​អតីត​ខ្សែការពារ​របស់​ក្រុម ហង្សក្រហម Liverpool គឺ​លោក Jamie Carragher បាន​សរសើរ​​ ​Jamie Vardy ថា​នៅ​តែ​​ជា​កីឡាករ​​ដ៏​ល្អ​របស់​​ Leicester City បន្ទាប់​ពី​ជួយ​ក្រុម​បាន​តាម​ស្មើ​១-១​ ជាមួយ​ក្រុម​ខ្លាំង Spurs ក្នុង​ការ​ប្រកួត​បើក​ឆាក​សប្ដាហ៍​ទី​១​​ English Premier League ​នៅ​ទឹក​ដី​​ King Power Stadium ។

ការ​ប្រកួត​នេះ​គេ​ឃើញ​ថា បើក​ឆាក​មក​ Spurs ដែល​ជា​ក្រុម​ភ្ញៀវ​បាន​សម្រុក​យ៉ាង​ខ្លាំង និង​មាន​ឱកាស​ស៊ុត​ជា​ច្រើន​ទៅ​លើ​ក្រុមម្ចាស់​ផ្ទះ Leicester ប៉ុន្តែ​មិន​អាច​សម្រេច​គ្រាប់​បាល់​​បាន​ច្រើន​គ្រាប់​​នោះ​ទេ ហើយ​​ដល់​នាទី​ទី ២៩ ខ្សែ​ការពារ​ស្លាប Pedro Parro រក​បាន​មួយ​គ្រាប់​បន្ទាប់​ពី​​ខ្សែ​បម្រើ J Maddison បោះ​កាត់​​ចូល​យ៉ាង​ស្អាត​​។ ចប់​វគ្គ​ទី ១​​ក្រុម​ភ្ញៀវ​នាំ​មុខ​១​ទល់​០ ។

ចូល​ដល់​វគ្គ​ទី​២ ខ្សែ​​ប្រយុទ្ធ​ J Vardy ក៏​បាន​តាម​ស្មើ​នៅ​នាទី​ទី​៥៧ ​តាម​រយៈ​ការ​តែត​​​ បន្ទាប់​ពី​​មាន​ការ​លើក​បាល់​ចេញ​ពី​ស្លាប​បញ្ចូល​មក​កណ្ដាល​ដោយ A Fatawu ។ គ្រាប់​បាល់​នេះ​រក្សា​រហូត​ដល់​ចប់​ការ​ប្រកួត ​បើ​ទោះ​មាន​ការ​សម្រុក​គ្នា​ច្រើន​លើក និង​មា​ន​​ឱកាស​រក​គ្រាប់​បាល់​ច្រើន​លើក​យ៉ាង​ណា​ក៏​ដោយ​។

សូម​បញ្ជាក់​ការ​ប្រកួត​នេះ​ទើប​តែ​បើក​ឆាក​សម្រាប់​ក្រុម​ទាំង​ពីរ​ប៉ុណ្ណោះ ខណៈ​ដែល Vardy ​​បច្ចុប្បន្ន​នេះ​មាន​វ័យ​ជ្រេ​បន្តិច​ទៅ​ហើយ ពោល​គឺ ៣៧ ឆ្នាំ​ ប៉ុន្តែ​គុណភាព​ប្រយុទ្ធ​តែ​អែម៕ ​​