លោក Maurizio Sarri អាច​នឹង​ចូលរួម​ជាមួយ Juventus សម្រាប់​កិច្ចសន្យា​រយៈពេល​៣ឆ្នាំ​ក្រោយ​ពី​​លោក​គ្មាន​បញ្ហា​ខាង​ជាប់​កុងត្រា Chelsea ទៀត​ឡើយ។

ភ្នាក់ងារ​របស់​គ្រូ​បង្វឹក​សញ្ជាតិ​អ៊ីតាលី​គឺ​លោក Fali Ramadani បាន​ជួប​ជាមួយ​ក្លឹប​តោ​ខៀវ កាលពី​ថ្ងៃ​សុក្រ និង បាន​ឈាន​ដល់​កិច្ច​ព្រមព្រៀង​ជាមួយ​ Chelsea ដែល​មាន​ន័យថា Sarri អាច​ចូលរួម​ជាមួយ Juventus បាន។ នេះ​បើ​តាម The Guardian ចុះ​ផ្សាយ​កាល​ពី​ថ្ងៃ​សៅរ៍។

Sarri បាន​ដឹកនាំ​ក្លឹប​ដែល​មាន​មូលដ្ឋាន​នៅ​ទីក្រុង​ឡុង កាលពី​រដូវ​ក្តៅ​​ឆ្នាំ​មុន​ ក្រោយ​ពី​ដឹកនាំ Napoli បាន​៣​ឆ្នាំ ហើយ​​បាន​មក​ជំនួស​គ្រូ​បង្វឹក​រួម​សញ្ជាតិ Antonio Conte ប៉ុន្តែ​ទោះ​បី​ជា​ឈ្នះ​ពាន Europa League និង បាន​ចូល​លេង​នៅ Champions League រដូវ​កាល​ក្រោយ​ក្តី វានៅតែ​​ជា​យុទ្ធនាការ​មិន​សូវ​ល្អ​ឡើយ​សម្រាប់ Sarri នៅ Chelsea នា​រដូវ​កាល​នេះ។

Chelsea បាន​ឈាន​ដល់​វគ្គ​ផ្ដាច់ព្រ័ត្រ​នៃ​ពាន Carabao Cup ប៉ុន្តែ​បាន​បរាជ័យ​លើ​ក្រុម Manchester City នៅ​ក្នុង​ការ​ប្រកួត​មួយ​ដែល​​គេ​នឹង​មិន​​អាច​បំភ្លេច​​នូវ​ឈុត​ឆាក​កំប្លែង​ដែល​អ្នកចាំទី Kepa Arrizabalaga បដិសេធ​មិន​ព្រម​ចេញ​​ពី​ទីលាន​ទោះ Sarri ប្រឹង​បក់​ដៃ​ឲ្យ Kepa ​ចេញ​ដើម្បី​ប្តូរ​អ្នកចាំទី​នៅ​ម៉ោង​បាល់ប៉េណាល់ទី​យ៉ាងណាក្តី។

ដើម្បី​ជំនួស Sarri Chelsea ប្រហែល​សម្លឹង​មើល​អតីត​គ្រូ​បង្វឹក Juventus លោក Massimiliano Allegri, Nuno Espírito Santo របស់ Wolves, Javi Gracia របស់ Watford ឬ Laurent Blanc ដែល​ក្លឹប​មិន​បាច់​ចំណាយ​កម្រៃ​ជើងសារ​សម្រាប់​ភ្នាក់ងារ ពី​ព្រោះ​គ្រូ​បង្វឹក​មួយ​ចំនួន​ត្រូវ​បាន​ក្លឹប​បណ្តេញ​ចេញ​ហើយ ឬ តោខៀវ​ប្រហែល​ជា​អាច​យក Frank Lampard ដែល​បាន​ដឹកនាំ​ក្រុម Derby ឡើងដល់​វគ្គ play-offs ក្របខ័ណ្ឌ Championship ក្នុង​រដូវ​កាល​ដំបូង​របស់​គាត់​នៅ​ក្នុង​ការ​ដឹកនាំ៕

អាន៖ Pep ចេញ​មុខ​ការពារ​ sarriball ថា​ជា​ក្បួន​​​ខ្លាំង បើ​ទោះ​ជា​​មាន​គេ​មិន​យល់​ពី​ក្បួន​នេះ

អាន៖ Sarri អាច​ក្លាយ​ទៅ​ជា Guardiola ទី២ ប៉ុន្តែ​បញ្ហា​នៅ​ត្រង់​គ្រូបង្វឹកអ៊ីតាលីមិន​ត្រូវបានគេផ្តល់ពេលវេលាឲ្យគ្រប់គ្រាន់