ច្បាស់ជាអាណិតគ្រប់គ្នា បើដឹងរនាំងជីវិតដ៏លំបាករបស់ ចាន់ រតនា មុនមានថ្ងៃនេះ

2020-12-22 03:57:36
ប្រដាល់

2020-12-22 03:57:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ចាន់ រតនា ជាកីឡាករល្បីឈ្មោះនៅកម្ពុជា នាពេលបច្ចុប្បន្ននេះ ក្រោយពីបានបង្ហាញក្បាច់គុនចម្រុះខ្មែរលើសង្វៀនអន្តរជាតិលំដាប់ពិភពលោក ONE Championship ។

នាពេលបច្ចុប្បន្នគឺគេអាចនិយាយបានថាជើងខ្លាំងរបស់កម្ពុជាវ័យ៣៤ឆ្នាំនេះ បានជោគជ័យមួយជំហានហើយក្នុងអាជីព ក្រោយពីសាងកេរ្តិ៍ឈ្មោះបោះសំឡេងខ្លាំងកន្លងមក។ យ៉ាងណាមិញ មុនមានថ្ងៃនេះ រតនា ក៏បានឆ្លងកាត់រឿងរ៉ាវកម្សត់កម្រជាច្រើនផងដែរ តាំងពីក្មេងមក។

ចាន់ រតនា បានបញ្ជាក់ពីជីវភាពខ្វះខាត និងការលំបាករបស់ខ្លួនកាលនៅជាកីឡាករប្រដាល់ថា ក្នុងមួយខែរូបគេត្រូវឡើងវាយ៤ដង ទើបបានប្រាក់មកផ្គត់ផ្គង់គ្រួសារ ខណៈដែលពេលខ្លះប្រាក់នោះក៏សឹងតែមិនគ្រប់គ្រាន់សម្រាប់រូបគេទៀតផង។ តែបច្ចុប្បន្ន រតនា បានក្លាយជាអ្នកវាយក្នុងទ្រុងដ៏ល្បីល្បាញម្នាក់ ដែលមានអង្គភាពជាច្រើនចង់ទាក់ទងគេឱ្យទៅឡើងប្រកួត។ ចំណែកឯចំណូលវិញ ក៏បានប្រសើរឡើងជាងមុនដែរ ចាប់តាំងពីចាប់អាជីពថ្មីនេះ។

និយាយពីប្រវត្តិរបស់គេវិញ រតនា កើតនៅជំរំភៀសខ្លួនជាយដែនខ្មែរ-ថៃ។ ចាន់ រតនា និងគ្រួសារបានត្រឡប់ចូលមាតុភូមិវិញពេលសង្គ្រាមបានបញ្ចប់ ហើយចាប់ផ្ដើមជីវិតថ្មីដោយប្រមែប្រមូលប្រាក់ទិញដីផ្ទះនៅខេត្តបន្ទាយមានជ័យ។ រូបគេមិនចាំច្បាស់ប៉ុន្មានទេថា ខ្លួនចាប់ផ្តើមហាត់រៀនក្បាច់គុនតាំងពីពេលណាមក ប៉ុន្តែអ្វីដែលខ្លួនដឹងគឺមានលោកឪពុក ជាគ្រូក្បាច់គុនបុរាណយុទ្ធគុនខម។ លោកឪពុកបានក្លាយជាបុគ្គលដ៏មានឥទ្ធិពលបំផុតដែលជំរុញឲ្យរូបគេចាប់អាជីពប្រដាល់។

លោក ចាន់ ប៊ុនធឿន គ្រូក្បាច់យុទ្ធគុនខម និងជាឪពុករបស់ ចាន់ រតនា បានបើកក្លឹបហាត់គុនមួយដែលពេលនោះហើយធ្វើឲ្យកូនប្រុសរបស់លោកបោះបង់ចោលការសិក្សាដើម្បីជួយបន្ថែមកម្លាំងឲ្យគ្រួសារបន្ថែម។ រតនា រំលឹកថា ៖«គ្រួសារខ្ញុំពីមុនក្រខ្លាំងណាស់ ទើបឪពុកខ្ញុំឲ្យឈប់រៀនមកជួយគាត់នៅក្លឹបវិញ។ ពេលខ្ញុំហាត់ចេះបានច្រើនបន្តិច ខ្ញុំក៏ចាប់ផ្តើមបង្រៀនសិស្សដ៏ទៃទៀតជាបន្ត។ អីចឹង ខ្ញុំរៀនបណ្តើរ បង្ហាត់បណ្តើរ។ ដំបូងឡើយកម្សត់ណាស់ ដោយសារយើងគ្មានកន្លែងហាត់ ដូច្នេះយើងត្រូវដើរសុំដីគេមកបើកក្លឹប។ ម្យ៉ាង យើងក៏អត់មានឧបករណ៍សម្រាប់ហ្វឹកហាត់គ្រប់គ្រាន់ថែមទៀត អីចឹងយើងត្រូវព្យាយាមរកវិធីច្នៃរបស់ប្រើខ្លួនឯង។ និយាយទៅវេទនាខ្លាំង»។

ចាន់ រតនាបន្ថែមទៀតថា ៖«ខ្ញុំមិនដែលគិតថា ខ្លួនឯងក្លាយជាអ្នកប្រដាល់ទេ។ ខ្ញុំទៅហាត់ក្បាច់គុន ព្រោះគ្រាន់តែចង់ជួយឪពុកខ្ញុំដែលបង្ហាត់សិស្សតែប៉ុណ្ណោះ។ ឪពុកខ្ញុំគាត់ព្យាយាមបញ្ចុះបញ្ជូលខ្ញុំឲ្យមកហាត់គុនឲ្យស្ទាត់ទៅ មកពីខ្ញុំមិនបានរៀនសូត្រខ្ពស់ដូចគេ»។

សូមបញ្ជាក់ថា នៅឆ្នាំ ២០១៤ ចាន់ រតនា បានបញ្ចប់អាជីពប្រដាល់សេរី ហើយក៏ប្រឡូកសង្វៀនក្នុងទ្រុងបានឱកាសចូលវៃនៅសង្វៀនធំ ONE តែម្ដង។ ដោយក្នុងឆ្នាំនោះ រូបគេវាយ៣ដង ឈ្នះ២ដងនិងចាញ់ម្ដង។ ឈ្នះកីឡាករកម្ពុជា ប្រាក់ ចាន់ស៊ីន និងចាញ់ សំអាង ឌុន ដ៏ចម្រូងចម្រាស់ ហើយចុងក្រោយផ្ដួលកីឡាករហ្វីលីពីន Ramon Gonzalez ក្នុងទឹកទី១នៅប្រទេសម៉ាឡេស៊ីកាលពីខែមីនា ឆ្នាំ២០១៥។ រតនា បាននិយាយថា៖ ONE Championship បានផ្ដល់ឱកាសឱ្យខ្ញុំ បានប្រកួតជាមួយជើងខ្លាំងមកពីប្រទេសផ្សេងៗ ហើយវាក៏បានផ្ដល់ពេលឱ្យខ្ញុំដើម្បីវាស់ស្ទង់សមត្ថភាពផ្ទាល់ខ្លួនផងដែរ៕

អត្ថបទ៖ វិធាវី