តើអាចមានឱកាសបែបនេះទេ! សែន រ៉ាដេត ចង់ប្រកួតលុយធំ ឬដណ្ដើមឡានដូចគេដែរមុនចូលនិវត្តន៍ក្នុងពេលណាមួយ...

2024-10-08 04:40:58
ប្រដាល់

2024-10-08 04:40:58
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកលេងគុនខ្មែរដើមកំណើតពីខេត្តកោះកុង សែន រ៉ាដេត ថាខ្លួនពិតជាចង់មានឱកាសពិសេសៗដូចកីឡាករដទៃណាស់ដូចជាការដណ្ដើមប្រាក់រង្វាន់ធំៗ ថវិកា ឡាន ឬផ្ទះ ជាដើមព្រោះខ្លួនប្រឡូកក្នុងវិស័យប្រដាល់នេះយូរដែរហើយ។

រូបភាពហ្វេសបុក រ៉ាដេត

សែន រ៉ាដេត បានឲ្យដឹងថា រូបគេប្រឡូកក្នុងវិស័យប្រដាល់នេះយូរឆ្នាំមកហើយ ដូច្នេះមិនដឹងថាអាចនឹងបន្តបានយូរប៉ុណ្ណាទៀតនោះទេ។ យ៉ាងណាបច្ចុប្បន្ននេះខ្លួនពិតជាចង់មានឱកាសបានលេងកម្មវិធីធំដូចកីឡាករមួយចំនួនផងដែរអាចជាការដណ្ដើមឡាន ផ្ទះ ឬប្រាក់រង្វាន់ធំផ្សេងៗដើម្បីបន្សល់ជាទ្រព្យសម្បត្តិក៏ដូចជាកេរ្តិ៍ដំណែលពីប្រដាល់មុនឈានដល់ពេលចូលនិវត្តន៍។

រូបភាពហ្វេសបុក រ៉ាដេត

អ្នកប្រដាល់ចិត្តសឿង និងវាយមិនចេះលាក់រូបនេះបន្ថែមទៀតថា ដោយសារអំឡុងប៉ុន្មានឆ្នាំចុងក្រោយនេះវិស័យប្រដាល់គុនខ្មែរមានការឧបត្ថម្ភ និងរៀបចំកម្មវិធីធំៗក៏ច្រើនផងនោះទើបរូបគេចង់មានឱកាសពិសេសបែបនេះដែរ។ រ៉ាដេត សង្ឃឹមថាម្ចាស់ឧបត្ថម្ភកម្មវិធីផ្សេងៗនឹងផ្ដល់ឱកាសដល់គីឡូស្រាលៗដូចជារូបគេបានលេងនៅថ្ងៃណាមួយជាមិនខាន។

រូបភាពហ្វេសបុក រ៉ាដេត

បញ្ជាក់ដែរថា សែន រ៉ាដេត ជាប្អូនប្រុសរបស់ សែន រ៉ាឌី និង ឆ្លាម ស ដែលជាអតីតជើងខ្លាំងក្នុងវិស័យប្រដាល់គុនខ្មែរនាពេលកន្លងមក។ ត្រកូល សែន មកពីខេត្តកោះកុងទាំង៣រូបខាងលើនេះគឺមានកេរ្តិ៍ឈ្មោះល្បី និងទទួលបានការស្រឡាញ់ចូលចិត្តជាខ្លាំងពីសំណាក់អ្នកគាំទ្រប្រដាល់គុនខ្មែរ។ បច្ចុប្បន្ននេះគឺនៅសល់តែ សែន រ៉ាដេត នោះទេដែលបន្តឡើងប្រកួតតាមសង្វៀនផ្សេងៗ។ ប៉ុន្តែអ្នកទាំង៣ក៏បានបង្កើតក្លឹបប្រដាល់មួយផងដែរឈ្មោះក្លឹបប្រដាល់គុនខ្មែរដែនសមុទ្រដែលកំពុងបណ្ដុះបណ្ដាលថ្នាលគុនខ្មែរ និងចូលរួមពង្រីកផ្សព្វផ្សាយមរតកក្បាច់គុនមួយនេះទាំងឆាកជាតិ-អន្តរជាតិ៕