![](http://cdn.sabay.com/cdn/media.sabay.com/media/sabay-news/Sport-News/Local-Sports/Event/Charity-A1/66824ed488fb5_1719815880_medium.jpg)
- 2024-07-01 07:01:37
- កីឡាផ្សេងៗ
លោក Anthony Galliano:៖ក្នុងនាមជាទូតសុច្ឆន្ទៈខ្ញុំប្តេជ្ញាចិត្តនឹងជួយផ្សព្វផ្សាយ និងគាំទ្រដល់ការរៃអង្កាសមូលនិធិរបស់អង្គការផ្កាយសមុទ្រ
- 2024-07-01 07:01:37
- ចំនួនមតិ 0 | ចំនួនចែករំលែក 0
លោក Anthony Galliano:៖ក្នុងនាមជាទូតសុច្ឆន្ទៈខ្ញុំប្តេជ្ញាចិត្តនឹងជួយផ្សព្វផ្សាយ និងគាំទ្រដល់ការរៃអង្កាសមូលនិធិរបស់អង្គការផ្កាយសមុទ្រ
ចន្លោះមិនឃើញ
អង្គការផ្កាយសមុទ្រ (ISF) មានក្តីសោមនស្សរីករាយស្វាគមន៍លោក Anthony Galliano ជាទូតសុច្ឆន្ទៈរបស់អង្គការផ្កាយសមុទ្រដើម្បីរួមចំណែកជួយឧបត្ថម្ភគាំទ្រ និងផ្សព្វផ្សាយពីសកម្មភាពការងាររបស់អង្គការក្នុងការជួយដល់ការសិក្សារបស់កុមារក្រីក្រនៅកម្ពុជា។
លោក Anthony Galliano បានឲ្យដឹងថា “ខ្ញុំបានដឹង និងឃើញកាន់តែច្បាស់ពីការងាររបស់អង្គការផ្កាយសមុទ្រគឺពិតជាបានបំផុសគំនិត និងលើកទឹកចិត្តរបស់ខ្ញុំកាន់តែខ្លាំងឡើងក្នុងការចូលរួមលើកកម្ពស់ រួមចំណែកក្នុងសកម្មភាពនានារបស់អង្គការនេះ។ អ្វីដែលយើងអាចធ្វើទៅបានក្នុងការផ្លាស់ប្តូរជីវិតកុមារតាមរយៈការអប់រំគឺមិនមែនគ្រាន់តែការជួយប៉ុណ្ណោះទេ តែវាក៏ជាទំនួលខុសត្រូវរបស់យើងផងដែរ។ ខ្ញុំពិតជាមានកិត្តិយសយ៉ាងខ្លាំងដែលបានក្លាយជាទូតសុច្ឆន្ទៈរបស់អង្គការផ្កាយសមុទ្រហើយខ្ញុំប្តេជ្ញាចិត្តនឹងជួយផ្សព្វផ្សាយពីការងាររបស់អង្គការនេះ និងគាំទ្រដល់ការរៃអង្កាសមូលនិធិគាំទ្រដល់កម្មវិធីនានាក្នុងអង្គការក៏ដូចជាផ្តល់ឱកាសដល់កុមារឲ្យពួកគេទទួលបានអនាគតល្អប្រសើរថែមទៀតផង។ ការងារនេះគឺជាមោទនភាពធំបំផុតសម្រាប់ខ្ញុំ ហើយជាអ្វីដែលខ្ញុំពេញចិត្តនឹងប្រឹងប្រែងបំពេញ”។
