កំពូល​កីឡាករចាស់​វស្សា Gianluigi Buffon ឈាន​ដល់​វ័យ​៤១​ឆ្នាំ​ហើយ​ ដោយ​បាន​បន្ត​ដំណើរ​លើ​អាជីព​បាល់ទាត់​អស់​ជាង​២៤​ឆ្នាំ និង បាន​សាង​ប្រវត្តិ​​ដ៏​អស្ចារ្យ​​រាប់​មិន​អស់ ដូចជា​ឈ្នះ​ពាន World Cup ហើយ​ក៏​ធ្លាប់​លេង​សូម្បី​លីគ​ទី២​មួយ​រដូវ​កាល​ផង​ដែរ ធ្លាប់​ឈ្នះ​ពាន​ក្នុង​ស្រុក​ជា​ច្រើន​ជាមួយ Juventus និង ពាន​អ្នក​ចាំទី​ល្អ​សម្រាប់​ខ្លួន​ឯង ប៉ុន្តែ​មាន​តែ​មាន​១​គត់​ដែល Buffon មិន​ដែល​បាន​ប៉ះ​គឺ​ Champions League។

អាយុ ៤១ ឆ្នាំ​អាច​ជា​ឱកាស​ចុង​ក្រោយ​របស់ Buffon ដើម្បី​បាន​ថើប​ពាន Champions League ។ កិច្ច​សន្យា​របស់​អ្នកចាំទី​អ៊ីតាលី​ជាមួយ​ក្លឹប Paris Saint-Germain នឹង​ចប់​ត្រឹម​រដូវ​ក្តៅ​ឆ្នាំ ២០១៩ ប៉ុន្តែ​អាច​បន្ត​ថែម​១​ឆ្នាំ​ទៀត។

Buffon វិះ​នឹង​ស្គាល់​រសជាតិ​ពាន Champions League​​ ដំបូង​ក្នុង​អាជីព​ ប៉ុន្តែ​ Juventus ត្រូវ​ចាញ់​ដោយ​បាល់​ប៉េណាល់ទី AC Milan ក្នុង​រដូវកាល ២០០២-០៣ នៅ​វគ្គ​ផ្តាច់​ព្រ័ត្រ បើ​ទោះ​ជា​ Buffon សង្រ្គោះ​បាល់​​ប៉េណាល់ទី​បាន​២​គ្រាប់​ក្តី។

ជា​ថ្មី​ម្តង​ទៀត ក្រោយ​រង់​ចាំ​អស់​១២​ឆ្នាំ​ Juventus បាន​ឡើង​ទៅ​លេង Champions League នៅ​វគ្គ​ផ្ដាច់ព្រ័ត្រ​ម្តង​ទៀត​ទល់​នឹង Barcelona។ គ្រាប់​បាល់​ស៊ុត​បញ្ចូល​ទី​ពី Ivan Rakitic, Luis Suarez និង Neymar ធ្វើ​ឱ្យ Barcelona ទទួល​ជ័យជម្នះ ៣-១ លើ​ Juventus ហើយ​បាន​ធ្វើ​ឲ្យ​ Buffon ខក​ចិត្ត​ម្តង​ទៀត។

២​ឆ្នាំ​ក្រោយ​មក Buffon មើល​ឃើញ​ក្តី​សង្ឃឹម​ថា​ បាន​លើក​ពាន​ Champions League​​ ក្រោយ​ Juventus បាន​ឡើង​ទៅ​កាន់​វគ្គ​ផ្តាច់​ព្រ័ត្រ​ម្តង​ទៀត។ យ៉ាង​ណា Cristiano Ronaldo បាន​បញ្ចប់​សុបិន​កណ្តាល​ថ្ងៃ​របស់​អតីត​អ្នកចាំទី​ Juventus ដោយ​តារា​ឆ្នើម​សញ្ជាតិ​ព័រទុយហ្គាល់​​រក​បាន​២​​គ្រាប់​ឲ្យ Real Madrid ​លត់​ Juventus ៤-១ ​នៅ​វគ្គ​ផ្តាច់ព្រ័ត្រ​​ដើម្បី​លើក​ពាន​ទ្វីប​អឺរ៉ុប ទុក​ឲ្យ Buffon បាន​ត្រឹម​ឈរ​យំ​ទឹក​ភ្នែក​រលីងរលោង។

Buffon បាន​និយាយ​ថា គម្រោង​លើក​ពាន Champions League ​ជាមួយ PSG ដូច​ជា​​មិន​សង្ឃឹម​ឡើយ ពិសេស​នៅ​ពេល​ដែល Neymar រង​របួស​ត្រូវ​សម្រាក​រយៈពេល​យូរ ប៉ុន្តែ កីឡាករ​ជើង​ចាស់​បាន​សារភាព​ថា​នឹង​មិន​បោះបង់​បំណង​នេះ​ឡើយ​ដរាប​ណា​ខ្លួន​នៅ​អាច​លេង​បាល់​កើត។

វីដេអូ​ហាយឡាយ​វគ្គ​ផ្តាច់ព្រ័ត្រ​ Champions League ឆ្នាំ​២០១៧ រវាង Juventus និង Real Madrid