ស្បែកជើង​មាស​ ជា​ពាន​មួយ​សម្រាប់​កីឡាករ​ដែល​រក​គ្រាប់​បាល់​បាន​ច្រើន​ជាង​គេ​ទាំង​កម្មវិធី​ក្នុង​ស្រុក និង​កម្មវិធី​ប្រចាំ​ទ្វីប​អឺរ៉ុប​។ ពាន​មួយ​នេះ មាន​កីឡាករ​ជា​ច្រើន​បាន​ឈ្នះ​ តែ​កម្រ​មាន​អ្នក​ឈ្នះ​នៅ​ក្លឹប​ពីរ​ផ្សេង​គ្នា​ណាស់។

ខាង​ក្រោម​នេះ​ហើយ​ជា​កីឡាករ​ ៣​រូប​ដែល​បាន​ឈ្នះ​ស្បែក​ជើង​មាស​នៅ​ក្លឹប​អាជីព​ពីរ​របស់​ពួក​គេ​៖

១. Cristiano Ronaldo៖ ខ្សែ​ប្រយុទ្ធ​ព័រទុយហ្គាល់​រូប​នេះ បាន​ឈ្នះ​ស្បែក​ជើង​មាស​នៅ​ក្លឹប​បិសាច​ក្រហម​ Manchester United និង​ក្លឹប​អធិរាជ​ស​ Real Madrid ដោយ​នៅ​ក្លឹប​អង់គ្លេស​ រូប​គេ​បាន​ឈ្នះ​នៅ​រដូវ​កាល​ ២០០៧/០៨ ដែល​ពេល​នោះ​រូប​គេ​រក​បាន​ ៣១​គ្រាប់។ លុះ​នៅ​ក្នុង​ប្រទេស​អេស្ប៉ាញ​វិញ​ រូប​គេ​ឈ្នះ​ចំនួន ៣​ដង​ ដោយ​នៅ​រដូវ​កាល​ ២០១០/១១ រូប​គេ​រក​បាន​ ៤០​គ្រាប់ រដូវ​កាល​ ២០១៣/១៤ រក​បាន​ ៣១​គ្រាប់ និង​រដូវ​កាល ២០១៤/១៥​ កីឡាករ​រូប​នេះ​រក​បាន ៤៨​គ្រាប់។

២. Luis Suarez៖ ខ្សែ​ប្រយុទ្ធ​អ៊ុយរុយហ្គាយ​រូប​នេះ ធ្លាប់​ឈ្នះ​ជាមួយ​ក្លឹប​ Liverpool និង​ក្លឹប​ Barcelona ដោយ​ឈ្នះ​កាល​នៅ​ក្លឹប​ Liverpool ក្នុង​រដូវ​កាល​ ២០១៣/១៤ ដែល​រក​បាន​ ៣១​គ្រាប់​ (ឈ្នះ​រួម​គ្នា​ជាមួយ​ Ronaldo) ហើយ​ឈ្នះ​ពេល​ប្រកប​អាជីព​នៅ​ក្លឹប​ Barcelona ក្នុង​រដូវ​កាល​ ២០១៥/១៦ ដែល​រូប​គេ​រក​បាន ៤០​គ្រាប់។

៣. Diego Forlan៖ ខ្សែ​ប្រយុទ្ធ​អ៊ុយរុយហ្គាយ​រូប​នេះ ធ្លាប់​ឈ្នះ​ជាមួយ​ក្លឹប​ Villareal កាល​ពី​រដូវ​កាល​ ២០០៣/០៤ ដោយ​រក​បាន ២៥​គ្រាប់​ និង​ឈ្នះ​នៅ​ក្លឹប​ Atletico Madrid កាល​ពី​រដូវ​កាល ២០០៨/០៩ ដោយ​រក​បាន ៣២​គ្រាប់៕