Fabregas ជាប់ក្នុងកំណត់ត្រា Guinness ជាលើកទី២

2018-10-17 13:30:12
បាល់ទាត់

2018-10-17 13:30:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែបម្រើក្លឹប Chelsea កីឡាករ Cesc Fabregas បានជាប់ក្នុងកំណត់ត្រាពិភពលោកឆ្នាំ២០១៩ ដោយសារតែគេជាកីឡាករបញ្ជូនបាល់ឲ្យមិត្តរួមក្រុមបាន ១០០ ដង លឿនជាងគេក្នុងប្រវត្តិសាស្ត្រលីគកំពូលអង់គ្លេស។ នេះជាលើកទី២ហើយ ក្នុងអាជីពបាល់ទាត់របស់កីឡាករវ័យ ៣១ឆ្នាំ។

កីឡាករសញ្ជាតិអេស្ប៉ាញរូបនេះ បានប្រើពេលតែ ២៩៣ ប្រកួត ប៉ុណ្ណោះដើម្បី Assist បាន ១០០ដង ដោយបំបែកកំណត់ត្រាចាស់របស់វីរបុរសបាល់ទាត់សញ្ជាតិវេល Ryan Giggs ដែលប្រើពេលរហូតដល់ ៣៦៧ ប្រកួតក្នុងក្របខ័ណ្ឌ Premier League។ បើទោះជា Fabregas ធ្វើបានដូច្នេះ តាំងពីថ្ងៃទី ៣១ ធ្នូ ២០១៦ ក៏ដោយ ទើបតែក្នុងថ្ងៃនេះប៉ុណ្ណោះ ដែលខ្សែបម្រើអេស្ប៉ាញត្រូវបានប្រកាសជាផ្លូវការថាបានជាប់ក្នុងកំណត់ត្រា Guinness។

យ៉ាងណាក៏ដោយ នេះមិនមែនជាលើកទីមួយរបស់ Fabregas ទេ ដោយរូបគេធ្លាប់ជាប់កំណត់ត្រាពិភពលោកនេះម្ដងហើយកាលពីឆ្នាំ២០១៧ជាមួយនឹងអតីតកីឡាករ Liverpool Jamie Redknapp។ កាលនោះ ពួកគេទាំងពីរបានជាប់កំណត់ត្រា Guinness រួមគ្នាដោយបានប៉ះបាល់បែប Volley បានសម្រេចច្រើនដងបំផុតក្នុងរយៈ៣០វិនាទី (ប៉ះបាល់បែបនេះបានសម្រេចចំនួន ១៥ ដង)។

Fabregas ធ្លាប់លេងឲ្យក្លឹប Arsenal ពីឆ្នាំ២០០៣រហូតដល់ឆ្នាំ២០១២ មុននឹងគេចូលរួមជាមួយក្លឹបថ្នាលរបស់គេ Barcelona ហើយវិលត្រលប់មកទឹកដីអង់គ្លេសវិញនៅឆ្នាំ២០១៥ដោយចូលរួមជាមួយក្លឹបតោខៀវ Chelsea។ នៅក្របខ័ណ្ឌលីគកំពូលអង់គ្លេស រូបគេបានស៊ុតចូល៥០គ្រាប់ និងបញ្ជូនបាល់ឲ្យមិត្តរួមក្រុមបាន១១១ដង ក្នុងការបង្ហាញខ្លួន៣៤៤លើក៕

ប្រភព៖ Dailymail អត្ថបទ៖ សេរី មង្គល