- 2015-12-21 17:25:36
- ប្រដាល់
សរ សី ត្រៀមចេញទៅបង្ហាត់ និងឡើងសង្វៀននៅជប៉ុន ១ឆ្នាំ
- 2015-12-21 17:25:36
- ចំនួនមតិ 0 | ចំនួនចែករំលែក 0
សរ សី ត្រៀមចេញទៅបង្ហាត់ និងឡើងសង្វៀននៅជប៉ុន ១ឆ្នាំ
ចន្លោះមិនឃើញ
កីឡាករ សរ សី រួមទាំងអ្នកប្រដាល់កម្ពុជា ៣រូបផ្សេងទៀត នឹងឡើងយន្តហោះចេញទៅប្រទេសជប៉ុននៅថ្ងៃទី៥ ខែមករា ឆ្នាំ២០១៦ ខាងមុខ ដើម្បីបង្ហាត់ព្រមទាំងឡើងសង្វៀនប្រកួតជាមួយកីឡាករបរទេស និងជប៉ុន ដើម្បីដកស្រង់បទពិសោធន៍រយៈពេលមួយឆ្នាំពេញ។
សរ សី បានប្រាប់ Sabay ថា រូបគេនឹងចេញទៅប្រទេសជប៉ុននៅថ្ងៃទី០៥ ខែមករាខាងមុខ ដើម្បីបង្ហាត់កីឡាករប្រដាល់នៅប្រទេសជប៉ុន ព្រមទាំងឡើងសង្វៀនប្រកួតដកស្រង់បទពិសោធន៍រៀងរាល់ ១ខែម្ដង។ អ្នកប្រដាល់វ័យចាស់រូបនេះ បានបញ្ជាក់បន្ថែមថា មានកីឡាករ ៣រូបផ្សេងទៀតក៏ត្រូវធ្វើដំណើរទៅប្រទេសជប៉ុនជាមួយគ្នា ដែលក្នុងនោះមាន កីឡាករ ទិត្យ សុវណ្ណគិរី, ខុន រាជ និង រិទ្ធ អារុណ។
ការធ្វើដំណើរទៅចេញទៅក្រៅប្រទេសរយៈពេលមួយឆ្នាំនេះ គឺភាគីជប៉ុនជាអ្នកទាក់ទងមក និងរៀបចំឲ្យទាំងអស់ ដោយមានការយល់ព្រមពីសហព័ន្ធកីឡាប្រដាល់កម្ពុជា។ សរ សី បានបញ្ជាក់ឲ្យដឹងថា ខ្លួនអាចទទួលបានប្រាក់ខែប្រហែល ៥០០ដុល្លារ។ ចំពោះការឡើងប្រកួតមួយខែម្ដង ទទួលបាន ៣០០ដុល្លារ និងឈ្នះ ៤០០ដុល្លារ ឬអាចលើសពីនេះ ប្រសិនបើសមត្ថភាពខ្លាំង និងមានបទពិសោធន៍ខ្ពស់។
សរ សី ជាកីឡាករប្រដាល់តស៊ូម្នាក់ ព្រោះត្រូវទទួលបន្ទុករ៉ាប់រងគ្រួសារទាំងមូល ដែលមានកូន ៣នាក់ និងក្មួយ ២នាក់ ព្រមទាំងម្ដាយចាស់ម្នាក់នៅជាមួយ។ កីឡាករមកពីខេត្តកណ្ដាលរូបនេះសង្ឃឹមថា បន្ទាប់ពីត្រលប់មកពីប្រទេសជប៉ុនវិញ រូបគេអាចរកប្រាក់ខ្លះមករំលោះបំណុល និងផ្គត់ផ្គង់គ្រួសារ៕
ចុចអាន៖ សរ សី ស៊ូសម្រក់ញើសឈាមលើសង្វៀន គ្រាន់បើជាងធ្វើសំណង់សម្រក់ទឹកភ្នែក
ចុចអាន៖ សរ សី ប្រឹងប្រែងរហូតឈ្នះ ជីម ចិត្រា ដណ្ដើមបានប្រាក់ ២ពាន់ដុល្លារនៅ One Championship
អត្ថបទ៖ គង់ វិសាល
