- 2018-06-25 11:23:00
- បាល់ទាត់
ធ្លាយខ្ទេច! Sterling ធ្លាប់ចង់ចូលរួមជាមួយ Arsenal តែមានអ្នកឃាត់
- 2018-06-25 11:23:00
- ចំនួនមតិ 0 | ចំនួនចែករំលែក 0
ធ្លាយខ្ទេច! Sterling ធ្លាប់ចង់ចូលរួមជាមួយ Arsenal តែមានអ្នកឃាត់
ចន្លោះមិនឃើញ
ខ្សែស្លាប Raheem Sterling បានបង្ហើបថា ធ្លាប់មានបំណងចូលរួមជាមួយក្លឹប Arsenal កាលពីនៅវ័យក្មេង។ ទោះជាយ៉ាងណា ម្ដាយរបស់កីឡាករ បានធ្វើបានសម្រេចក្នុងការបញ្ចុះបញ្ចូលកូនខ្លួនឲ្យទៅចូលរួមជាមួយក្លឹប QPR វិញ។
ក្នុងអត្ថបទមួយចុះផ្សាយដោយ The Players' Tribune កីឡាករអង់គ្លេសដើមកំណើតចាម៉ៃកា Sterling បានឲ្យដឹងថា កាលពីខ្លួននៅអាយុ ១០ ឬ ១១ឆ្នាំ ខ្លួនត្រូវបានក្លឹបឡុងដុងមួយចំនួនដូចជា Fulham និង Arsenal ចង់បានខ្លួនឲ្យទៅហាត់ក្នុងឈុតយុវជន។ កាលនោះ គ្រាន់តែឭថា Arsenal ចង់បានភ្លាម កីឡាករពិតជារំភើប ហើយបានប្រាប់គេឯងថា ខ្លួននឹងចូលរួមក្លឹបមួយនេះ។
យ៉ាងនេះក្ដី ម្ដាយរបស់ Sterling មិនបានរីករាយនឹងដំណឹងនេះឡើយ ហើយបានបញ្ចុះបញ្ចូលកូនឲ្យចូលរួមជាមួយ QPR វិញ។ ហេតុផលរបស់ម្ដាយ គឺថា បើ Sterling ចូលរួមជាមួយ Arsenal មែន កីឡាករ គឺជាគ្រាន់តែ "លេខ" ប៉ុណ្ណោះ ព្រោះនៅក្លឹបនោះ មានកីឡាករក្មេងល្អៗច្រើន។ ដូច្នេះ Sterling ត្រូវតែរកក្លឹបណា ដែលកីឡាករអាចអភិវឌ្ឍខ្លួនពិតប្រាកដ ហើយក្លឹបនោះគឺ QPR។
Sterling បាននិយាយថា ការសម្រេចចិត្តទៅ QPR គឺ "ការសម្រេចចិត្តដ៏ល្អបំផុត" របស់ខ្លួន ព្រោះក្លឹបមិនបានទុកខ្លួនចោលឡើយ។
បន្ថែមពីការបង្ហើបពីអតីតកាលនេះ កីឡាករវ័យ ២៣ ឆ្នាំ បានគាស់កកាយអំពីពេលវេលាដែលខ្លួនសប្បាយចិត្តបំផុត។ ពេលវេលានោះ គឺពេលដែលកីឡាករបានទិញផ្ទះមួយឲ្យអ្នកម្ដាយ។ ខ្សែស្លាបបានរំលឹកថា កាលពីខ្លួននៅក្មេង បានដូរផ្ទះជាញឹកញាប់ ដោយម្ដាយគ្មានលទ្ធភាពក្នុងការជួលផ្ទះ។
សូមបញ្ជាក់ផងដែរ Sterling បានចូលរួមជាមួយ QPR កាលពីឆ្នាំ ២០០៣ ហើយលេងនៅទីនោះក្នុងឈុតយុវជនរហូតដល់ឆ្នាំ ២០១០ មុនចាកចេញមក Liverpool។ កីឡាករបន្តលេងនៅឈុតយុវជនហង្សក្រហមរហូតដល់ឆ្នាំ ២០១២ ហើយក៏បានចូលលេងឈុតធំ។ លេងក្នុងឈុតនេះបាន ៣ ឆ្នាំ កីឡាករត្រូវបាន Manchester City ទិញក្នុងតម្លៃសរុបជិត ៥០ លានផោន (ជាង ៦៦ លានដុល្លារសហរដ្ឋអាមេរិក)។
ក្នុងរដូវកាល ២០១៧/១៨ កីឡាករអង់គ្លេសរូបនេះ បានបង្ហាញទម្រង់លេងយ៉ាងល្អ។ ខ្សែស្លាបបានស៊ុតចូលសរុប ២៣ គ្រាប់ក្នុងការបង្ហាញខ្លួន ៤៦ លើកឲ្យក្លឹបយក្សមេឃខៀវ ហើយរួមចំណែកយ៉ាងសំខាន់ក្នុងការជួយក្លឹបឲ្យឈ្នះពាន Premier League និង League Cup៕