![](http://cdn.sabay.com/cdn/media.sabay.com/media/sabay-news/Sport-News/Local-Sports/Kun-Khmer-Boxing/Meas-Mue/668b81c5d29de_1720418700_medium.jpg)
- 2024-07-08 06:10:12
- ប្រដាល់
កីឡាករ មាស ម៉ើ៖ ខ្ញុំចង់ជាប់ជាជម្រើសជាតិផ្នែកគុនចម្រុះ និងប្រកួតតំណាងប្រទេសកម្ពុជាជាយូរហើយឥលូវបានសម្រេចក្ដីស្រមៃ
- 2024-07-08 06:10:12
- ចំនួនមតិ 0 | ចំនួនចែករំលែក 0
កីឡាករ មាស ម៉ើ៖ ខ្ញុំចង់ជាប់ជាជម្រើសជាតិផ្នែកគុនចម្រុះ និងប្រកួតតំណាងប្រទេសកម្ពុជាជាយូរហើយឥលូវបានសម្រេចក្ដីស្រមៃ
ចន្លោះមិនឃើញ
កីឡាករជើងខ្លាំង មាស ម៉ើ ថាក្ដីស្រមៃជាយូរឆ្នាំមកហើយនោះគឺចង់ជាប់ជាកីឡាករជម្រើសជាតិផ្នែកកីឡាគុនចម្រុះ (MMA) ឥលូវសម្រេចបំណងមួយនេះហើយ ខណៈការខំប្រឹងប្រែងលះបង់ ១០០% ត្រៀមការប្រកួត AMMA ថ្ងៃទី១១ ខែកក្កដា ២០២៤ ខាងមុខនេះ។
មាស ម៉ើ បានឲ្យដឹងថា ជារឿងសប្បាយចិត្តរកអ្វីប្រៀបពុំបានបន្ទាប់ពីសម្រេចក្ដីស្រមៃក្លាយជាកីឡាករជម្រើសជាតិផ្នែកគុនចម្រុះ (MMA) នៅពេលនេះ និងកំពុងហ្វឹកហាត់ត្រៀមប្រកួតតំណាងប្រទេសកម្ពុជាបែបនេះ។ នេះជាក្ដីស្រមៃជាយូរមកហើយថាថ្ងៃណាមួយកម្ពុជានឹងមានជម្រើសជាតិផ្នែកនេះ មានប្រមូលផ្ដុំហ្វឹកហាត់ និងប្រកួតជាផ្លូវការតំណាងប្រទេសកម្ពុជា។
កីឡាករល្បីឈ្មោះផ្នែកគុមចម្រុះរូបបន្ថែមទៀតថា មែនទែនទៅរៀងយឺតពេលបន្តិចហើយ ប្រសិនបើមានការប្រមូលផ្ដុំ មានរចនាសម្ព័ន្ធច្បាស់លាស់ និងទទួលស្គាល់ជាផ្លូវការបែបនេះខ្ទង់ ៧-៨ឆ្នាំមុនគឺល្អខ្លាំង ព្រោះពេលនោះខ្លួនកំពុងពេញឡើង និងវ័យនៅក្មេងបន្តិច។
ជើងខ្លាំងរូបនេះលើកឡើងទៀតថា យ៉ាងណាពេលនេះក៏មិនទាន់ជាហួសពេលណាស់ណាដែរ ពោលមានតែខំប្រឹងប្រែងបំផុតលើការហ្វឹកហាត់ ការសម្រក់ទម្ងន់ និងតស៊ូអំណត់ដើម្បីឆ្ពោះទៅដណ្ដើមមេដាយជូនប្រទេសកម្ពុជានៅក្នុងព្រឹត្តិការណ៍ AMMA ប៉ុន្មានថ្ងៃខាងមុខនេះឲ្យបាន។
និយាយពីការហ្វឹកហាត់វិញកីឡាកររូបនេះថាហាត់ជាប់លាប់រយៈពេលជាង១ខែមកហើយ ប៉ុន្តែបញ្ហាលំបាកខ្លាំងនោះគឺការទម្លាក់ទម្ងន់មកច្រើនគីឡូនាំឲ្យកម្លាំងធ្លាក់ចុះទៅតាមហ្នឹងដែរ។ មួយវិញទៀតការខកខានជាច្រើនឆ្នាំនាំឲ្យកម្លាំង និងរាងកាយមិនដូចមុន បើទោះជាខំប្រឹង ឬបុកហាត់ជាង ១ ខែក្ដី ប៉ុន្តែបានត្រឹម ៥០ ទៅ ៦០ % នៃពីមុននោះទេ។
បញ្ជាក់ដែរថា មាស ម៉ើ ជាកីឡាករមានទេពកោសល្យ និងល្បីឈ្មោះមួយរូបលើប្រភេទកីឡាគុនចម្រុះ (MMA) នេះ។ រូបគេក៏ជាម្ចាស់ខ្សែក្រវាត់គុនចម្រុះ KWC របស់ទូរទស្សន៍ CTN ក្នុងជំនាន់លោក ម៉ា សេរី រៀបចំមកម្ល៉េះ។ ក្រៅពីនេះ មាស ម៉ើ ជាកីឡាករមានបទពិសោធច្រើនធ្លាប់ឆ្លងកាត់ការប្រកួតដាក់ទ្រុង MMA នេះនៅប្រទេសថៃ និង ONE Championship ផងដែរ។ នៅថ្ងៃទី១១ ដល់ ១៣ ខែកក្កដា ឆ្នាំ២០២៤ រូបនេះនឹងប្រកួតតំណាងឲ្យកម្ពុជាក្នុងព្រឹត្តិការណ៍ជ្រើសរើសជើងឯកអាស៊ី កីឡាគុនចម្រុះ លើកទី២ (AMMA) ធ្វើឡើងនៅវិមានពហុកីឡដ្ឋានជាតិ៕