OCA សម្រេចលុបចោល Indoor Games នៅថៃខែវិច្ឆិកាចុងឆ្នាំនេះព្រោះ....

2024-08-21 01:00:00
កីឡាផ្សេងៗ

2024-08-21 01:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាដំណឹងមួយដ៏ភ្ញាក់ផ្អើលដែលប្រទេសថៃត្រូវបានគណៈកម្មការអូឡាំពិកអាស៊ី ដែលហៅកាត់ថា OCA ( Olympic Council of Asia ) សម្រេចចិត្តលុបចោលព្រឹត្តិការណ៍ Asian Indoor and Martial Arts Games លើកទី៦ ដែលគ្រោងធ្វើឡើងនៅថ្ងៃទី២១-៣០ ខែវិច្ឆិកា ឆ្នាំ២០២៤។

បើតាមប្រភពពី Bangkok Post បានចេញផ្សាយនៅព្រឹកថ្ងៃទី២០ ខែសីហា ម្សិលមិញនេះថា ព្រឹត្តិការណ៍ខាងលើត្រូវលុបចោល ព្រោះតែវិបត្តិហិរញ្ញវត្ថុ។ ខណៈដែលខាងភាគី OCA បានបញ្ជាក់ថា ដរាបណាថៃចង់ធ្វើម្ចាស់ផ្ទះពួកគេនឹងមិនប្រកែកឡើយ ហើយរង់ចាំការដាក់សំណើស្ដីពីការសុំសិទ្ធធ្វើជាម្ចាស់ផ្ទះជានិច្ច ប៉ុន្តែត្រូវរង់ចាំដល់បញ្ចប់ការធ្វើម្ចាស់ផ្ទះព្រឹត្តិការណ៍ Asian Indoor and Martial Arts Games លើកទី៧ឆ្នាំ២០២៥ នៅប្រទេសអារ៉ាប៊ីសាអ៊ូឌីតសិន។

បើតាមប្រភពពី Thaiger បានចេញផ្សាយថា មុនឈានដល់ការលុបចោលការធ្វើម្ចាស់ផ្ទះរបស់ថៃនេះ OCA បានចេញសេចក្ដីថ្លែងការផ្លូវការមួយស្ដីពីការមិនទាន់បានឃើញថៃបញ្ចូលប្រភេទកីឡាចំនួន១៤ ទៅក្នុងព្រឹត្តិការណ៍ Asian Indoor and Martial Arts Games និងបានជំរុញឲ្យប្រទេសថៃបញ្ជាក់ពីស្ថានភាពសេដ្ឋកិច្ចនៃការធ្វើម្ចាស់ផ្ទះនេះដោយកំណត់ត្រឹមថ្ងៃទី១៩ ខែសីហា ឆ្នាំ២០២៤។ តាមច្បាប់ប្រសិនបើប្រទេសណាមិនដាក់បញ្ចូលកីឡាឲ្យបានមុនរយៈពេល៣ខែគឺមានន័យថា ប្រទេសនោះមិនអាចរៀបចំប្រភេទកីឡានោះទេ ខណៈដែលថៃមិនទាន់បានដាក់ប្រភេទកីឡា បីយ៉ា កីឡាសម្តែងបែបលើកទឹកចិត្ត គុនដាវ ហុកគីក្នុងសាល កីឡា Netball កីឡាហែលទឹកក្នុងសាល បែលស្បល វាយសី អត្តពលិកកម្មក្នុងសាល ទូករ៉ូអ៉ីងក្នុងសាល លើកទម្ងន់ បាញ់កាំភ្លើង បាល់បោះ និងចំបាប់។

ជុំវិញរឿងនេះលោក Chaiyaphak Siriwat អនុប្រធានគណៈកម្មការអូឡាំពិករបស់ថៃ ក៏បានសម្ដែងការព្រួយបារម្ភ ក្នុងករណីថៃមិនអាចរៀបចំព្រឹត្តិការណ៍នេះឡើង ហើយជាងនេះទៅទៀតប្រទេសថៃ នឹងត្រូវបង់ផាកពិន័យដល់ OCA និងសំណងមួយចំនួនទៀតទៅកាន់ប្រទេសដែលបានកក់សំបុត្រយន្តហោះរួចរាល់ ព្រមទាំងបានរៀបចំនានាក្នុងការត្រៀមខ្លួនមកប្រកួតក្នុងព្រឹត្តិការណ៍នេះ។ មិនត្រឹមតែប៉ុណ្ណោះអត្តពលិកថៃ ក៏អាចនឹងត្រូវគេដកសិទ្ធមិនឲ្យចូលរួមការប្រកួតសម្រាប់ឆ្នាំ២០២៦ផងដែរ៕