Ole Gunnar Solskjaer បាន​ព្រមាន​កីឡាករ Man Utd ថា​ពួកគេ​ត្រូវតែ​ធ្វើ​ឱ្យ​ប្រសើរ​ឡើង​នៅ​រដូវ​កាល​ក្រោយ​ដើម្បី​ធានា​ថា​ពួកគេ​មិន​ធ្លាក់​ចេញ​ពី​កំពូល​តារាង​ទាំង​៦។

ក្រុម​បិសាច​ក្រហម មាន​តែ​រំពឹង​ថា Arsenal, Chelsea និង Tottenham នឹង​មិន​បាន​ពិន្ទុ​សម្រាប់​ប្រកួត​ដែល​នៅ​សល់​ដើម្បី​អាច​មាន​ឱកាស​​ឡើង​ទៅ​កាន់​ក្រុម​កំពូល​តារាង​ទាំង​៤​វិញ។

គ្រូ​បង្វឹក​​របស់ Man United បាន​សារភាព​ថា​ការ​ប្រកួត​ប្រជែង​ដណ្ដើម​ពាន​នៅ​រដូវ​កាល​ក្រោយ​គឺ​លោក​ "គ្មាន​ភាព​ប្រាកដ​និយម​ឡើយ" តែថា លោក​នឹង​ប្រឹង​កសាង​ក្រុម​ឡើង​វិញ។

“នៅ​មាន Leicester, Everton, Watford ហើយ​ប្រហែល​ជា Newcastle សុទ្ធ​តែ​ជា​ក្លឹប​ដែល​ចង់​បណ្ដេញ​ជាមួយ​យើង"។ Solskjaer បាន​និយាយ។

“យើង​ត្រូវតែ​ប្រាកដ​ថា​​យើង​ត្រូវ​ប្រឹង​ប្រែង​ឡើង ដើម្បី​បន្ត​ឡើង​លើ​តារាង ពី​ព្រោះ​​មាន​ក្លឹបធំៗ ក្លឹប​ល្អៗ​​ជា​ច្រើន​ចង់​ដណ្ដើម​តំណែងក្រុម​កំពូល​តារាង​ទាំង​៦"។

ថ្លែង​ក្រោយ​បរាជ័យ​យ៉ាង​អាម៉ាស់ ៤-០ លើ​ក្រុម Everton គ្រូ​បង្វឹក​សញ្ជាតិ​ន័រវែស​បាន​និយាយ​ថា "ខ្ញុំ​នឹង​ទទួល​បាន​ជោគជ័យ​នៅ​ទីនេះ ប៉ុន្តែ​កីឡាករ​មួយ​ចំនួន​មិន​ចូលរួម​ជាមួយ​យើង​ទេ"។

“ការងារ​របស់​ខ្ញុំ​គឺ​ត្រូវ​គ្រប់គ្រង​ក្លឹប និង កីឡាករ។ យើង​ឲ្យ​ឱកាស​ទៅ​មនុស្ស ប៉ុន្តែ​ជួនកាល​ យើង​ត្រូវ​តែ​ដាច់​ធម៌​មេត្តា" ហើយ​និយាយ​ថា "សូមទោស អ្នក​មាន​ជម្រើស ហើយ​ខ្ញុំ​នឹង​មិន​ខ្លាច​ធ្វើ​វា​ទេ"។

អ្នក​ជំនាញ​វិភាគ​កីឡា​ភាគ​ច្រើន​​សុទ្ធ​តែ​មើល​ឃើញ​ថា​វិបត្តិ​នៅ​ Man Utd គឺ​សុទ្ធ​តែ Paul Pogba ដែល​ចង់​ចេញ​ទៅ Real Madrid ជា​អ្នក​បង្ក​ឡើង។ ដើម​រដូវ​កាល Pogba ធ្វើ​ស៊ី Jose Mourinho និង ទី​បំផុត​ចុង​រដូវ​កាល ខ្សែ​បម្រើ​រូប​នេះ​មិន​សហការ​ជាមួយ Solskjaer ម្នាក់​ទៀត៕

អាន៖ កីឡាករ​មួយ​តារាង​របស់​ Stoke City នៅ​ចាញ់​ប្រៀប Messi រឿង​មួយ

អាន៖ អតីត​ខ្សែប្រយុទ្ធ​ AC Milan អបអរ​ជ័យជម្នះ​ដោយ​លើក​ផ្ទាំង​រូបភាព​​ស្រី​ស្អាត​ចិន​បង្ហាញ​អ្នក​គាំទ្រ