- 2017-01-18 11:01:00
- ប្រដាល់
ពេជ្រ សីហា ប្ដេជ្ញាខំប្រឹងឡើងវិញ ក្រោយដឹងថាខ្លួនដើរផ្លូវខុស
- 2017-01-18 11:01:00
- ចំនួនមតិ 0 | ចំនួនចែករំលែក 0
ពេជ្រ សីហា ប្ដេជ្ញាខំប្រឹងឡើងវិញ ក្រោយដឹងថាខ្លួនដើរផ្លូវខុស
ចន្លោះមិនឃើញ
អ្នកប្រដាល់រហស្សនាមម៉ៃថៃសាន់ខ្មែរ ពេជ្រ សីហា ប្ដេជ្ញាចិត្តខំប្រឹងហ្វឹកហាត់ឡើងវិញដើម្បីឡើងប្រកួតស្ដារមុខមាត់ក៏ដូចជាកេរ្តិ៍ឈ្មោះដែលធ្លាប់មានការពីមុនមកវិញក្រោយដឹងខ្លួនថាដើរផ្លូវខុសឆ្គងនាពេលកន្លងមក។
ជើងខ្លាំងប្រដាល់គុនខ្មែរ ពេជ្រ សីហា បានលើកឡើងពីការប្ដេជ្ញាចិត្តថា គេនឹងកែខ្លួនឡើងវិញក្រោយពេល ដឹងខ្លួនដើរផ្លូវខុស។ គេនឹងឈប់ដើរលេងឬ លែងប្រព្រឹត្តអ្វីដែលធ្លាប់ធ្វើមិនល្អពីមុនមក នៅពេលនេះគឺខំប្រឹងប្រែងហាត់ដើម្បីមានសមត្ថភាពពេញបរិបូរណ៍នៅពេលឡើងប្រកួតនាពេលខាងមុខ។
កីឡាករចូលចិត្តប្រើកណ្ដាប់ដៃរូបនេះបន្ថែមទៀតថា ពិតជាស្ដាយកេរ្តិ៍ឈ្មោះដែលធ្លាប់សាងមកយ៉ាងលំបាកទម្រាំបានល្បី ប៉ុន្តែត្រូវរសាយស្ទើរសូន្យតែមួយរយៈពេលខ្លីដែលខ្លួនដើរខុសតែបន្តិច។ ដោយមើលឃើញថា បច្ចុប្បន្នមានទីផ្សារប្រដាល់កាន់តែច្រើនជាងមុន និងមានតម្លៃខ្លួនក៏ខ្ពស់គួរសម ដូច្នេះរូបគេតាំងចិត្តជំរុញខ្លួនឯងខំប្រឹងប្រែង និងចាប់អាជីពនេះវិញ។ ក្រៅពីប្រដាល់ជើងខ្លាំងរូបនេះមិនដឹងថា ត្រូវធ្វើការងារអីនោះទេ ហើយបើធ្វើការវិញចំណេះក៏គ្មាន។
ពេជ្រ សីហា ដែលជាកីឡាករដែលមានបទពិសោធន៍ច្រើន ធ្លាប់ឆ្លងកាត់សង្វៀនផ្សេងៗរាប់មិនអស់ មិនថានៅក្នុងស្រុកឬនៅក្រៅស្រុកនោះទេ។ ជើងខ្លាំងត្រកូល ពេជ្រ ម្នាក់នេះជាប្អូនរបស់ចៅក្រម និងអាជ្ញាកណ្ដាល ពេជ្រ សុផាន ដែលកំពុងបម្រើការនៅសង្វៀនទូរទស្សន៍បាយ័ន។ គេបាត់មុខមួយរយៈពេលចាប់តាំងពីចាញ់ ឡុង សុវណ្ណឌឿន នៅវគ្គផ្ដាច់ព្រ័ត្រខ្សែក្រវាត់សមរភូមិអ្នកប្រយុទ្ធមកម្ល៉េះ៕
