- 2018-08-02 13:17:52
- បាល់ទាត់
Martial ចេញមុខនិយាយតបត ក្រោយរងការទិតៀនពី Mourinho និងការផាកពិន័យពីក្លឹបបិសាចក្រហម
- 2018-08-02 13:17:52
- ចំនួនមតិ 0 | ចំនួនចែករំលែក 0
Martial ចេញមុខនិយាយតបត ក្រោយរងការទិតៀនពី Mourinho និងការផាកពិន័យពីក្លឹបបិសាចក្រហម
ចន្លោះមិនឃើញ
ក្រោយរងការទិតៀនពីអ្នកចាត់ការ Jose Mourinhoនិងរងការពិន័យជាប្រាក់ពីសំណាក់ក្លឹប Manchester Unitedខ្សែស្លាប Antony Martial បានចេញមុខនិយាយទាក់ទងនឹងអវត្តមានរបស់ខ្លួន។
កាលពីសប្ដាហ៍មុន ខ្សែស្លាប បានចាកចេញពីក្រុមបិសាចក្រហមដែលកំពុងស្ថិតនៅសហរដ្ឋអាមេរិកដើម្បីលេងប្រកួត Pre-season ទៅទីក្រុងប៉ារីស ប្រទេសបារាំង ដើម្បីមកចូលរួមមើលមិត្តស្រីរបស់ខ្លួនធ្វើការសម្រាលកូន។ ទោះជាយ៉ាងណា កីឡាករមិនបានធ្វើដំណើរត្រលប់មកជួយក្រុមភ្លាមៗវិញនោះទេ ក្រោយកូនរបស់ខ្លួនបានកើតរួច។ ការណ៍នេះ ធ្វើឲ្យលោក Mourinho ទិតៀនកីឡាករ។ កាលពីពេលថ្មីៗនេះ អ្នកចាត់ការព័រទុយហ្គាល់ថា Martial បានទៅមើលកូនរបស់គេកើតរួចហើយ ដូច្នេះគួរណាស់តែត្រលប់មកសហរដ្ឋអាមេរិកវិញ ដើម្បីមកជួយក្រុម។ កាលពីម្សិលមិញ លោកថែមទាំងបដិសេធក្នុងការឆ្លើយសំណួរទាក់ទងនឹងអនាគតរបស់កីឡាករបារាំងទៀតផង។
លើសពីនេះ ក្លឹប Manchester United ត្រូវបាន The Sun រាយការណ៍ថា បានផាកពិន័យ Martial ដល់ទៅ ១៨ ម៉ឺនផោន (ប្រមាណ ២៣ លានដុល្លារសហរដ្ឋអាមេរិក) ដោយសារកីឡាករបានអវត្តមានដោយឥតច្បាប់។
ប្រតិកម្មពីសំណាក់ Mourinho និងក្លឹបបិសាចក្រហម ទំនងជាកត្តាមួយដែលនាំឲ្យ Martial បញ្ចេញប្រតិកម្មតប។ ក្នុងថ្ងៃនេះ (ម៉ោងនៅកម្ពុជា) កីឡាករបារាំង បានបង្ហោះសារមួយក្នុង Twitter របស់ខ្លួន ។ កីឡាករបានអរគុណអ្នកគាំទ្រចំពោះពាក្យជូនពរល្អៗពួកគេ ចំពោះមិត្តស្រី និងកូនដែលទើបនឹងកើតរបស់ខ្លួន។ Martial បានបញ្ជាក់ថា ស្ថានភាពសុខភាពរបស់ពួកគេទាំងពីរមានភាពប្រសើរឡើងហើយ។
ទោះជាយ៉ាងណា ក្នុងសារដដែល កីឡាករបានសង្កត់ធ្ងន់ថា៖ "ឲ្យខ្ញុំសុំទោស ប៉ុន្តែក្រុមគ្រួសារគឺតែងតែជារឿងទីមួយជានិច្ច"។ កីឡាករបានបញ្ជាក់ទៀតថា ខ្លួននឹងមានវត្តមាននៅទីក្រុង Manchesterនៅថ្ងៃស្អែកនេះ។
សូមបញ្ជាក់ផងដែរថា Martial ហាក់បង្ហាញទម្រង់លេងបានយ៉ាងល្អឲ្យ Manchester Unitedកាលពីដើមរដូវកាល ២០១៧/១៨។ ទោះជាយ៉ាងណា ក្រោយ Alexis Sanchez បានចូលរួមជាមួយក្លឹបកាលពីខែមករា ឆ្នាំនេះ កីឡាករបារាំងត្រូវបានគេមើលឃើញថាមិនសូវបានលេងទៀងទាត់៕