- 2015-10-22 21:42:37
- ប្រដាល់
ពេជ្រ សីហា ខកខានកម្មវិធីលុយធំ២ បានត្រឹមមិត្តភាពអន្តរជាតិនៅថ្ងៃអាទិត្យ
- 2015-10-22 21:42:37
- ចំនួនមតិ 0 | ចំនួនចែករំលែក 0
ពេជ្រ សីហា ខកខានកម្មវិធីលុយធំ២ បានត្រឹមមិត្តភាពអន្តរជាតិនៅថ្ងៃអាទិត្យ
ចន្លោះមិនឃើញ
អ្នកប្រដាល់មុខតាន់ ពេជ្រ សីហា បានខកខានកម្មវិធីប្រកួតអន្តរជាតិដែលមានប្រាក់រង្វាន់ធំពីរ គឺ Thai Fight នៅប្រទេសវៀតណាមថ្ងៃទី២៤ នេះ និងការប្រកួតលក្ខណៈអន្តរជាតិនៅបាងកកនាថ្ងៃទី២៥ ដោយជំនួសមកវិញបានត្រឹមប្រកួតមិត្តភាពអន្តរជាតិជាមួយកីឡាករថៃលើសង្វៀនបាយ័ននាថ្ងៃអាទិត្យ។
ដំបូងឡើយខាងភាគីរៀបចំការប្រកួត Thai Fight បានទាក់ទង ពេជ្រ សីហា ឲ្យចូលរួមប្រកួតនៅប្រទេសវៀតណាមដូចគ្នានឹងកីឡាករ កែវ រំចង់ នៅថ្ងៃទី២៤ នេះដែរ ប៉ុន្តែដោយសារគេឲ្យប្រកួតក្នុងគីឡូ៦៥ ហើយ សីហា ត្រូវសម្រកមកដល់គីឡូ៦៧ ទើបមិនអាចចូលរួមបាន។ ចំណែកការប្រកួតលក្ខណៈអន្តរជាតិមួយទៀតនៅបាងកកក៏ត្រូវខកខានដូចគ្នា ដោយសាររត់ឯកសារយឺតពេក ទើបត្រូវប្ដូរកីឡាករថ្មី។
សីហា បានបញ្ជាក់ថា ការខកខានប្រកួតក្រៅប្រទេសនេះ ធ្វើឲ្យរូបគេបាត់បង់លុយធំនៅចំពោះមុខ។ អ្នកប្រដាល់មកពីពីខេត្តតាកែវរូបនេះ ធ្លាប់ឡើងសង្វៀន Thai Fight កាលពីដើមខែមេសាម្ដងរួចមកហើយ ដោយទទួលបានតម្លៃខ្លួន១៥០០ដុល្លារ ប៉ុន្តែលើកនេះប្រសិនបើបានទៅប្រាកដជាអាចឡើងដល់ ២ពាន់ដុល្លារដូច កែវ រំចង់។
ចំណែកការប្រកួតមិត្តភាពអន្តរជាតិនៅសង្វៀនបាយ័ន កីឡាករ ពេជ្រ សីហា ត្រូវប៉ះកីឡាករថៃ Khom Pichit។ សីហា បានអះអាងថា រូបគេកំពុងប្រឹងប្រែងហ្វឹកហាត់យ៉ាងខ្លាំង និងសង្ឃឹមខ្ពស់ក្នុងការប្រកួតនេះ បើទោះបីមិនទាន់ស្គាល់ប្រវត្តិកីឡាករថៃច្បាស់ក្ដី៕
អត្ថបទ៖ គង់ វិសាល
