• 2019-02-25 02:01:51
  • បាល់ទាត់

ទម្រង់​លេង​កម្ពុជា​យប់​មិញ​ទទួល​បាន​កោតសរសើរច្រើន​

  • 2019-02-25 02:01:51
  • ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុម​​យុវជន​កម្ពុជា​អាយុ​២២​ឆ្នាំ​​ទទួល​​បាន​ការ​សរសើរ​ច្រើន​ពី​​អ្នក​គាំទ្រ​របស់​ខ្លួន​ និង​​​ពី​បណ្តា​ប្រទេស​ផ្សេង​ៗ​នៅ​តំបន់​អាស៊ាន​ ​នៅ​ពេល​ចាញ់​ក្រុម​ខ្លាំង​ថៃ​ដោយ​ការ​ទាត់​បាល់​កាត់​សេចក្តី​ ៥-៣ យប់​​មិញ​ក្នុង​ការ​ប្រកួត​វគ្គ​ពាក់​កណ្តាល​ផ្តាច់​ព្រ័ត្រ​ជើង​ឯក​ AFF U22 Championship 2019។

ក្រុម​កម្ពុជា​អរគុណ​អ្នក​គាំទ្រ

កម្ពុជា​លេង​​ល្អ​​​ទាំង​ពីរ​វគ្គ​ និង​១៥​នាទី​ពីរ​ដង​ ដោយ​រក្សា​លំនឹង​ដដែ​បាន​​ល្អ​តំាង​ពី​ដើម​រហូត​ដល់​ចប់។ វគ្គ​ទី​១​ឃើញ​ថា​ ក្រុម​កម្ពុជា​មាន​ឱកាស​ល្អ​ជា​ច្រើន​​តាម​ការ​លេង​បាល់​ខ្លី​ និង​វាយ​បក​វិញ​លឿន​ៗ​ ប៉ុន្តែ​​ខ្សែ​ប្រយុទ្ធ​​សម្រេច​ទី​មិន​បាន​ល្អ។ នៅ​វគ្គ​ទី​២​ ក៏​កម្ពុជា​នៅ​តែ​រក្សា​ទម្រង់​លេង​ល្អ​ដដែល​ដោយ​មិន​បណ្តោយ​ឲ្យ​ថៃ​វាយ​សម្រុក​បាន​ស្រួល​នោះ​ទេ​ ប៉ុន្តែ​ក្រុម​ទាំង​ពីរ​មាន​ឱកាស​ទៅ​វិញ​ទៅ​មក​ដូច​គ្នា។ ទី​បំផុត​ចប់​៩០​នាទី​ដោយ​លទ្ធផល​​ស្មើ​ ០-០ ដែល​តម្រូវ​ឲ្យ​​​ថែម​ម៉ោង​១៥​នាទី​ពីរ​ដង។

១៥​នាទី​លើក​ទី​១​ឃើញ​ថា​ យុវជន​កម្ពុជា​បាន​សម្រុក​ខ្លាំង​​ដោយ​គ្រប់​គ្រង​បាល់​បាន​ច្រើន​ និង​សម្រុក​ចូល​តំបន់​គ្រោះ​ថ្នាក់​របស់​ថៃ​រហូត​ស៊ុត​បាន​ច្រើន​ជើង ខណៈ​យុវជន​ថៃ​ហាក់​មិន​សម្រុក​ឡើយ​ដោយ​ព្យាយាម​ទប់​ច្រើន​ជាង។ ១៥​នាទី​ចុង​ក្រោយ​ ថៃ​បន្ត​ផ្លាស់​ប្តូរ​កីឡាករ​ហើយ​បាន​​វាយ​សម្រុក​ខ្លាំង​នៅ​​វិញ​ដោយ​​ស៊ុត​បាល់​ទៅ​បុក​របាទី​របស់​កម្ពុជា​ពីរ​បី​លើក។ យ៉ាង​ណា​ សំណាង​គ្មាន​សម្រាប់​ក្រុម​ទាំង​ពីរ​ដោយ​ក្រោយ​ចប់​១២០​នាទី​ ហើយ​ត្រូវ​​ទាត់​​បាល់​កាត់​សេចក្តី។ ការ​ស៊ុត​បាល់​កាត់​សេចក្តី​នេះ​​កម្ពុជា​ស៊ុត​បាន​៣​គ្រាប់​​ដោយ​សារ​ ស៊ីន​ កក្កដា​ ស៊ុត​មិន​បាន​សម្រេច​ ខណៈ​ថៃ​ស៊ុត​ចូល​ទាំង​៥​គ្រាប់​ដើម្បី​ឡើង​ទៅ​វគ្គ​ផ្តាច់​ព្រ័ត្រ​ជួប​ឥណ្ឌូណេស៊ី។

ក្រុម​ថៃ​អបអរពេល​ឈ្នះ

​ទាំង​ពេល​ប្រកួត​ និង​ក្រោយ​ពេល​ចប់​ការ​ប្រកួត​ ​នៅ​លើ​បណ្តាយ​សង្គម​ Facebook បាន​កោត​សរសើរ​ខ្លាំង​ចំពោះ​ក្រុម​​យុវជន​កម្ពុជា​ដែល​​លេង​បាន​ល្អ​ និង​តស៊ូ​ជា​កម្ពុជា​បាន​យ៉ាង​ល្អ​រហូត​ដល់​១២០​នាទី។ ភាគ​ច្រើន​និយាយ​ថា​ យុវជន​កម្ពុជា​​រីក​ចម្រើន​គួរ​ឲ្យ​កត់​សំគាល់។ អ្នក​កោត​សរសើរ​ទាំង​នោះ​មិន​មែន​តែ​ជា​អ្នក​គាំទ្រ​កម្ពុជា​ប៉ុណ្ណោះ​ទេ​ ប៉ុន្តែ​សូម្បី​អ្នក​គាំទ្រ​ថៃ​​ វៀតណាម​ ម៉ាឡេស៊ី​ និង​ប្រទេស​ផ្សេង​ៗ​ក៏​កោត​សរសើរ​កម្ពុជា។

**មែន​ទែន​ទៅ នៅ​តំបន់​ការ​ពារ​ និង​បម្រើ​របស់​កម្ពុជា​ពិត​ជា​​លេង​បាន​​​ល្អ​​​គួរ​ឲ្យ​ចាប់​អារម្មណ៍ ប៉ុន្តែ​​នៅ​តំបន់​ប្រយុទ្ធ​​​ការ​​សម្រេច​ទី​មិន​បាន​​ល្អ​ដោយ​​ឱកាស​មាស​មាន​ច្រើន​លើក​ ​ប៉ុន្តែ​ធ្វើ​មិន​បាន​សម្រេច។

ថ្ងៃ​ទី​​២៦​ ខែ​កុម្ភៈ​ ២០១៩

  • កម្ពុជា​ vs វៀតណាម ដើម្បី​យក​ចំណាត់​ថ្នាក់​លេខ​៣

  • ឥណ្ឌូណេស៊ី​ vs ថៃ​ ដើម្បី​យក​ចំណាត់​ថ្នាក់​លេខ​​១​

អត្ថបទ៖ ជាន ចាន់រ៉ា

មតិយោបល់