ចំណែកអ្នកស្រី ជួប វិច្ឆិកា ជាអគ្គនាយិកាប្រតិបត្តិរបស់អង្គការផ្កាយសមុទ្របានឲ្យដឹងដែរថា ការចូលរួមជាទូតសុច្ឆន្ទៈនេះតាមរយៈបទពិសោធនដ៏ច្រើន និងភាពជោគជ័យរបស់ Anthony ក្នុងវិស័យជំនួញនៅកម្ពុជានឹងនាំមកនូវគុណតម្លៃដ៏ធំធេងដល់អង្គការផ្កាយសមុទ្រ។ សមត្ថភាពរបស់លោកក្នុងការបង្កើតភាពជាដៃគូសាជីវកម្មដ៏រឹងមាំនឹងគាំទ្រយ៉ាងខ្លាំងជំរុញដល់បេសកកម្មរបស់អង្គការឲ្យឆ្ពោះទៅមុខ។ ក្នុងនាមបុគ្គលិកអង្គការផ្កាយសមុទ្រមានសេចក្តីរំភើបរីករាយក្រៃលែងក្នុងការទទួលស្វាគមន៍លោកមកចូលរួមក្នុងគ្រួសារអង្គការផ្កាយសមុទ្រ ហើយសង្ឃឹមយ៉ាងមុតមាំនូវកិច្ចសហការកាន់តែទូលំទូលាយកើតចេញការចូលរួមរបស់លោក Anthony Galliano។
បញ្ជាក់ផងដែរថា លោក Galliano គឺជាអគ្គនាយកប្រតិបត្តិ Cambodia Investment Management Group និងជាអនុប្រធាននៃសភាពាណិជកម្មអាមេរិកនៅកម្ពុជា (AmCham) ។
អង្គការផ្កាយសមុទ្រគឺជាអង្គការក្រៅរដ្ឋាភិបាលនៅកម្ពុជាមួយ ដែលត្រូវបានទទួល ស្គាល់ជាអន្តរជាតិ ដែលបានផ្តល់ឱកាសឲ្យកុមារក្រីក្រទទួលបានការអប់រំ សេវាថែទាំសុខភាព និង កុមារភាព ដែលពួកគេស័ក្តិសមនឹងទទួលបាន ។ កិច្ចគាំទ្ររបស់អង្គការនេះមានគោលបំណងពង្រីក សក្តានុពលនៃការអប់រំ និងកីឡា ដើម្បីជួយកុមារ និងសហគមន៍ក្រីក្រឲ្យចាកផុតពីភាពក្រីក្រ ។ សព្វថ្ងៃនេះកម្មវិធីអប់រំរបស់អង្គការផ្កាយសមុទ្រកំពុងតែធ្វើការជាមួយនឹងកុមារដែលបោះបង់ការសិក្សា ឬមិនធ្លាប់បានរៀនសូត្រ។ ថ្នាក់អប់រំពន្លឿនបង្រៀនពីរថ្នាក់ក្នុងមួយឆ្នាំ ដោយជួយឲ្យសិស្ស អាចចូលរៀនថ្នាក់ដ៏សមស្របតាមកម្រិតអាយុរបស់ខ្លួននៅសាលារដ្ឋ ។
ដើម្បីរួមចំណែកជួយកាត់បន្ថយឧបសគ្គនានាដែលនាំឲ្យកុមារបោះបង់ការរៀនសូត្រ អង្គការផ្កាយសមុទ្រក៏ផ្តល់ការឧបត្ថម្ភ គាំទ្រជាឯកសណ្ឋានសម្ភារៈសិក្សា អាហារនៅសាលារៀន សេវាថែទាំសុខភាព និងកញ្ចប់អាហារប្រចាំខែសម្រាប់ក្រុមគ្រួសាររបស់ពួកគេទៀតផង។ ជារៀងរាល់ឆ្នាំកម្មវិធីអប់រំរបស់អង្គការផ្កាយសមុទ្រគាំទ្រដល់សិស្សានុសិស្សចំនួន ៧០០នាក់ឲ្យរៀនសូត្រចាប់ពីថ្នាក់ពន្លឿនរហូតដល់ថ្នាក់បឋមសិក្សា មធ្យមសិក្សា ឧត្តមសិក្សា និងរហូតដល់ពួកគេមានការងារធ្វើសមរម្យ។ បន្ថែមពីនេះក្រុមគ្រួសាររបស់សិស្សជាង ៣,០០០នាក់ក៏ទទួលបានការឧបត្ថម្ភគាំទ្រតាមរយៈគម្រោងផ្សេងៗរបស់អង្គការផងដែរ៕