អេស្ប៉ាញបំបែកកំណត់ត្រាចំនួនពីរធំៗ ក្រោយឈ្នះអឺរ៉ូ

2024-07-15 13:48:04
បាល់ទាត់

2024-07-15 13:48:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមជម្រើសជាតិអេស្ប៉ាញបានយកឈ្នះអង់គ្លេសក្នុងលទ្ធផល ២ ទល់នឹង ១ នៅវគ្គផ្ដាច់ព្រ័ត្រកម្មវិធីអឺរ៉ូឆ្នាំ ២០២៤។ ការឈ្នះនេះ ធ្វើឲ្យបំបែកកំណត់ត្រាធំៗចំនួនពីររួមមាន៖

កំណត់ត្រាទី ១ គឺអេស្ប៉ាញក្លាយជាក្រុមជម្រើសជាតិដែលជោគជ័យជាងគេក្នុងប្រវត្តិសាស្ត្រកម្មវិធីអឺរ៉ូ។ គិតមកទល់នេះ ក្រុមជម្រើសជាតិមួយនេះ បានឈ្នះពានអឺរ៉ូដល់ទៅ ៤ លើក ពោលគឺនៅឆ្នាំ ១៩៦៤ ឆ្នាំ ២០០៨ ឆ្នាំ ២០១២ និងចុងក្រោយគឺឈ្នះ ២០២៤។ ជើងឯក ៤ សម័យកាលនេះ ធ្វើឲ្យអេស្ប៉ាញឈ្នះពានកម្មវិធីអឺរ៉ូជាងក្រុមជម្រើសជាតិណាណាទាំងអស់។ មុនឈ្នះពានអឺរ៉ូឆ្នាំ ២០២៤ អេស្ប៉ាញ មានកំណត់ត្រាឈ្នះពានអឺរ៉ូចំនួន ៣ លើក ដែលជាកំណត់ត្រារបស់ក្រុមជម្រើសជាតិអាល្លឺម៉ង់ផងដែរ។ អាល្លឺម៉ង់ធ្លាប់ឈ្នះពាននេះ កាលពីឆ្នាំ ១៩៧២ ឆ្នាំ ១៩៨០ និងឆ្នាំ ១៩៩៦។

កំណត់ត្រាទី ២ គឺអេស្ប៉ាញក្លាយជាក្រុមជម្រើសជាតិតែមួយគត់ដែលលេងឈ្នះគ្រប់ប្រកួតទាំងអស់ក្នុងកម្មវិធីអឺរ៉ូ។ ក្នុងព្រឹត្តិការណ៍ Euro 2024 កន្លងទៅ អេស្ប៉ាញលេងសរុបចំនួន ៧ ប្រកួត ឈ្នះទាំង ៧ ដង ហើយមិនដែលស្គាល់សោះពាក្យថាចាញ់ ឬស្មើ។

អឺរ៉ូគឺជាព្រឹត្តិការណ៍បាល់ទាត់ក្រុមជម្រើសជាតិដ៏ធំនៅទ្វីបអឺរ៉ុប ហើយចាប់បដិសន្ធិឡើងដំបូងនៅឆ្នាំ ១៩៦០។ អឺរ៉ូត្រូវបានប្រារព្ធឡើងរៀងរាល់ ៤ ឆ្នាំម្ដង។ គិតមកទល់ពេលនេះ កម្មវិធីនេះត្រូវបានរៀបចំចំនួន ១៧ លើកហើយ។

ក្នុងចំណោមកម្មវិធីអឺរ៉ូចំនួន ១៧ លើកនោះ អេស្ប៉ាញជាប់បានចូលលេងចំនួន ១២ ដង ឈ្នះ ៤ ដង ជើងឯករងម្ដង ធ្លាក់ត្រឹមវគ្គ Semi Final ម្ដង ធ្លាក់ត្រឹមវគ្គ៨ ក្រុមចំនួន ២ លើក ធ្លាក់ត្រឹមវគ្គ ១៦ ក្រុម ១ លើក និងធ្លាក់ត្រឹមវគ្គចែកពូលចំនួន ៣ ដង៕