- 2016-10-10 21:36:50
- ប្រដាល់
អ៊ុង វីរៈ ថាផ្ដួលថៃម្សិលមិញជារឿងមិននឹកស្មានដល់
- 2016-10-10 21:36:50
- ចំនួនមតិ 0 | ចំនួនចែករំលែក 0
អ៊ុង វីរៈ ថាផ្ដួលថៃម្សិលមិញជារឿងមិននឹកស្មានដល់
ចន្លោះមិនឃើញ
អ្នកប្រដាល់ជើងខ្លាំងទម្ងន់ធ្ងន់ អ៊ុង វីរៈ បង្ហាញពីអារម្មណ៍រំភើបខ្លាំង និងបញ្ចេញទស្សនៈសឹងមិនគូឲ្យជឿអាចផ្ដួលជើងខ្លាំងមកពីថៃ Phetbupha ឲ្យបោះបង់ការប្រកួតនៅទឹកទី៤ ម្សិលមិញសម្រាប់ការប្រកួតវគ្គសន្សំពិន្ទុដណ្ដើមខ្សែក្រវាត់ PNN ដែលឧបត្ថម្ភដោយភេសជ្ជៈគោជល់។
សិស្សគុនខ្មែរក្នុងក្លឹបទ័ពពិសេសឆ័ត្រយោង៩១១រូបនេះធ្លាប់ជួបកីឡាករថៃនេះពីរលើករួចមកហើយ ដោយលើកទី១ធ្វើបានត្រឹមស្មើគ្នា និងលើកទី២រូបគេឈ្នះពិន្ទុ។ ដោយឡែកជួបគ្នាលើកទី៣នៅសង្វៀន PNN ម្សិលមិញកីឡាករដែលកំពុងបម្រើការងារជាយោធារូបនេះបានទាត់កីឡាករថៃឲ្យមានរបួសជើងមិនអាចបន្តការប្រកួតបានត្រឹមទឹកទី៤។
ចប់ការប្រកួតភ្លាមសិស្សរួមគ្រូ ព្រុំ សំណាង រូបនេះបានឲ្យដឹងថា Phetbupha ជាកីឡាករថៃមួយរួបដែលមានជំហររឹងមាំល្អ និងគ្រប់ដៃគូរបស់គេពិបាកផ្ដួលឲ្យសន្លប់ ឬបោះបង់ការប្រកួត។ ប៉ុន្តែដោយសារជួបគ្នាពីរលើកកន្លងមក វីរៈ ដឹងពីចំណុចខ្សោយជើងក្រោមទើបទាត់ឲ្យកីឡាករថៃរូបនេះមានរបួសមិនអាចបន្តការប្រកួតបាន។
កូនសិស្សលោក ហង្ស សឿន រូបនេះបន្តថា ផ្ដួល Phetbupha ឲ្យចុះចាញ់ត្រឹមទឹកទី៤ ជារឿងមិនគួរឲ្យជឿ។ ទន្ទឹមនឹងនោះកត្តាដែលអាចឲ្យ វីរៈ អាចផ្ដួលកីឡាករថៃរូបនេះបានដោយសារការខំប្រឹងប្រែងហ្វឹកហាត់របស់គេ។
មួយគួទៀតកីឡាករកម្ពុជា ព្រំ សំណាង បានយកឈ្នះជើងខ្លាំងថៃ Nakrobdam ដោយពិន្ទុ។ ដូច្នេះការប្រកួតដណ្ដើមខ្សែក្រវាត់ PNN នេះកីឡាករ អ៊ុង វីរៈ មានពិន្ទុ ៣ស្មើ ព្រំ សំណាង ប៉ុន្តែរូបគេមានប្រៀបជាងបន្តិចដោយផ្ដួលថៃឲ្យចុះចាញ់ត្រឹមទឹកទី៤។ ចំណែកកីឡាករ មាស ភារម្យ និង សុខ ទូច សុទ្ធតែបរាជ័យនាប្រកួតទីមួយដូចគ្នា៕
វីដេអូការប្រកួតរវាង អ៊ុង វីរៈ និង Phetbupha
អត្ថបទ៖ ស្រី សុវណ្ណដារ៉ា
