្លាក់នៅវគ្គ១៦ក្រុមចុងក្រោយ ដោយសារតែក្រុម Ajax
រដូវកាលមុន គឺជារដូវកាលដំបូងសម្រាប់ក្រុម Real Madrid ដែលមិនបានឡើងដល់វគ្គពាក់កណ្ដាលផ្ដាច់ព្រ័ត្រ ចាប់តាំងពីឆ្នាំ២០០៩មក។
Real Madrid វគ្គចាញ់ធ្លាក់ ប៉ះក្រុមអង់គ្លេស មានកំណត់ត្រាឈ្នះ៨ដង និងចាញ់៤ដង។ ជួបគ្នាចុងក្រោយ គឺប៉ះក្រុម Liverpool វគ្គផ្ដាច់ព្រ័ត្រឆ្នាំ២០១៨ ដោយគ្រានោះ Real Madrid យកឈ្នះក្នុងលទ្ធផល ៣-១។
ក្រុមអង់គ្លេសមកលេងក្នុងដី Real Madrid ឈ្នះបានតែ២ដងប៉ុណ្ណោះ ស្មើគ្នា៦ និងចាញ់ដល់ទៅ៨ដងទៅហើយ៕