​ក្រុម​បាល់ទាត់ Khmer United A បាន​វាយ​បក​យក​ឈ្នះ​ទៅ​លើ​ក្រុម Mambo PP ៤-២ បន្ទាប់​ពី​ដៃ​គូ​​មួយ​នេះ​នាំ​មុខ ២-០ មុន សម្រាប់​ការ​ប្រកួត​ពាន​រង្វាន់ Keller Williams Cambodia League 2019 ( Khmer Real Estate ពីមុន) សប្ដាហ៍​ទី​១ នៅ​ទីលាន​វេស្ទើន​ម្សិល​មិញ​នេះ។

​ក្រោយ​ពេល​ដៃ​គូ​នាំ​មុខ​ពីរ​គ្រាប់​មុន លោក កែវ សារិន គ្រូ​បង្វឹក​របស់​ក្រុម Khmer United A បាន​បង្ហើប​ថា ​លោក​បាន​ប្រើ​យុទ្ធសាស្ត្រ​ វាយ​សម្រុក​ខ្លាំង​ ដោយ​​​ប្រើ​ខ្សែ​ការពារ ៣ រូប​។ អ្វី​ដែល​សំខាន់​​ក្នុង​ការ​វាយ​បក​វិញ​បាន ៤ គ្រាប់​នេះ​ គឺ​កីឡាករ​បរទេស​របស់​លោក​ យល់​ព្រម​លេង​តាម​ការ​ពន្យល់​របស់​លោក ដោយ​លេង​​ជា​ក្រុម​ ​និង​សហការ​គ្នា មិន​បន្ត​លេង​តាម​បែប​ម្នាក់​ឯង​ដូច​ពេល​ចាប់​ផ្ដើម​ដំបូង។

​​​សម្រាប់​ពីរ​គ្រាប់​ដែល​បាត់បង់​នៅ​ដើម​វគ្គ​ទី​១ គឺ​កើត​ឡើង​ដោយ​សារ​ ក្រុម​របស់​លោក​រៀប​ចំ​​មិន​ទាន់​ត្រូវ​គ្នា ពោល​គឺ​កីឡាករ​បរទេស​លេង​តែ​ជាមួយ​បរទេស មិន​បោះ​បាល់​ឲ្យ​កីឡាករ​ខ្មែរ។ ជ័យជម្នះ​នេះ​ក៏​អាច​កើត​ឡើង​បាន​ដោយសារ​ការ​ដាក់​កីឡាករ​ថ្មី​ចូល ដើម្បី​បំបែក​​ប្រព័ន្ធ​ការពារ​របស់​ Mambo PP បាន​សម្រេច។

​លទ្ធផល​សប្ដាហ៍​ទី​១៖

• Riel PP ៧ : ០ Home Sport

• ATK ០ : ៨ Bayon

• Khmer UTD U22 ២ :៣ ISI

• Bassac ៣ : ១ Anvaya

• Sniper ១ : ១ Tun Sorng

• Avatar ១០ : ០ Sen Sok Empire

• Khmer UTD B ២ : ០ Tang Kok

• Khmer UTD A ៤ : ២ Mambo PP

រូបមន្ត​នៃ​ការ​ប្រកួត​ក្រុម​ឈ្នះ​ទទួល​​បាន ៣ ពិន្ទុ​​ស្មើ ១ ពិន្ទុ​ចាញ់ ០ ពិន្ទុ​។ ​​ក្រុម​ចូល​រួម​ឆ្នាំ​នេះ​មាន ១៤ សម្រាប់​ក្រុម​ដែល​មាន​ពិន្ទុ​លើស​គេ​ក្នុង​ការ​ប្រកួត​សន្សំ​ពិន្ទុ​១​ជើង នឹង​ក្លាយ​ជា​ជើង​ឯក Keller Williams Cambodia League 2019 ស្រប​ពេល​ក្រុម​​ចន្លោះ​​ពី​លេខ ២ ដល់​លេខ ៥ នឹង​ធ្វើ​ការ​ប្រកួត​​ដណ្ដើម​ជើង​ឯក KW Cambodia Cup 2019។ ​ ​ប្រាក់​រង្វាន់ ៖

• ជើង​ឯក​ KW Cambodia League 2019 ទទួល​បាន ២៤ លាន​រៀល​

• ជើង​​ឯក​ KW Cambodia Cup 2019 ទទួល​បាន ១២ លាន​រៀល​

• ​ជើង​ឯក​រង​ទទួល​បាន​ ៨​លាន​រៀល​

• ​ចំណាត់​ថ្នាក់​លេខ៣​ទទួល​បាន​ ​៦​លានរៀល​

• ក្រុម Fair Play ទទួល​បាន ២ លាន​រៀល

• អ្នក​រក​គ្រាប់​បាល់​បាន​ច្រើន​ជាង​គេ​១​លាន​រៀល​

• អ្នក​ចាំ​ទី​ល្អ​ជាង​គេ ១​​លាន​រៀល​​