គុនល្បុក្កតោ កំពុងល្បី អន្ដរជាតិ និងក្នុងតំបន់កំពុងសម្រុកហ្វឹកហាត់

2023-04-03 04:11:53
ប្រដាល់

2023-04-03 04:11:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្បាច់គុនល្បុក្កតោ ជាកីឡាកំពុងពេញនិយមសម្រាប់ប្រជាជនកម្ពុជា ហើយវាក៏កំពុងសាយភាយទៅកាន់បណ្ដាប្រទេសក្នុងតំបន់ ដែលពេញចិត្ត និងចង់មកហ្វឹកហាត់ឱ្យស្គាល់ច្បាស់ផងដែរ។

ឯកឧត្តមបណ្ឌិតសភាចារ្យ ច័ន្ទ សារុន ប្រធានសហព័ន្ធកីឡាគុនល្បុក្កតោកម្ពុជា៖ “ក្នុងនាមសហព័ន្ធល្បុក្កតោកម្ពុជា និងក្នុងនាមខ្លួនខ្ញុំផ្ទាល់ ខ្ញុំពិតជាមានក្ដីរីករាយក្រៃលែង ដែលបានចូលរួមជាអធិបតី ក្នុងការប្រកាសបើកការប្រកួតកីឡាគុនល្បុក្កតោជើងឯកអាស៊ីអាគ្នេយ៍ ជាលើកទី១ ដែលធ្វើឡើង នៅទឹកដីកម្ពុជា។ គុនល្បុក្កតោ ជាប្រភេទកីឡាដ៏ចំណាស់មួយរបស់ខ្មែរ ដែលពេលនេះ បាននឹងកំពុងវិវឌ្ឍខ្លួនទៅជាកីឡាមួយប្រភេទ ដែលអាចឱ្យមនុស្សទាំងអស់ បានចូលរួមហាត់ និងប្រកួត ទាំងកម្រិតថ្នាក់ក្នុងតំបន់ និងអន្តរជាតិ”។

ការប្រកួតកីឡាគុនល្បុក្កតោជើងឯកអាស៊ីអាគ្នេយ៍ ឆ្នាំ២០២៣នេះ គឺរៀបចំឡើងចាប់ពីថ្ងៃទី៣០ ខែមីនា ដល់ថ្ងៃទី ៣ ខែមេសា ឆ្នាំ២០២៣ នៅក្នុងសាលសាកលវិទ្យាល័យភូមិន្ទភ្នំពេញ ដោយមានប្រទេសចូលរួមប្រកួតប្រជែងចំនួន៤ គឺ មានវៀតណាម, ឡាវ ហ្វីលីពីន និង កម្ពុជាជាម្ចាស់ផ្ទះ។

ការប្រកួតជ្រើសរើសជើងឯកគុនល្បុក្កតោលើកទី១នេះ គ្រាន់តែជាចំណុចចាប់ផ្ដើមមួយប៉ុណ្ណោះ ហើយប្រាកដណាស់ ដោយមានការចូលរួមដោយស្មោះសរ ពីបណ្ដាប្រទេសជាសមាជិក រួមជាមួយកម្ពុជា នឹងជំរុញប្រភេទកីឡាមួយនេះ ឱ្យកាន់តែមានសក្ដានុពលបន្ថែមទៀត ក្នុងឆាកជាតិ និងឆាកអន្តរជាតិ៕

អត្ថបទ៖ ប្រុស យុទ្ធ