សហព័ន្ធកីឡាប្រដាល់គុនខ្មែរ ថ្ងៃទី៥​ ខែ​មេសា ឆ្នាំ២០២៤ នេះ​ធ្វើ​ពិធី​សូត្រ​មន្ត​លើក​រាសី និង​ដើម្បី​អបអរ​ពិធី​បុណ្យ​ចូលឆ្នាំ​ថ្មី​ ប្រពៃណីជាតិខ្មែរ ដែល​នឹង​ឈាន​មក​ដល់​ប៉ុន្មាន​ថ្ងៃ​ទៀត​ពេល​ខាងមុខនេះ។

នា​ឱកាស​ព្រឹកមិញ​នេះ​មាន​ការ​អញ្ជើញ​ចូលរួម​ពី​ឯកឧត្តម ខូវ ឆាយ ប្រធានសហព័ន្ធកីឡាប្រដាល់គុនខ្មែរ ឯកឧត្តម តែម ម៉ឺន ប្រធាន​កិត្តិយស​ ព្រម​ជា​មួយ​ថ្នាក់​ដឹកនាំ​ បណ្តាស្ថានីយ៍ទូរទស្សន៍ដៃគូសំខាន់​ និង ព្រឹទ្ធាចារ្យកីឡាជាច្រើនរូបទៀត។ ឯកឧត្តម ខូវ ឆាយ ដែលជាប្រធានសហព័ន្ធកីឡាកីឡាប្រដាល់គុនខ្មែរថ្មី បានថ្លែងអំណរគុណចំពោះឯកឧត្តម តែម ម៉ឺន ដែលបានប្រគល់ភារកិច្ចដឹកនាំនេះជូនទៅដល់ឯកឧត្តមក៍ព្រោះតែអតីតប្រធានបានមើលឃើញពីសក្តានុពល និងភាពវៃឆ្លាតរបស់ឯកឧត្តម ខូវឆាយពិសេសការយល់ដឹងទាំងផ្នែកភាសារ និងបច្ចេកវិទ្យាផ្សេងៗជាដើម។

ក្នុងនាមប្រធានសហព័ន្ធថ្មីឯកឧត្តមបានប្រកាសថា នឹង​បន្តដឹកនាំសហព័ន្ធកីឡាប្រដាល់គុនខ្មែរឲ្យទទួលបានភាពជោគជ័យ ទាំងឆាកជាតិ និងអន្តរជាតិដើម្បីបន្តលើកស្ទួយវិស័យកីឡាប្រដាល់អត្តសញ្ញាណជាតិខ្មែរឲ្យបន្តគង់វង្សជាដរាបជាការតបស្នងជូន ចំពោះ ឯកឧត្តម តែម ម៉ឺន នូវស្នាដៃ និង​កេរ្តិ៍​ដំណែល​ដែលឯកឧត្តមបានបន្សល់ទុកជាច្រើនអាណត្តិកន្លងមក។ ទន្ទឹមនិងនេះឯកឧត្តមក៍បានបញ្ជាក់ពីជំហរក្នុងកិច្ចសហការជាមួយដៃគូអភិវឌ្ឍន៍កីឡាប្រដាល់គុនខ្មែរពិសេសបណ្តាស្ថានីយ៍ទូរទស្សន៍ក្នុងស្រុក បណ្តាក្លឹបគ្រូបង្វឹក និងកីឡាការ កីឡាការិនី ទាំងអស់រួបរួមពួតដៃគ្នាជាធ្លុងមួយយកប្រយោជន៍ជាតិជាធំ  និងមិនទុកអោយអ្នកណាម្នាក់ឯកោឡើយ។

​ជាចុងក្រោយនៃកម្មវិធីព្រឹកមិនញនេះក្នុងនាមប្រធានសហព័ន្ធបានធ្វើការឧបត្តម្ភថវិការជូនដល់មន្ត្រីសហព័ន្ធចំនួន ១៥០នាក់ នូវទឹកប្រាក់ក្នុងម្នាក់ៗ ១០ម៉ឺនរៀល និងគណៈកម្មាការប្រតិបិត្តក្នុងម្នាក់ ៣០ម៉ឺនរៀលផងដែរ។​ ពិធី​សូត្រ​មន្ត​អបអរ​ឆ្នាំ​ថ្មី​នេះ​ប្រារព្ធ​ឡើង​នៅ​ទីស្នាក់ការ​សហព័ន្ធ​ផ្ទាល់​ក្នុង​ពហុ​កីឡដ្ឋាន​ជាតិ៕​