ទេព ឡុងរចនា៖ កម្ពុជាមានខ្សែការពារល្អបំផុតពីររូប តែមិនសូវល្បី

2017-04-07 02:57:33
វិភាគ

2017-04-07 02:57:33
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ទេព ឡុងរចនា គ្រូបង្វឹកក្រុមបាល់ទាត់ក្រសួងការពារជាតិ (ទ័ព) លើកឡើងថា តាមក្រសែភ្នែករបស់លោក ក្រុមជម្រើសជាតិកម្ពុជាមានខ្សែការពារល្អបំផុតចំនួនពីររូបគឺ សឿយ វិសាល និង រស់ គង់សម្រេច។

រស់ គង់សម្រេច មិនបានជាប់ឈ្មោះក្នុងបញ្ជីកីឡាករទាំង ២៣នាក់របស់លោក Leonardo Vitorino គ្រូបង្វឹកក្រុមកម្ពុជានោះទេ កាលប្រមូលផ្ដុំប៉ះឥណ្ឌា និងហ្សកដានី។ ខណៈ សឿយ វិសាល បានជាប់ឈ្មោះ និងថែមទាំងបានបង្ហាញខ្លួនពេញ៩០នាទីទាំងពីរប្រកួតខាងលើទៀតផង។

ងាកទៅកាន់ទស្សនៈគ្រូបង្វឹកទ័ពដែលមានបទពិសោធន៍ជាង១០ឆ្នាំលោក ទេព ឡុងរចនា មើលឃើញថា កម្ពុជាមានខ្សែការពារតែពីររូបនេះប៉ុណ្ណោះដែលល្អជាងគេ។ ចំពោះ រស់ គង់សម្រេច ចំណុចល្អរបស់គេគឺជាកីឡាករហ៊ានប្ដូរ ឬហ៊ានប្រឈមគ្រោះថ្នាក់យកខ្លួនពាំងបាល់ ខណៈចំណុចខ្វះខាតគឺចូលយកបាល់ពីដៃគូជ្រៅពេក ដែលអាចធ្វើឲ្យដៃគូងាយមានឱកាសល្អនៅពេលញាក់ដាច់រូបគេ។

រស់ គង់សម្រេច

សម្រាប់ សឿយ វិសាល លោកមើលឃើញថា ចំណុចល្អរបស់កីឡាកររូបនេះត្រង់តាមប្រកៀកដៃគូល្អ កម្រនឹងឲ្យដៃគូគេចចេញពីខ្លួនបានងាយ និងជាកីឡាករដែលលេងដោយមានទំនុកចិត្តខ្ពស់។ ចំណែកចំណុចខ្សោយវិញលោកគិតថា កីឡាកររូបនេះមានភាពបត់បែនយឺតពេក ដែលជាចន្លោះប្រហោងមួយសំខាន់សម្រាប់តួនាទីជាខ្សែការពារ។