- 2021-08-10 07:02:40
- ប្រដាល់
ជំនួបរវាង ចាន់ រតនា និង Eko ត្រូវរាំងស្ទះ ដោយសារបញ្ហាមួយនេះ
- 2021-08-10 07:02:40
- ចំនួនមតិ 0 | ចំនួនចែករំលែក 0
ជំនួបរវាង ចាន់ រតនា និង Eko ត្រូវរាំងស្ទះ ដោយសារបញ្ហាមួយនេះ
ចន្លោះមិនឃើញ
កាលពីខែមុន ទាំងអ្នកគាំទ្រនៅប្រទេសកម្ពុជា និង ឥណ្ឌូណេស៊ីបានចាប់អារម្មណ៍នឹងអ្នកលេងគុនចម្រុះឥណ្ឌូណេស៊ី Eko Roni Saputra ប្រកាសចង់ជួបអ្នកលេងគុនចម្រុះកម្ពុជា ចាន់ រតនា នៅលើឆាកសង្វៀនពិភពលោក ONE Championship។
ការប្រកាសនេះគឺ Eko Roni ចង់សងសឹកឲ្យមិត្តរួមជាតិ២រូបគឺ Abro Fernandes និង Rudy Agustian បានចាញ់ក្រោមកណ្តាប់ដៃរបស់អ្នកលេងគុនចម្រុះលេខ១កម្ពុជា ចាន់ រតនា ក្នុងទឹកទី២ដូចគ្នា។
បន្ទាប់មក ចាន់ រតនា បានឆ្លើយតបទទួលយកដោយមានកម្លាំងចិត្ត និងជឿជាក់ថែមទៀតផង ប្រសិនបើ ONE ពិតជារៀបចំឲ្យជួបគ្នាលើសង្វៀនដូចការចង់បានរបស់កីឡាករឥណ្ឌូណេស៊ីមែន។
ទោះបីជាយ៉ាងណា ដោយសារស្ថានភាពកូវីដ-១៩មិនអំណោយផលទាន់ពេលវេលា ពេលនេះ Eko Roni Saputra ត្រូវបានផ្គូផ្គងឲ្យប្រកួតជាផ្លូវការជាមួយកីឡាករចិន Liu Peng Shuai នាថ្ងៃសុក្រ ទី១៣ ខែសីហាខាងមុខនេះហើយនៅក្នុងព្រឹត្តិការណ៍ ONE: BATTLEGROUND II នៅប្រទេសសិង្ហបុរី។
បន្ទាប់ពីដឹងដំណឹងថា Roni ជួបដៃគូថ្មី អ្នកលេងគុនចម្រុះកម្ពុជា ចាន់ រតនា អាយុ៣៥ឆ្នាំបានចាត់ទុកថាប្រការល្អម្យ៉ាងដែរ។
ចាន់ រតនា បាននិយាយថា ៖«ខ្ញុំគិតថា ល្អដែរ នៅពេល Roni បានប្រកួតជាមួយដៃគូថ្មី។ ពីព្រោះវាបានផ្តល់ពេលវេលាឲ្យខ្ញុំបានយូរក្នុងការត្រៀមខ្លួន។ ចាប់តាំងពីបានដឹងពីការចង់ជួបរបស់គាត់មក ខ្ញុំបានហ្វឹកហាត់ជាប្រចាំដើម្បីត្រៀមខ្លួនប្រកួត»។
«រហូតដល់ពេលនេះ ខ្ញុំនៅតែហ្វឹកហាត់ ហើយហ្វឹកហាត់បន្តទៀត ពីព្រោះខ្ញុំគិតថា នៅពេលខាងមុខនេះអាចបានប្រកួតជាមួយ Roni មិនខាន។ ជាពិសេសទៀតនោះ ជាឱកាសដែលខ្ញុំអាចស្វែងយល់ពីក្បាច់វ៉ៃរបស់គាត់បានច្រើន។ នៅពេលគាត់ឡើងប្រកួត ខ្ញុំនឹងតាមដានមើលពីចំណុចខ្លាំង និងខ្សោយ»៕
