ទាយមើល៍ សំ ថារ័ត្ន និង Nagaowa ឆ្លងផុតទឹកទី៣អត់នៅ One FC ល្ងាចនេះ?

2014-12-05 16:56:17
ប្រដាល់

2014-12-05 16:56:17
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាការិនីកម្ពុជាកញ្ញា សំ ថារ័ត្ន និងកីឡាការិនីម្ចាស់ផ្ទះហ្វីលីពីន Jujeath Nagaowa ត្រូវតតាំងគ្នាវេលាម៉ោង៦ល្ងាចនេះហើយក្នុងព្រឹត្តិការណ៍ One FC: Warrior’s Way នៅទីក្រុងម៉ានីល ប្រទេសហ្វីលីពីន។

ការប្រកួតនៅលើសង្វៀន One FC របស់កីឡាការិនីទាំងពីររូបនេះសុទ្ធតែឆ្លងមិនផុតទឹកទី៣ដូចគ្នាសម្រាប់ការប្រកួតរបស់ពួកគេ។ កីឡាការិនីល្បុក្កតោ សំ ថារ័ត្នបានផ្តួលមិត្តរួមជាតិ វី ស្រីឆាយ ក្នុងទឹកទី១ នៅព្រឹត្តិការណ៍ One FC: Rise of the Kingdom នៅប្រទេសកម្ពុជាកាលពីថ្ងៃទី១២ ខែកញ្ញា ឆ្នាំ២០១៤។ ចំណែកកីឡាការិនីហ្វីលីពីន Jujeath Nagaowa បានផ្តួលកីឡាការិនីឥណ្ឌា Jeet Toshi ក្នុងទឹកទី២នៅស្រុកកំណើតទីក្រុងម៉ានីល ប្រទេសហ្វីលីពីនកាលពីដើមឆ្នាំ២០១៤។

បើនិយាយពីបទពិសោធន៍កីឡាការិនីទាំងពីររូបមានលក្ខណៈពិសេសរៀងៗខ្លួន។ កីឡាការិនីម្ចាស់ផ្ទះហ្វីលីពីនធ្លាប់ប្រកួតប្រដាល់សាកលអាជីពបានចំនួន២៥ដងក្នុងនោះឈ្នះ១២ដង និងចាញ់១៣ដងដោយធ្លាប់គ្រងខ្សែក្រវាត់ប្រដាល់សាកល WBC Asia Atomweight Champion ប្រចាំទ្វីបអាស៊ី។

ចំពោះកីឡាការិនីកម្ពុជាវិញ សំ ថារ័ត្ន មិនធ្លាប់បានប្រកួតនឹងកីឡាការិនីបរទេសទេកន្លងមកទាំងប្រដាល់គុនចម្រុះ និងក្បាច់ខ្មែរបុរាណ។ បទពិសោធន៍លើសង្វៀនប្រដាល់សេរី កីឡាការិនីរូបនេះធ្លាប់ប្រកួតបាន១២ដងប៉ុណ្ណោះ ប៉ុន្តែទទួលបានជ័យជម្នះច្រើនជាងចាញ់។ បន្ទាប់ពីការប្រកួតនេះកញ្ញានឹងត្រូវប្រកួតប្រដាល់សេរីមួយទៀតក្នុងព្រឹត្តិការណ៍បុណ្យសមុទ្រខេត្តកោះកុងនាពេលខាងមុខ។

កាលពីម្សិលមិញ សំ ថារ័ត្នបួងសួង និងរំលឹកនឹកគុណអ្នកមានគុណទាំងពីរឲ្យជួយជាអំណាច និងកម្លាំងចិត្តដើម្បីទទួលបានជ័យជំនះសម្រាប់ការប្រកួតល្ងាចនេះ។

សំ ថារ័ត្ន និង Jujeath Nagaowa នឹងក្លាយជាគូបើកឆាកនៃព្រឹត្តិការណ៍ One FC: Warrior’s Way វេលាម៉ោង៦ល្ងាចនេះថ្ងៃសុក្រ ទី៥ ខែធ្នូ ឆ្នាំ២០១៤។ ទូរទស្សន៍ MYTV មិនបានផ្សាយបន្តផ្ទាល់ភ្លាមៗទេល្ងាចនេះ ប៉ុន្តែនឹងចាក់ផ្សាយនៅវេលាម៉ោង៨ព្រឹកស្អែក៕