- 2018-02-06 06:46:44
- ព័ត៌មាន
កំណត់ត្រាដ៏ល្អ អ្នកចាំទីក្រុម PCO នៅបាត់ដំបង អ្នកគ្រប់គ្នាមិនចាប់អារម្មណ៍
- 2018-02-06 06:46:44
- ចំនួនមតិ 0 | ចំនួនចែករំលែក 0
កំណត់ត្រាដ៏ល្អ អ្នកចាំទីក្រុម PCO នៅបាត់ដំបង អ្នកគ្រប់គ្នាមិនចាប់អារម្មណ៍
ចន្លោះមិនឃើញ
អ្នកចាំទីក្រុមបាល់ទាត់ក្នុងសាល PCO បានក្លាយជាតួអង្គដ៏សំខាន់ម្នាក់ជួយក្រុមរបស់ខ្លួនឲ្យទទួលបានជើងឯកប្រចាំមណ្ឌលខេត្តបាត់ដំបងក្នុងព្រឹត្តិការណ៍បាល់ទាត់ Tiger Street Football Festival 2018 បន្ទាប់ពីប្រកួតអស់រយៈពេល២ថ្ងៃកាលពីចុងសប្តាហ៍កន្លងទៅនេះ។
កីឡាករ ព្រំ ឌិន ដែលជាអ្នកចាំទីដ៏ល្អម្នាក់ប្រចាំនៅខេត្តបាត់ដំបងរារាំងដៃគូមិនឲ្យស៊ុតចូលក្រុមរបស់ខ្លួនមួយគ្រាប់ណាឡើយ។ ក្រុមរបស់គេបានឆ្លងកាត់៥ប្រកួតដើម្បីក្លាយជាជើងឯកប្រចាំមណ្ឌលបាត់ដំបងក្នុងពានរង្វាន់ដ៏អស្ចារ្យ Tiger Street Football Festival ២០១៨ ដោយគ្មានក្រុមណាមួយស៊ុតចូលទីក្រុមរបស់ខ្លួនបានឡើយ សូម្បីមួយគ្រាប់ក៏គ្មានផង។ ការស៊ុតខ្លាំងៗ និងគ្រោះថ្នាក់ក្នុងទីលានហ្វូតសាលស្តង់ដារ រូបគេជួយសង្គ្រោះបាល់បានរហូត។ នេះជាកំណត់ត្រាដ៏ល្អសម្រាប់រូបគេដែលជួយក្រុមឈ្នះកៅអីឡើងមកប្រកួតជុំផ្តាច់ព្រ័ត្រទូទាំងប្រទេសនៅរាជធានីភ្នំពេញ។
៥ប្រកួតដែល ព្រំ ឌិន បានរក្សាសំណាញ់ទីរបស់ខ្លួនដោយគ្មានគ្រាប់បាល់ចូល ឬហៅថា Clean Sheet គឺប្រកួតទី១ក្រុម PCO បានទម្លាក់ក្រុម Classic FC ប្រកួតលើកទី២ទម្លាក់ក្រុមខ្លាំង Battambang Crown ដើម្បីឡើងទៅវគ្គ៨ក្រុមចុងក្រោយ។ វគ្គ៨ក្រុមចុងក្រោយក្រុមជើងឯកមួយនេះបានយកឈ្នះក្រុមខ្លាំងដែលមានបទពិសោធមកភ្នំពេញញឹកញាប់ Fox Zone FC ដោយលទ្ធផល ១-០ ដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រដែលវគ្គនេះពួកគេបានយកឈ្នះក្រុមយុវជនទួលតាឯក B ដោយលទ្ធផល១-០ ទៀតដើម្បីឡើងទៅវគ្គផ្តាច់ព្រ័ត្រ។ វគ្គផ្តាច់ព្រ័ត្រ ពួកគេត្រូវជួបជើងខ្លាំងមានបទពិសោធច្រើនទៀតគឺ FC Crown A ប៉ុន្តែពួកគេនៅតែធ្វើបានល្អដោយយកឈ្នះក្នុងលទ្ធផល ១-០ ទៀតដើម្បីក្លាយជាជើងឯកតែម្តង។
ព្រំ ឌិនបានឲ្យដឹងថា តាមពិតរូបគេមានបទពិសោធចាំទីរយៈពេលប្រហែលជា១២ឆ្នាំមកហើយពោលគឺតាំងពីអាយុ១៤ឆ្នាំ។ រូបគេធ្លាប់លេងឲ្យក្រុមផ្សេងៗជាច្រើននៅខេត្តបាត់ដំបងដូចជាក្រុមធនាគារស្រូវ និងក្រុមតំណាងខេត្តបាត់ដំបងដែលលេងក្នុងពានរង្វាន់សម្តេចតេជោ ហ៊ុន សែន ជាដើម។ ប៉ុន្តែរូបគេមិនធ្លាប់មានឱកាសលេងឲ្យក្លឹបធំៗកម្រិតលីគឡើយ។ រូបគេក៏ចង់លេងឲ្យក្រុមនៅលីគដែរ ប៉ុន្តែប្រហែលជាគ្មានឱកាសឡើយដោយសារជាប់ធ្វើការឲ្យក្រុមហ៊ុនឯកជន និងរាងកាយក៏កាន់តែធាត់ថែមទៀត។
អ្នកចាំទីរូបនេះបង្ហាញថា រូបគេពិតជារំភើបរីករាយខ្លាំងណាស់ដែលបានជួយក្រុមទទួលបានចំណាត់ថ្នាក់លេខ១ប្រចាំខេត្តបាត់ដំបង។ នេះជាក្តីស្រមៃក្រុមរបស់ខ្លួនដែលខំប្រឹងឡើងដើម្បីលោកប្រធានដែលបានបង្កើតក្រុមបាល់ទាត់នេះឡើង។ រូបគេនឹងព្យាយាមឲ្យអស់ពីលទ្ធភាពសម្រាប់ការប្រកួតជុំផ្តាច់ព្រ័ត្រទូទាំងប្រទេសនៅរាជធានីភ្នំពេញ។
បើនិយាយពីក្រុមជើងឯក PCO នេះស្ទើរគ្មានក្រុមណាមួយក្នុងខេត្តបាត់ដំបងយកទុកក្នុងកែវភ្នែកឡើយ។ ព្រឹត្តិការណ៍ពានរង្វាន់ Tiger Street Football Festival ក្រុមមួយនេះធ្លាប់ចូលរួមប្រកួតកាលពីឆ្នាំ២០១៧ ប៉ុន្តែបានធ្លាក់ចេញតាំងពីជុំដំបូង ប៉ុន្តែសម្រាប់ឆ្នាំនេះពួកគេបានយកឈ្នះក្រុមខ្លាំងៗទាំងអស់ដែលធ្លាប់មានកេរ្តិ៍ឈ្មោះល្បីនៅខេត្តបាត់ដំបង។
៦កៅអីមណ្ឌលបាត់ដំបងមកភ្នំពេញ
ពានរង្វាន់ដ៏អស្ចារ្យ Tiger Street Football Festival 2018 បានរកឃើញក្រុមខ្លាំងៗប្រចាំមណ្ឌលខេត្តព្រះសីហនុ កំពង់ស្ពឺ និងបាត់ដំបងហើយ។ ចុងសប្តាហ៍នេះនឹងចាប់ផ្តើមប្រកួតជ្រើសរើសនៅមណ្ឌលខេត្តសៀមរាបពីថ្ងៃទី៩ ១០ និង១១ ខែកុម្ភៈ ឆ្នាំ២០១៨នៅអង្គរខ្យុងយូ៕
