ទូចអង្គរក្ស ចាប់ផ្ដើមលេងបាល់ខ្លាំងពេលរៀនថ្នាក់ទី១០ នៃវិទ្យាល័យឧដុង្គ នៅស្រុកកំណើតខេត្តកំពង់ស្ពឺ។ ទូចលេងឈ្នះអស់រៀមច្បងក្នុងសាលា រហូតដើរលេងតាមភូមិ និងមានសមត្ថភាពល្អឡើងៗ។

លុះប្រឡងបាក់ឌុបចប់ឆ្នាំ២០០៨ ស្មាត់ឈ្មោះកំណើត​ ផាត សុភ័ត្រ ក៏​បាន មកហ្វឹកហាត់នៅក្លឹបកងពលធំអន្តាគមន៍លេខ៣ តាមរយៈភាកងពល និងឆ្លៀត​បន្តការសិក្សាអាហាររូបករណ៍ ជំនាញអក្សរសាស្ត្រអង់គ្លេស នៅសាកលវិទ្យាល័យន័រតុន។

លេងឱ្យ​ក្លឹបនេះស្មាត់វ័យ៣៣ឆ្នាំ ដណ្ដើមបានពានរង្វាន់បាល់ទះឆ្នេរខ្សាច់២ស្មើ ដែលរៀបចំដោយក្រុមហ៊ុនស្រាបៀរអាន់ឆ័រ ២ឆ្នាំជាប់គ្នាឆ្នាំ២០១៣ និងឆ្នាំ២០១៤។ ចំណែកការប្រកួតដណ្ដើមពានរង្វាន់បាល់ទះលើក្ដារ រៀបចំដោយក្រុមហ៊ុនស្រាបៀរលីអូ ឬ LEO Cup ទូចមិនធ្លាប់ជួយក្រុមលើកពានទេ គឺបានត្រឹមចំណាត់ថ្នាក់លេខបីប៉ុណ្ណោះ។

កំពុងលេងឱ្យ​កងពល ផាត សុភ័ក្រ បានជាប់ជម្រើសជាតិបាល់ទះឆ្នេរខ្សាច់នៅរវាងឆ្នាំ២០១២ ដល់ឆ្នាំ២០១៤ ហើយចេញប្រកួត​ពាននៅប្រទេសចិន មាន​ជាង៤០​ប្រទេស និងប្រទេសថៃមាន១០ប្រទេសចូល​រួម​។ យ៉ាងណា សុភ័ក្រ មិនបានឈ្នះ​ពាន​អ្វីឡើយ ព្រោះសមត្ថភាពក្រុម​នៅមានកម្រិត ត្រូវរៀនសូត្របន្ថែម។ ព្រោះរវល់នឹងការសិក្សា ខណៈបាល់ត្រូវហាត់ព្រឹកល្ងាច ផង​នោះ ស្មាត់មកពីខេត្ត​កំពង់ស្ពឺក៏បានលាឈប់ពីជម្រើសជាតិ ត្រឹមឆ្នាំ២០១៤ តែម្ដង។

ក្នុងឆ្នាំ២០១៤ កីឡារករកម្ពស់ ១,៧៥ម៉ែត្រ បានចេញពីកងពលទៅលេងឱ្យ​ក្លឹបបញ្ជាការដ្ឋានអង្គរក្ស និងជាប់ឈ្មោះទូចអង្គរក្សរហូតសព្វថ្ងៃ។ នៅក្លឹបនេះគេមិនបានលេងពានអ្វីឡើយ ព្រោះគ្មានការប្រកួតផ្លូវការណាមួយកើតឡើង ហើយ​ក៏​បានឈប់ពីអង្គរក្សបញ្ចប់អាជីពមួយនេះនៅត្រឹម​ឆ្នាំ២០១៦ ដ្បិតដកឃ្លារមិនរួចពីការងារ។

ការប្រកួតក្រៅផ្លូវការក្នុង​ស្រុក

និយាយទៅទូចអង្គរក្ស ចាប់​ផ្ដើមឡើងខ្លាំងបំផុតនៅ​រវាងឆ្នាំ២០១១ ដល់ ២០១៦ ហើយសឹង​តែ​គ្មាន​គូ​ប្រកួតបីស្មើពេញ​សាច់។ ក្រោយៗមកម៉ាប់ឆ្វេង សុវណ្ណនាថឡើង​ដៃ ទើបមានការប្រកួតបីស្មើកើតឡើង ប៉ុន្តែកាលនោះទូចប្រាប់ថា កីឡាកររបស់ខ្លួនឡើងគីឡូអស់ហើយ នៅសល់តែខ្លួនម្នាក់ដែលរក្សារាងនៅដដែល។ ការប្រកួតមានឈ្នះចាញ់ឈ្នះចាញ់ ប៉ុន្តែ​ភាគច្រើនទូចអង្គរក្ស ច្រើនតឱ្យ​គូប្រគួត ២-៣ ឬ ២-៤ ជាដើមជា​ពិសេស​នៅ​តាម​បណ្ដា​ខេត្ត​។

