Pep បន្តនៅ Manchester City ប្រឆាំងតវ៉ាការហាមរបស់ UEFA

2020-02-20 02:43:05
បាល់ទាត់

2020-02-20 02:43:05
ចំនួនមតិ 0 | ចំនួនចែករំលែក 0

ចន្លោះមិនឃើញ

Pep Guardiola បានឱ្យដឹងក្នុងសន្និសីទសារព័ត៌មានដំបូងរបស់ខ្លួន ចាប់តាំងពី Manchester City ត្រូវបាន UEFA ហាមមិនឱ្យលេង Champions League រយៈពេលឆ្នាំ ពីបទរំលោភយ៉ាងធ្ងន់ធ្ងរនូវច្បាប់ "តុល្យភាពហិរញ្ញវត្ថុ" ថា លោកមិនទៅណាចោលក្រុមមេឃខៀវឡើយ ហើយលោកនៅក្លឹបនេះ ដើម្បីប្រឆាំងតវ៉ាការហាមមួយនេះ។

អំឡុងពេលយកឈ្នះ West Ham ២-០ កាលពីយប់មិញ អ្នកគ្រប់គ្រង City បន្តថាបញ្ហានេះនៅមិនទាន់ត្រូវបានបញ្ចប់ទេ ហើយក្លឹបជឿជាក់វាជារឿងអយុត្តិធម៌ ហើយក្លឹបនឹងប្ដឹងឧទ្ធរណ៍។

«ខ្ញុំជឿ ១០០% នូវអ្វី ដែលក្លឹបបាននិយាយ ហើយអ្វីដែលពួកគេបានធ្វើ ពួកគេបានពន្យល់ហេតុផលមកកាន់ខ្ញុំ។ យើងនឹងប្រឆាំង ហើយយើងមានសុទិដ្ឋិនិយមថា នៅរដូវកាលក្រោយ ប្រសិនបើយើងមានលក្ខណៈគ្រប់គ្រាន់ សម្រាប់ការប្រកួតក្របខ័ណ្ឌ Champions League យើងនឹងលេង»។

កុងត្រារបស់ Pep Guardiola មានរហូតដល់បញ្ចប់រដូវកាលក្រោយ ហើយអ្នកចាត់ការក្រុមបានអះអាងថា លោកស្រលាញ់ និងចង់ឱ្យក្លឹប Manchester City នៅកម្រិតនេះឱ្យបានយូរតាមដែលអាចធ្វើបាន។

«ខ្ញុំមិនទៅណាទេ ប្រសិនបើក្លឹបមិនចេញខ្ញុំចេញ។ ហេតុអ្វីខ្ញុំមិនចេញ? ខ្ញុំស្រលាញ់ក្លឹបនេះ ខ្ញុំចង់នៅទីនេះ ដើម្បីបន្តជួយក្លឹប និងរក្សាកម្រិតឱ្យនៅត្រឹមនេះ ឱ្យបានយូរតាមដែលអាចធ្វើបាន។ នោះមិនមែនដោយសារតែកុងត្រាខ្ញុំនៅទេ គឺយើងចង់ប្រឆាំងតវ៉ាដល់ទីបញ្ចប់ សម្រាប់មនុស្សដែលគាំទ្រក្លឹបនេះ»។

ចំណែកនាយកប្រតិបត្តិក្លឹប Manchester City លោក Ferran Soriano បាននិយាយកាលពីពេលថ្មីៗនេះ ក្លឹបមានភស្តុតាងមិនអាចប្រកែកបាន គឺថាការចោទប្រកាន់របស់ UEFA គឺមិនពិត។

ទោះមិនបានឃើញភស្តុតាង ប៉ុន្តែ Pep ជឿជាក់លើលោក Ferran ប្រធានរបស់ខ្លួន និងបាននិយាយថា៖ «ខ្ញុំមិនមានតួនាទីអ្វ្វី ទៅសួររឿងភស្តុតាងដែលក្លឹបមានឡើយ ខ្ញុំមិនមែនជាមេធាវី ហើយវាជារឿងដ៏ចម្រូងចម្រាស។ ខ្ញុំដឹងមូលហេតុតិចតួច ហើយមានពីរភាគី។ អ្វីដែលខ្ញុំត្រូវធ្វើនោះ គឺឈ្នះការប្រកួត»៕

ប្រភព៖ MSN ប្រែសម្រួល៖ អ៊ុំ សុភក្តិ