អេលីត សាន់ សរសើរ វ៉ាន់ថង មុនប៉ះគ្នាយកខ្សែក្រវាត់ NNP ប្រាក់រង្វាន់១ម៉ឺនដុល្លារ

2023-05-02 03:51:23
ប្រដាល់

2023-05-02 03:51:23
ចំនួនមតិ 0 | ចំនួនចែករំលែក 0

ចន្លោះមិនឃើញ

អេលីត សាន់ បានក្លាយជាបេក្ខភាពឡើងទៅប៉ះកីឡាករ ឈុត សេរីវ៉ាន់ថង នៅវគ្គផ្ដាច់ព្រ័ត្រដណ្ដើមខ្សែក្រវ៉ាត់មរតកគុនខ្មែរ NNP ហើយ ក្រោយពីយកឈ្នះលើកីឡាករ វ៉ាន់ វឿន នៅទឹកទី១។

នៅយប់មិញនេះ អេលីត សាន់ ធ្វើបានល្អមែនទែន ដោយយកឈ្នះលើពុធ សំបូរ ដោយទាត់ឱ្យខូចជើងនៅទឹកទី២។ ខណៈដែលឡើងទៅប៉ះ វ៉ាន់ វឿន ទៀត កូនសិស្សរបស់លោកគ្រូ ស៊ន អេលីត នៅតែធ្វើបានល្អដដែល។ ដោយរូបគេបានទាត់ឱ្យ វឿន ខូចជើងតាំងពីដើមទឹកទីមួយម្ល៉េះ ដោយយកឈ្នះលើការប្រកួតនេះលឿនមែនទែន។ ទទួលបានពានមួយ និងឱកាសឡើងទៅវាយខ្សែក្រវាត់ អេលីត សាន់ សប្បាយចិត្តមែនទែន និងអះអាងថាបន្ដខំហ្វឹកហាត់ត្រៀមប្រកួតយកខ្សែក្រវ៉ាត់។

អេលីត សាន់ បាននិយាយក្រោយចប់ការប្រកួតនៅយប់មិញនេះថា៖ “វ៉ាន់ថង មួយរយៈនេះល្អខ្លាំងមែនទែន។ គាត់ផ្លាស់ទីលឿន ចេញចូលលឿន វាយញ៉ាប់ជាងខ្ញុំ។ តែយ៉ាងណា ខ្ញុំនឹងខិតខំ ប្រឹងចាប់ចំណុចខ្សោយគាត់ឱ្យបាន។ វ៉ាន់ថង គាត់ជាកីឡាករធន់ និងវាយល្អ។ ខ្ញុំនឹងប្រឹងហ្វឹកហាត់បន្ដទៀត ដើម្បីប្រកួតដណ្ដើមខ្សែក្រវាត់ NNP ”។

ខ្សែក្រវាត់ មរតកគុនខ្មែរ NNP មានប្រាក់រង្វាន់សរុបដល់ទៅ១ម៉ឺនដុល្លារ និងមាស២តំឡឹងថែមទៀត។ ការប្រកួតនោះនឹងជក់ចិត្តមិនខាន ព្រោះទាំង អេលីត សាន់ និង វ៉ាន់ថង សុទ្ធតែជាកីឡាករឆ្នើមផុតលេខនៅកម្ពុជាហើយ៕

អត្ថបទ៖ ប្រុស យុទ្ធ