- 2023-03-13 02:47:58
- ប្រដាល់
ពេជ្រ ប៊ុនសិទ្ធ និង សុវណ្ណចាន់សុធី ឈ្នះសន្លប់ដូចគ្នាទទួលបាន៣ពិន្ទុថ្ងៃបើកឆាកខ្សែក្រវាត់ខារ៉ាបាវរដូវកាលថ្មី
- 2023-03-13 02:47:58
- ចំនួនមតិ 0 | ចំនួនចែករំលែក 0
ពេជ្រ ប៊ុនសិទ្ធ និង សុវណ្ណចាន់សុធី ឈ្នះសន្លប់ដូចគ្នាទទួលបាន៣ពិន្ទុថ្ងៃបើកឆាកខ្សែក្រវាត់ខារ៉ាបាវរដូវកាលថ្មី
ចន្លោះមិនឃើញ
ថ្ងៃបើកឆាកវគ្គសន្សំពិន្ទុក្នុងពូលដើម្បីដណ្ដើមខ្សែក្រវាត់ខារ៉ាបាវ រដូវកាលទី៩ ម្សិលមិញនេះគឺកីឡាករ២រូប ហុង សុវណ្ណចាន់សុធី និង ពេជ្រ ប៊ុនសិទ្ធ ឈ្នះសន្លប់ដូចគ្នាលើកីឡាករថៃ ទទួលបាន៣ពិន្ទុ។
គូសន្សំពិន្ទុឆ្ពោះទៅដណ្ដើមខ្សែក្រវាត់ទី១ គឺ ហុង សុវណ្ណចាន់សុធី ឈ្នះសន្លប់លើកីឡាករថៃ អ៊ីន ស៊ីណយ នៅទឹកទី២។ ចំណែកគូខ្សែក្រវាត់ទី២ ពេជ្រ ប៊ុនសិទ្ធ ផ្ដួលកីឡាករថៃ ឡាហ្វាន់ ឲ្យសន្លប់ក្នុងទឹកទី៣។
លោក នាង ស៊ីវុត្ថា ប្រធានផ្នែករៀបចំប្រដាល់សង្វៀនបាយ័នបានឲ្យដឹងពេលសន្និសីទសារព័ត៌មានម្សិលមិញនេះថា លោកថ្លែងអំណរគុណដល់អ្នកគាំទ្រគុនខ្មែរដ៏សន្ធឹកសន្ធាប់តាំងពីមុនរហូតដល់បច្ចុប្បន្ននេះ។ កម្មវិធីប្រដាល់ខារ៉ាបាវដើរបានមកដល់ពេលនេះក៏ដោយសារការគាំទ្រដែរ ដូច្នេះលោកសូមអរគុណចេញពីបេះដូងចំពោះការចំណាយពេលមកទស្សនាដោយមិនគិតពីការចំណាយថវិកាអ្វីនោះឡើយ។
ជាមួយគ្នានេះដែរប្រធានផ្នែកប្រដាល់រូបនេះស្នើរដល់តំណាងសហព័ន្ធប្រដាល់គុនខ្មែរឲ្យពិនិត្យគ្រប់គ្រងឲ្យបានល្អចំពោះការផ្ដល់ពិន្ទុដល់កីឡាករ កីឡាការិនីដែលឡើងប្រកួតដើម្បីជៀសវាងការថ្នាំងថ្នាក់ចិត្តពីមហាជនក៏ដូចជាអ្នកគាំទ្រផងដែរ។ ព្រោះបច្ចុប្បន្ននេះបើការដាក់ពិន្ទុធ្វេសប្រហែសបន្តិចគឺអ្នកគាំទ្ររិះគន់ហើយ។
បញ្ជាក់ដែរថា ខ្សែក្រវាត់ខារ៉ាបាវ ឈានដល់រដូវកាលទី៩ ហើយ ខណៈសប្ដាហ៍ទី១ ក៏រកឃើញកីឡាករកម្ពុជា២រូបទទួលបាន៣ពិន្ទុថ្ងៃបើកឆាកម្សិលមិញនេះ។ រដូវកាលទី៩ នេះគឺលេងលើប្រភេទទម្ងន់ ៥៧គីឡូក្រាមដោយមានកីឡាករកម្ពុជា ៤រូប និងកីឡាករថៃ៤រូប ប្រកួតសន្សំពិន្ទុក្នុងពូលបន្ទាប់មកប្រកួតវគ្គកណ្ដាលផ្ដាច់ព្រ័ត្រ និងផ្ដាច់ព្រ័ត្ររកម្ចាស់ខ្សែក្រវាត់តែម្ដង។ លេខ១ ម្ចាស់ខ្សែក្រវាត់ទទួលបានប្រាក់រង្វាន់ ៦,០០០$ លេខ២ ទទួលបាន ៣,៥០០$ លេខ៣ ទទួលបាន ២,០០០$ និងលេខ៤ ទទួលបាន ១,០០០$៕
