- 2019-12-06 08:54:54
- បាល់ទាត់
វគ្គសិក្សាលើកទី៤ បង្រៀនដោយគ្រូមកពី Spurs រឹតតែពិសេស និងមានគន្លឹះសំខាន់ៗច្រើន
- 2019-12-06 08:54:54
- ចំនួនមតិ 0 | ចំនួនចែករំលែក 0
វគ្គសិក្សាលើកទី៤ បង្រៀនដោយគ្រូមកពី Spurs រឹតតែពិសេស និងមានគន្លឹះសំខាន់ៗច្រើន
ចន្លោះមិនឃើញ
កម្មវិធីបណ្ដុះបណ្ដាល «គ្រូបង្វឹក ដើម្បីអភិវឌ្ឍន៍វិស័យបាល់ទាត់សម្រាប់សហគមន៍» ដែលសហការជារវាងក្រុមបាល់ទាត់ Spurs និង AIA បានបញ្ចប់វគ្គទី៤ ដែលជាវគ្គចុងក្រោយព្រឹកមិញនេះហើយ ខណៈខ្លឹមសារមេរៀនគឺវិធីបូកបញ្ចូលវិធីសាស្ត្រទាំង៣មុនៗ និងការអនុវត្តជាក់ស្ដែង។
លោក Anton Blackwood និង Aaron Tillbrook ដែលជាគ្រូឧបទេសមកពី Spurs បានឲ្យដឹងថា វគ្គបណ្ដុះបណ្ដាលកាលពីខែកុម្ភៈ មិថុនា និងខែកញ្ញាមុនៗ ផ្ដោតលើវិធីសាស្ត្របង្កើតបរិយាកាសហ្វឹកហាត់ឲ្យល្អ វិធីសាស្ត្ររៀបចំវគ្គហ្វឹកហាត់សម្រាប់ក្រុមក្មេងៗ វិធីសាស្ត្ររៀបចំកម្មវិធីបង្ហាត់ពិស្ដារ។ ក្រៅពីនេះទៀតនោះ គឺវិធីសាស្ត្ររៀបចំវគ្គ៦សប្តាហ៍សម្រាប់សហគមន៍ឲ្យទទួលបានជោគជ័យផ្អែកលើវិធីសាស្ត្រមុំ៤។
អ្នកជំនាញខាងបាល់ទាត់មកពីអឺរ៉ុបខាងលើនេះបន្តថា វគ្គទី៤ គឺផ្ដោតលើការផ្សារភ្ជាប់វិធីសាស្ត្រទាំងឡាយ ដែលបានរៀនកន្លងមក ដើម្បីធានាថាសិក្ខាកាមចូលរួម អាចទៅអនុវត្តនូវកម្មវិធីហ្វឹកហាត់ដែលមានរចនាសម្ព័ន្ធត្រឹមត្រូវ សម្រាប់ក្រុមយុវជននៃក្លឹបនិមួយៗរៀងៗខ្លួនក្នុងពេលអនាគត។ លោកក៏មានចិត្តសប្បាយរីករាយជាខ្លាំង ដែលបានឃើញគ្រូបណ្ដាក្លឹបនានា ដែលជាសិក្ខាកាមចូលរួមនេះទទួលបានបទពិសោធថ្មីៗបន្ថែមទៀតបែបនេះ។
អ្នកស្រី Pauline Teoh តំណាង AIA លើកឡើងដែរថា ពិតជារីករាយដែលបានអញ្ជើញគ្រូជំនាញមកពីក្រុមល្បីនៅតំបន់អឺរ៉ុប ដែលជាដៃគូសហការដើម្បីមកជួយបណ្ដុះបណ្ដាលក្នុងវគ្គនេះ ដើម្បីរួមចំណែកអភិវឌ្ឍន៍បាល់ទាត់សហគមន៍នៅកម្ពុជា។ បើទោះជាវគ្គនេះត្រូវបានបញ្ចប់ក្ដី ក្រុមហ៊ុនរបស់អ្នកស្រីនឹងព្យាយាមបង្កើតឲ្យមានកម្មវិធីលើកស្ទួយវិស័យបាល់ទាត់កម្ពុជាបន្តបន្ទាប់ទៀត៕
