Schweinsteiger យល់ថា អ្នកចាត់ការរូបនេះ អាចនឹងចង់មកដឹកនាំក្លឹប Bayern

2019-11-04 12:38:53
បាល់ទាត់

2019-11-04 12:38:53
ចំនួនមតិ 0 | ចំនួនចែករំលែក 0

ចន្លោះមិនឃើញ

វីរបុរសក្លឹប Bayern Munich អតីតកីឡាករ Bastain Schweinsteiger យល់ថា លោក Jose Mourinho អាចនឹងចង់មកដឹកនាំក្លឹបយក្សអាល្លឺម៉ង់។

នាថ្ងៃនេះ Schweinsteiger បាននិយាយប្រាប់សារព័ត៌មានអាល្លឺម៉ង់ Blid ថា លោក Mourinho អាចនឹងចង់មកដឹកនាំក្លឹប Bayern។

Schewinsteiger ធ្លាប់លេងក្រោមការដឹកនាំរបស់លោក Mourinho កាលពីនៅក្លឹបបិសាចក្រហមនារដូវកាល ២០១៦/១៧។ អតីតកីឡាករ បានអះអាងថា ក្នុងអំឡុងពេលនោះ អ្នកចាត់ការព័រទុយហ្គាល់រូបនេះបានរៀនភាសាអាល្លឺម៉ង់ ហើយតែងតែជជីកសួរខ្លួនអំពីក្លឹប Bayern និងលីគ Bundesliga។

លើសពីនេះទៅទៀត នាពេលប្រកួតក្រៅដីម្តងៗ លោក Mourinho តែងតែបើកមើលការប្រកួតក្នុងលីគកំពូលអាល្លឺម៉ង់ ព្រមទាំងស្គាល់បណ្ដាកីឡាករកំពុងប្រកបអាជីពក្នុងលីគនេះថែមទៀតផង។ នេះបើតាមការបញ្ជាក់របស់ Schewinsteiger។

វីរបុរសក្លឹប Bayern យល់ថា Mourinho មិនដែលមានប្រវត្តិដឹកនាំនៅលីគកំពូលអាល្លឺម៉ង់នោះទេ ដូច្នេះហើយ ទើបលទ្ធភាពមកដឹកនាំក្លឹបយក្សអាល្លឺម៉ង់អាចទាក់ទាញចំណាប់អារម្មណ៍លោក។

កាលពីម្សិលមិញ ក្លឹប Bayern ទើបបញ្ចប់ការងារគ្រូបង្វឹក Niko Kovac ក្រោយចាញ់ក្លឹប Eintracht Frankfurt ៥ ទល់នឹង ១។ ពាក្យចចាមអារ៉ាមមួយចំនួនបានលេចឡើងថា លោក Jose Mourinho លោក Arsene Wenger និង លោក Massimiliano Allegri កំពុងស្ថិតជាបេក្ខភាពជួរមុខសម្រាប់តួនាទីគ្រូបង្វឹកក្លឹបយក្សអាល្លឺម៉ង់មួយនេះ។

គិតមកទល់ពេលនេះ លោក Mourinho បានទំនេរពីតួនាទីដឹកនាំជិតមួយឆ្នាំហើយ បន្ទាប់ពីត្រូវបានបញ្ចប់ការងារដោយក្លឹប Manchester United កាលពីចុងឆ្នាំមុន៕

ប្រភព៖ Goal ប្រែសម្រួល៖ ហ៊ីម រស្មី