ពានរង្វាន់ Soccer League ឆ្នាំ២០១៩ ប្រកាសទទួលពាក្យដើមខែក្រោយនេះហើយ

2019-08-30 06:58:37
បាល់ទាត់

2019-08-30 06:58:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតពានរង្វាន់ Soccer League 2019 បានប្រកាសចាប់ផ្ដើមទទួលពាក្យចូលរួមប្រកួតចាប់ពីថ្ងៃទី១ខែកញ្ញាខាងមុខនេះតទៅហើយ រហូតដល់ថ្ងៃទី៣០ខែកញ្ញាឆ្នាំ២០១៩។

ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក) បានប្រកាសជា សាធារណៈតាមរយៈសេចក្តីជូនដំណឹងជាផ្លូវការរបស់ខ្លួនថា ព្រឹត្តិការណ៍កីឡាបាល់ទាត់ដណ្តើម ពានរង្វាន់ Soccer League លើកទី៥ ឆ្នាំ២០១៩ នឹងត្រូវបើកការប្រកួតជាផ្លូវការ នាថ្ងៃទី០២ ខែវិច្ឆិកា ឆ្នាំ២០១៩។ ឯកឧត្តមប្រកាសឱ្យបណ្តាក្លឹបបាល់ទាត់គ្រប់សមាសភាពទូទៅ អាចមកចុះឈ្មោះ ចូលរួមប្រកួតចាប់ពីថ្ងៃទី០១ ខែកញ្ញា ឆ្នាំ២០១៩នេះតទៅ។

ការលក់ពាក្យ និងទទួលពាក្យចូលរួមប្រកួតនឹងចាប់ផ្តើមពី ថ្ងៃទី០១ ខែកញ្ញា ឆ្នាំ២០១៩ នៅលេខាធិការដ្ឋាន ស.ស.យ.ក ស្នាក់ការកណ្តាល និងអគារវិមានពហុកីឡដ្ឋានជាតិអូឡាំពិក ហើយឈប់ទទួលពាក្យនាថ្ងៃទី៣០ ខែកញ្ញា ឆ្នាំ២០១៩។ ព្រឹត្តិការណ៍នេះនឹងប្រើប្រាស់កីឡដ្ឋានចំនួន៣ផ្សេងគ្នា សម្រាប់វគ្គជម្រុះ ដូចជាកីឡដ្ឋានបាល់ទាត់ កងយោធពលខេមរភូមិន្ទ (ស្តាតចាស់) កីឡដ្ឋានបាល់ទាត់វិសាខា និងកីឡដ្ឋានបាល់ទាត់វេស្ទើន។

សម្រាប់ប្រាក់រង្វាន់នៃពាននេះ គឺក្រុមលេខ១បាន២០លានរៀល មេដាយមាស២៥គ្រឿង ក្រុមលេខ២បាន១០លានរៀល មេដាយប្រាក់២៥គ្រឿង និងក្រុមលេខ៣បាន៥លានរៀល អមជាមួយមេដាយសំរឹទ្ធិ២៥គ្រឿង៕