ការប្រកួតក្រៅប្រទេស

ទូចអង្គរក្សត្រូវបានម្ចាស់ Sponsor នាំទៅលេងស៊ីលុយនៅក្រៅប្រទេសបីស្មើបួនស្មើដូចជានៅប្រទេសវៀតណាម ថៃ ឡាវ ម៉ាឡេស៊ី និងមីយ៉ាន់ម៉ា។ ចេញលេងនៅក្រៅប្រទេស ទូចលេងកម្រចាញ់ណាស់។

ចំណុចខ្លាំងរបស់ទូចអង្គរក្ស

• ការវាយសេវា៖ ដោយធ្លាប់ជាកីឡាករ​ជម្រើសជាតិឆ្នេរខ្សាច់ ទូចអង្គរក្សច្បាស់ប្រអប់។ គាត់​គប់សេវាលឿន ស្រួច ហើយធ្ងន់។ ជាឧទាហរណ៍ចង់ខ្សែត្រង់ខ្សែត្រង់ ចង់ត្រាវែត្រាវែ មាន​ចន្លោះកន្លែងណាទៅកន្លែងហ្នឹង អាចបញ្ជាបានដូចចិត្ត។

• ការម៉ាត់៖ កាលទូចអង្គរក្សកំពុងពេញឡើង បាំងមួយបាំងពីរមិនមែនជាឧបសគ្គទេ គឺគាត់ម៉ាត់ច្បាស់ ដាច់ល្អ ហើយធ្ងន់។ ទូអង្គរក្សម៉ាត់មើលតាមរនាំង ហើយភាគច្រើនគាត់ចូលចិត្តវៃត្រាវែ។

• ការបាំង៖ បើនិយាយពីបាំងទូចអង្គរក្សក៏បាំងល្អដែរ ពោលគឺគាត់មើលចង្កេះ។

• ការការពារ (Libero) និង​ការ​ចាប់​សេវា៖ បើលេងបីស្មើគូខ្លាំងៗ ទូចអង្គរក្សច្រើនប្រើបាំងពីរ និងជើងក្រោមមួយ។ អ្នកសារ៉េជើងក្រោមគឺរូបគាត់ហ្នឹងឯង។ គាត់លឿន រហ័សរហួន ហើយ​​ចាប់​សេវា​រឹង​ល្អ។

កម្រិតវប្បធម៌

ទូចបានបញ្ចប់ថ្នាក់ទី១២ នៃវិទ្យាល័យឧដុង្គឆ្នាំ២០០៨ និងបានរៀនអាហារូបករណ៍នៅ​សាកលវិទ្យាល័យន័រតុន ជំនាញអក្សរសាស្ត្រអង់គ្លេស។

ការងារ និងជីវិតគូ

ទូចអង្គរក្សបានរៀបការជាមួយភរិយាឆ្នាំ២០១៨ ដោយ​ទទួលបានចំណងដៃកូនស្រីម្នាក់អាយុជាងមួយខួប។ បើអាជីវកម្មវិញទូចអង្គរក្ស មានតារាងបាល់ទះនិងហ្គារ៉ាស់សាំងមួយនៅឯស្រុកកំណើតរ។

គួរបញ្ជាក់ថាបន្ទាប់​ពីជំនាន់លោកគ្រូសោមចំណាប់ គឺទូចអង្គរក្សនេះហើយ ចាប់ផ្ដើមឡើងកូដខ្លាំងបំផុត និងបន្តបន្ទាប់មកទៀតមានដាវញីឈ្មោល ម៉ាប់ឆ្វេង សុវណ្ណនាថ ស្មាត់រ៉ាអង្គរក្ស អធិរាជប្រអប់រាជ អធិរាជបាំងរស់ហាន់វ៉ា ស្មាត់យក្សមហាផ្ទៃ យុនស្រែស្រែ ឥន្ទ្រីពិឃាដឌូក អ្នក​លេង​ផ្លែ​សេវា​វ័យ​ក្មេង​រស់វេត និងស្មាត់កំពុង​ឡើង​កូដ​ ធី ម៉េងហ៊ួង វ័យ​១៩​ឆ្នាំ​​របស់​ក្លឹប​ក្រសួង​មហាផ្ទៃ៕