សហព័ន្ធ​កីឡា​សូហ្វតិន្នីស​កម្ពុជា​ បាន​បិទ​បញ្ចប់​ការ​ប្រកួត​ជ្រើសរើស​ជើងឯក​ថ្នាក់​ជាតិ​ ឆ្នាំ​២០២៤​ នេះ​ហើយ​កាល​ពី​ម្សិលមិញ​ ខណៈ​យុវជន​ក្រោម​ ១៥​ឆ្នាំ​ត្រូវ​បាន​លើក​ទឹកចិត្ត​ឲ្យ​ចូលរួម​ប្រកួត​ប្រជែង។​

អគ្គលេខាធិការ​រង​សហព័ន្ធ​សូហ្វតិន្នីស​កម្ពុជា​ លោក​ស្រី​ ឃនសាត សាន្នីតា បាន​ឲ្យ​ដឹង​ថា​ ការ​ប្រកួត​ជើងឯកថ្នាក់ជាតិនេះគឺជាការផ្តល់ឱកាសឲ្យកីឡាករ កីឡាការិនីបានជួបជុំគ្នា និង​ដើម្បីបញ្ចេញនូវទេពកោសល្យ សមត្ថភាព ក៏ដូចជាវាស់ស្ទង់គុណផលបច្ចេកទេសដែលបានហ្វឹកហាត់កន្លងមក។

អគ្គលេខាធិការ​សហព័ន្ធ​ខាង​លើ​បន្ថែម​ទៀត​ថា​ តប​តាម​ថ្នាក់ដឹកនាំសហព័ន្ធ គណៈកម្មការរៀបចំការប្រកួតបានរៀបចំបញ្ចូលនូវវិញ្ញាសាប្រកួតកម្រិតយុវជន យុវនារី ក្រោមអាយុ ១៥ឆ្នាំ បន្ថែម​ទៀត។ នេះ​ដើម្បីលើកទឹកចិត្តឲ្យមានការប្រកួតប្រជែងបន្ទាប់ពីបានហ្វឹកហាត់ប្រចាំថ្ងៃ និងជំរុញឲ្យមានការបណ្តុះបណ្តាលយុវជនថ្នាលឲ្យបានច្រើន ត្រៀមការប្រមូលផ្តុំហ្វឹកហាត់ក្រុមថ្នាល និងត្រៀមការចូលរួមក្នុងព្រឹត្តិការណ៍ប្រកួតកីឡាយុវជនអាស៊ី ឆ្នាំ២០២៩ ដែលកម្ពុជាទទួលសិទ្ធធ្វើជាម្ចាស់ផ្ទះ ។

បញ្ជាក់​ដែរ​ថា​ សហព័ន្ធ​កីឡា​សូហ្វតិន្នីស​កម្ពុជា​បាន​រៀបចំ​ការ​ប្រកួត​ជើងឯក​ថ្នាក់​ជាតិ​ចាប់​ពី​ថ្ងៃ​ទី៧​ ដល់ ១១​ ខែ​តុលា​ ឆ្នាំ​២០២៤​ និង​បាន​បិទ​បញ្ចប់​ជា​​ផ្លូវការ​ហើយ​កាល​ពី​ម្សិលមិញ​នេះ​នៅ​ទីលាន​របស់​សហព័ន្ធ​ក្នុង​ពហុ​កីឡដ្ឋាន​ជាតិ។​ ចំណាត់ថ្នាក់​ចំណាត់ថ្នាក់លេខ១ បាន​លើ​ សមាគម​កីឡាក្រសួងមហាផ្ទៃ ឈ្នះមេដាយ មាស៦ ប្រាក់៣ សំរឹទ្ធ៤ ។ លេខ២ សមាគមកីឡាខេត្តកណ្តាល ឈ្នះះ មាស៤ ប្រាក់៧ សំរឹទ្ធ២ ។ លេខ៣ សមាគមកីឡា​ខេត្តកំពង់ឆ្នាំង ឈ្នះ មាស១ ប្រាក់២ សំរឹទ្ធ៥៕​